ភ្នំពេញជូនដំណើរយុវជនស្ម័គ្រចិត្ត ៨០០នាក់ចូលបម្រើកងទ័ព
ពិធីជូនដំណើរយុវជនស្ម័គ្រចិត្តចំនួន ៨០០ នាក់ ដើម្បីចូលបម្រើកងទ័ព ត្រូវបានធ្វើឡើងនៅពហុកីឡាដ្ឋានជាតិអូឡាំពិក កាលពីព្រឹកថ្ងៃច័ន្ទ ទី៨សីហានេះ។ យុវជនស្ម័គ្រចិត្តទាំង ៨០០ នាក់ នៅភ្នំពេញ ស្ថិតក្នុងចំណោមយុវជនសរុបចំនួន ៥.០០០ នាក់ ដែលត្រូវបានក្រសួងការពារជាតិ ជ្រើសរើស ដើម្បីចូលបម្រើកងទ័ព នៅឆ្នាំ២០១១នេះ។
ចុះផ្សាយនៅថ្ងៃ៖
ស្តាប់ - ០២:២៤
យុវជនស្ម័គ្រចិត្តទាំង ៨០០ នាក់ នៅភ្នំពេញ ត្រូវបញ្ជូនទៅហ្វឹកហាត់នៅសាលាកងទ័ពជើងគោក នៅពេជ្រនិល និងទៅកងពលផ្ទាល់ នៅជិតសមរភូមិព្រះវិហារ។ នេះបើតាមការបញ្ជាក់របស់លោកឧត្តមសេនីយ៍ឯក ព្រំ ឌិន មេបញ្ជាការរងកងទ័ពជើងគោក និងជាមេបញ្ជាការយោធភូមិភាគពិសេស។
ក្នុងពិធីជូនដំណើរយុវជនស្ម័គ្រចិត្តទាំង ៨០០ នាក់ ឡើងឡានទៅបន្ទាយ នៅព្រឹកមិញ លោកឧត្តមសេនីយ៍ ព្រំ ឌិន បានឱ្យដឹងថា យោធភូមិភាគពិសេស បានជ្រើសកងទ័ពគ្រប់ចំនួន ១.១៥០ នាក់ តាមផែនការ។ យុវជនទាំងនោះ មកពីខេត្តកណ្តាល ចំនួន ២០០ នាក់ ខេត្តកំពង់ឆ្នាំង ១៥០ នាក់ និងទីក្រុងភ្នំពេញ ៨០០ នាក់។
តាមលោកឧត្តមសេនីយ៍ ទាហានថ្មីដែលទើបជ្រើសរើសបាន ៨០០ នាក់ សម្រាប់នៅភ្នំពេញពេលនេះ មានចំណេះវិជ្ជាខ្ពស់ ចាប់ពីថ្នាក់ឌីប្លូម និងបាក់ឌុប ដែលអាចទៅរៀននៅក្រៅប្រទេស ដើម្បីបន្តវេនទាហានចាស់ៗ ដូចជា បាញ់កាំភ្លើងធំ វេជ្ជបណ្ឌិត បើកយន្តហោះ បើករថក្រោះ និងរថពាសដែក ជាដើម។
ចំណែកលោក កែប ជុតិមា អភិបាលរាជធានីភ្នំពេញ បានកត់សម្គាល់ក្នុងពិធីជូនដំណើរយុវជនស្ម័គ្រចិត្តចូលបម្រើកងទ័ព នៅព្រឹកមិញថា ការស្ម័គ្រចិត្តរបស់យុវជនបម្រើកងទ័ព ក្នុងទ្រង់ទ្រាយធំ នៅភ្នំពេញពេលនេះ ជាលើកទី១ហើយ ក្រោយពីប្រទេសកម្ពុជា បានទទួលសន្តិភាពទាំងស្រុង នៅចុងឆ្នាំ១៩៩៨។
តាមលោកអភិបាលក្រុង បើទោះបីជាសព្វថ្ងៃ សភាពការណ៍ព្រំដែនកម្ពុជា-ថៃ បានស្ងប់ស្ងាត់ក៏ដោយ ក៏កម្ពុជាត្រូវតែពង្រឹងខឿនការពារជាតិ និងពង្រឹងសមត្ថភាពកងទ័ព។ នោះគឺកម្ពុជាត្រូវតែមានកងទ័ពមួយដែលខ្លាំងខាងសឹកសង្គ្រាម។
ក្នុងពិធីជូនដំណើរកងទ័ព នៅព្រឹកមិញ ក៏មានព្រះសង្ឃប្រោះព្រំទឹកមន្ត ចែកអំណោយ និងពាក់កម្រងផ្កាជូនដល់យុវជនបង់កក្រមា ដែលបានស្ម័គ្រចិត្តធ្វើទាហាន។ ក្នុងពិធីនៅព្រឹកមិញ ក៏ដោយមានវត្តមានរបស់កូនប្រុសលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានី ចូលរួមផងដែរ។
នៅឆ្នាំ២០១១នេះ ក្រសួងការពារជាតិកម្ពុជា ប្រកាសជ្រើសរើសកងទ័ពថ្មីនៅទូទាំងប្រទេស សរុបចំនួន ៥.០០០ នាក់ ដើម្បីជំនួសកងទ័ពកម្ពុជា ដែលបានចូលនិវត្តន៍ ពិការ និងមរណៈ។
កម្ពុជាបើក ដំណើរការជ្រើសរើសកងទ័ពថ្មី ចាប់ផ្តើមតាំងពីខែមិថុនា។ មកដល់ពេលនេះ ចំនួនកងទ័ពដែលគេបានជ្រើសរើសស្ទើរតែទទួលបានគ្រប់ចំនួន។ យុវជនស្ម័គ្រចិត្តបម្រើកងទ័ព ត្រូវបានបញ្ជូនទៅកាន់បន្ទាយដើម្បីហ្វឹកហាត់ តាមបណ្តាខេត្តនានា ជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ