កម្ពុជាច្រានចោលព័ត៌មានមន្ត្រីយោធាឥណ្ឌូណេស៊ីនិយាយអំពីការដកទ័ព
ក្រោយពីបានជួបប្រជុំគ្នាកាលពីខែធ្នូកន្លងទៅ គណៈកម្មាធិការព្រំដែនទូទៅបានសម្រេចបង្កើតក្រុមការងារចម្រុះខ្មែរថៃមួយដើម្បីដឹកនាំការអនុវត្តន៍ដីកាបង្គាប់របស់តុលាការយុត្តិធម៌អន្តរជាតិទាក់ទងនឹងការដកកងទ័ពចេញតំបន់ដែលគ្មានកងទ័ពបណ្តោះអាសន្ន។ រហូតដល់ពេលនេះ ថៃនៅមិនទាន់បង្ហើបអំពីកាលបរិច្ឆេទកិច្ចប្រជុំនេះនៅឡើយទេ។ ប៉ុន្តែមន្ត្រីយោធាឥណ្ឌូណេស៊ីបាននិយាយថា ឥណ្ឌូណេស៊ីនឹងត្រូវពង្រាយបុគ្គលិកសង្កេតការណ៍របស់ខ្លូននៅថ្ងៃដើមខែឧសភាខាងមុខ។ ជាកាលបរិច្ឆេទដែលកម្ពុជាមិនទាន់អះអាងនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
កម្ពុជាអះអាងថាខ្លួនកំពុងរង់ចាំការអញ្ជើញពីភាគីថៃដើម្បីចូលរួមកិច្ចប្រជុំក្រុមការងារចម្រុះនៅក្នុងប្រទេសថៃ ហើយបានថ្លែងបញ្ជាក់ផងដែរថាខ្លួនមិនបានដឹងអំពីកាលបរិច្ឆេទនៃការដាក់ពង្រាយកម្លាំងសង្កេតការណ៍ឥណ្ឌូនេស៊ីនៅដើមខែឧសភាដែលមន្ត្រីយោធាឥណ្ឌូនេស៊ីបាននិយាយប្រាប់សារព័ត៌មាននោះឡើយ។
នៅក្នុងកិច្ចប្រជុំគណៈកម្មាធិការព្រំដែនទូទៅលើកទី៨ក្នុងរាជធានីភ្នំពេញកាលពីថ្ងៃទី២១ធ្នូ រដ្ឋមន្ត្រីក្រសួងការពារជាតិទាំងពីរកម្ពុជាថៃ បានព្រមព្រៀងបង្កើតក្រុមការងារចម្រុះមួយដែលនឹងសម្រេចអំពីកាលបរិច្ឆេទនិងត្រួតពិនិត្យលើការងារដកកងទ័ពតាមដីកាបង្គាប់របស់តុលាការឡាអេ។
យោងតាមការព្រមព្រៀង កិច្ចប្រជុំលើកទីមួយនៃក្រុមការងារចម្រុះJoint working Groupនឹងត្រូវរៀបចំដោយប្រទេសថៃ។ អ្នកនាំពាក្យក្រសួងការពារជាតិខ្មែរ លោកឧត្តមសេនីយឯកឈុំ សុជាតិបានអត្ថាធិប្បាយថា លោកមិនបានយល់ថាហេតុអ្វីបានជាមានព័ត៌មានស្តីពីពេលវេលានៃការពង្រាយអ្នកសង្កេតការណ៍ឥណ្ឌូនេស៊ីនៅដើមខែឧសភានោះឡើយ។
មន្ត្រីយោធាជាន់ខ្ពស់របស់កម្ពុជារូបនេះបញ្ជាក់ថា គឺក្រុមការងារចម្រុះដែលត្រូវប្រជុំនៅប្រទេសថៃនៅក្នុងខែមករានេះហើយដែលត្រូវកំណត់អំពីការងារអនុវត្តការដកកងទ័ពនោះ។
ទាក់ទងនឹងក្រុមការងារភាគីកម្ពុជាវិញ រដ្ឋមន្ត្រីការពារជាតិកម្ពុជាលោកទៀ បាញ់បានថ្លែងប្រាប់អ្នកសារព័ត៌មាននៅថ្ងៃអង្គារនេះថា កម្ពុជាបានបង្កើតក្រុមការងារនេះរួចហើយ ដែលមានសមាជិកជិត២០នាក់ហើយដឹកនាំដោយលោកនាយឧត្តមសេនីយ នាង ផាតរដ្ឋលេខាធិការក្រសួងការពារជាតិ។
សម្រាប់លោកកុយ គួងដែលជាអ្នកនាំពាក្យក្រសួងការបរទេសវិញ មិនថាការដកកងទ័ពត្រូវធ្វើនៅពេលណានោះឡើយ តែការដកកងទ័ពត្រូវធ្វើនៅក្នុងវត្តមានរបស់អ្នកសង្កេតការណ៍ឥណ្ឌូនេស៊ី។ គួរបញ្ជាក់ថា ក្រុមអ្នកសង្កេតការណ៍ត្រូវបានផ្លាស់ប្តូរពីឥណ្ឌូនេស៊ីតែឯង មកជាក្រុមចម្រុះដែលត្រូវមានកម្ពុជានិងថៃរួមគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ