សមត្ថកិច្ចមិនប្រាប់ពីកន្លែងឃុំខ្លួនសកម្មជនសិទ្ធិមនុស្ស និងកម្មករ ២៣នាក់ ដែលត្រូវតុលាការចោទប្រកាន់
រហូតមកទល់ថ្ងៃនេះ គ្មានអ្នកណាដឹងពិតប្រាកដថា សកម្មជនសិទ្ធិមនុស្សនិងកម្មករសរុប ២៣នាក់ ដែលត្រូវបានសមត្ថកិច្ចចាប់ខ្លួនក្នុងព្រឹត្តិការណ៍ប៉ះទង្គិចគ្នានៅតំបន់សេដ្ឋកិច្ចពិសេសភ្នំពេញ និងសួនឧស្សាហកម្មកាណាឌីយ៉ា ត្រូវបានគេឃុំខ្លួននៅទីកន្លែងណា ឬមានសុខទុក្ខយ៉ាងណានោះទេ។ អ្នកការពារសិទ្ធិមនុស្សបានប្រាប់វិទ្យុបារាំងអន្តរជាតិនៅថ្ងៃនេះថា ជនត្រូវចោទទាំងនោះត្រូវបានសមត្ថកិច្ចផ្លាស់ប្តូរទៅពន្ធនាគារនៅក្រៅរាជធានីហើយ តែអាជ្ញាធរមិនទាន់បានអនុញ្ញាតអោយចូលសួរសុខទុក្ខពួកគេនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
សកម្មជនសិទ្ធិមនុស្ស និងកម្មករសរុប ២៣នាក់ ដែលត្រូវបានតុលាការចោទប្រកាន់ជាបន្តបន្ទាប់ពីបទ បង្កហិង្សាដោយចេតនា និងបំផ្លាញទ្រព្យសម្បត្តិអ្នកដទៃ ក្នុងព្រឹត្តិការណ៍ប៉ះទង្គិចគ្នានៅតំបន់សេដ្ឋកិច្ចពិសេសភ្នំពេញ និងសួនឧស្សាហកម្មកាណាឌីយ៉ា កាលពីសប្តាហ៍មុន មិនទាន់ត្រូវបានសមត្ថកិច្ចបង្ហើបអោយដឹងពីកន្លែងដែលត្រូវឃុំខ្លួនឡើយ។ នេះបើតាម លោក អំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ ប្រាប់វិទ្យុបារាំងអន្តរជាតិ នៅព្រឹកថ្ងៃទី៧ មករានេះ។
អ្នកការពារសិទ្ធិអង្គការលីកាដូ បានបញ្ជាក់ថា សូម្បីតែជនត្រូវចោទបានរងរបួសក៏សមត្ថកិច្ចមិនបានអនុញ្ញាតអោយអង្គការសិទ្ធិមនុស្សជួយពិនិត្យរបួសដែរ។ តាមព័ត៌មានដែលលោកទទួលបានពីសកម្មជនសិទ្ធិមនុស្ស ជនត្រូវចោទទាំង ២៣នាក់ ទំនងជាប់ឃុំខ្លួននៅ ពន្ធនាគារត្រពាំងថ្លុង ខេត្តកំពង់ចាម។
ប្រតិកម្មតបនឹងការចោទប្រកាន់នេះ លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បកស្រាយថា វាជាសិទ្ធរបស់តុលាការក្នុងការឃុំ ឬបញ្ជូនទៅកន្លែងណាមួយ តែលោកបដិសេធមិនពន្យល់ពីការព្យាយាមលាក់បាំងជនត្រូវចោទទាំងនោះទេដោយគ្រាន់តែអះអាងថា អាចមានមូលហេតុជាក់លាក់អ្វីមួយ។ លោកជឿជាក់ថា ជនត្រូវចោទដែលរងរបួសនឹងត្រូវបានព្យាបាលដោយពេទ្យក្នុងពន្ធនាគារ ដែលជាក្រមសីលធម៌ទូទៅ ដោយគ្មានការរើសអើងឡើយ។
សម្រាប់លោក អំ សំអាត ការព្យាយាមលាក់បាំងពីសុខទុក្ខជនត្រូវចោទទាំងនេះទំនងជាខ្លាចបែករឿងធ្លាយអាថកំបាំងទាក់ទងនឹងការចោទប្រកាន់ទៅលើសកម្មជនទាំងនោះ។ លោកបានជឿជាក់ថា ទាំងតុលាការ និងសមត្ថកិច្ចបានព្យាយាមលាក់បាំងពីកន្លែងឃុំខ្លួនជនត្រូវចោទដែលត្រូវបានគេស្គាល់អត្តសញ្ញា មានដូចជា លោក វ៉ន ពៅ ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ លោក ថេង សាវឿន អ្នកសំរបសំរួលសម្ព័ន្ធសហគមន៍កសិករកម្ពុជា លោក ចាន់ ពុទ្ធិស័ក្កិ សហគមន៍បឹងកក់ កម្មករ តំណាងសហជីព ប្រជាពលរដ្ឋ។ ការព្យាយាមលាក់បំបាំងពីសុខទុក្ខជនត្រូវចោទទាំងនោះ ត្រូវបានអ្នកការពារសិទ្ធិមនុស្សរូបនេះយល់ថា មិនគួរមានឡើយនៅក្នុងប្រទេសប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ