កម្ពុជាអំពាវនាវរកថវិកាអភិវឌ្ឍន៍ដំណាំសូត្រ
កម្ពុជាកំពុងស្វែងរកជំនួយថវិកា ដើម្បីដាំមនលើផ្ទៃដី ៤០០០ហិចតា ដែលអាចជួយប្រជាពលរដ្ឋចំនួន ២ម៉ឺននាក់ ចេញពីភាពក្រីក្រ។ ប្រសិនបើគម្រោងនេះទទួលបានជោគជ័យ វានឹងអាចឆ្លើយតបតម្រូវការរបស់កម្ពុជាដែលតែងនាំចូលសរសៃសូត្រឆៅចំនួន ៤០០តោន ក្នុងមួយឆ្នាំពីបរទេសនោះ។
ចុះផ្សាយនៅថ្ងៃ៖
ស្តាប់ - ០១:៣០
តម្រូវការលើផលិតផលដែលធ្វើអំពីសូត្រ មានកម្រិតខ្ពស់នៅកម្ពុជា។ ប៉ុន្តែបញ្ហានៅត្រង់ថា ការផលិតសូត្រមានកម្រិតទាបនៅឡើយ។ ដោយមានសហប្រតិបត្តិការជាមួយអង្គការFAO កម្ពុជាបានបង្កើតគម្រោងមួយដើម្បីអភិវឌ្ឍដំណាំសូត្រ ហើយដែលអាចជួយរំដោះប្រជាពលរដ្ឋចេញពីភាពក្រីក្របាន។
នៅថ្ងៃព្រហស្បតិ៍ទី៧កក្កដាស្អែកនេះ សិក្ខាសាលាមួយនឹងត្រូវរៀបចំឡើងដើម្បីបង្ហាញគម្រោងនេះ។ លោកម៉ី កល្យាណទីប្រឹក្សារដ្ឋាភិបាលទទួលបន្ទុកគម្រោងស្តារឡើងវិញនៃដំណាំសូត្រជាតិបានអះអាងអោយដឹងថា ការដាំមនលើផ្ទៃដី៤០០០ហិចតាថែមទៀតនោះ វានឹងអាចឆ្លើយតបតម្រូវការរបស់កម្ពុជាដែលសព្វថ្ងៃនាំចូលសរសៃសូត្រឆៅចំនួន៤០០ តោនក្នុងមួយឆ្នាំៗពីប្រទេសវៀតណាមនិងប្រទេសចិន។ អ្នកជំនាញរូបនេះបន្តថា ការពង្រីកគម្រោងដាំមននេះ ក៏នឹងជួយចិញ្ចឹមពលរដ្ឋកម្ពុជានៅជនបទជាង ២ម៉ឺន នាក់ផងដែរ។
បច្ចុប្បន្ននេះ កម្ពុជាប្រើប្រាស់សរសៃសូត្រចំនួន ៤០០តោន ដែលនាំចូលពីបរទេសដើម្បីផលិតផលិតផលដែលធ្វើអំពីសូត្រនេះ។ កម្ពុជាខ្លួនឯងវិញ ផលិតសរសៃសូត្រមិនបាន ៥តោន ផងក្នុងមួយឆ្នាំ។ ដូច្នេះ នៅពេលណាដែលការនាំចូលមានតម្លៃខ្ពស់នោះ ផលប៉ះពាល់បានធ្លាក់មកលើអ្នកផលិតផលិតផលសូត្រ។
អ្នកសេដ្ឋកិច្ចប្រចាំអង្គការ FAO លោក Livio Valenti បានថ្លែងនៅក្នុងសេចក្តីប្រកាសព័ត៌មានថា ការអភិវឌ្ឍន៍ដំណាំសូត្រគឺ ជាមធ្យោបាយនៃការកាត់បន្ថយភាពក្រីក្រមួយ តាមរយៈការបង្កើនចំណូលដល់ពលរដ្ឋជនបទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ