កម្ពុជា និងវៀតណាមព្រមព្រៀងគ្នាចុះហត្ថលេខាលើឯកសារព្រំដែនគោក
ខណៈដែលបញ្ហាព្រំដែនជាមួយថៃកំពុងតែឡើងកំដៅ រដ្ឋាភិបាលកម្ពុជានិងវៀតណាមបានចុះហត្ថលេខាលើកិច្ចព្រមព្រៀង ស្តីពីការបោះបង្គោល និងខណ្ឌសីមាព្រំដែនគោកជាមួយគ្នា នៅល្ងាចថ្ងៃសុក្រម្សិលមិញ នៅទីក្រុងភ្នំពេញ។ កិច្ចព្រមព្រៀងដែលបានចុះហត្ថលេខានេះបានធ្វើឡើង បន្ទាប់ពីគណៈកម្មការព្រំដែនចម្រុះនៃប្រទេសទាំងពីរបានជួបប្រជុំ គ្នា រយៈពេល៣ថ្ងៃរួចមក។ កិច្ចព្រមព្រៀងនេះមានគោលដៅបង្កើនល្បឿននៃការបោះបង្គោលព្រំដែន និងខណ្ឌសីមាព្រំដែនដីគោករវាងប្រទេសទាំងពីរឱ្យបានចប់ ក្នុងឆ្នាំ២០១២ខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ប៉ែន បូណាពីទីក្រុងភ្នំពេញ
ជម្លោះព្រំដែនប៉ែកខាងលិចមិនបានបង្កការរាំងស្ទះដល់ការបោះបង្គោលព្រំដែនប៉ែកខាងកើតឡើយ។ បន្ទាប់ពីជួបប្រជុំជាមួយគ្នា រយៈពេលបីថ្ងៃមក គណៈកម្មការចម្រុះខណ្ឌសីមា និងព្រំដែនគោកកម្ពុជា និងវៀតណាមបានចុះហត្ថលេខាលើកិច្ចព្រមព្រៀងជាមួយគ្នា នៅល្ងាចថ្ងៃសុក្រ ទី២៥កុម្ភៈ នៅទីក្រុងភ្នំពេញ។
ខ្លឹមសារនៃកិច្ចព្រមព្រៀងដែលបានចុះហត្ថលេខានេះបានផ្តោតលើការឯកភាពគ្នាអំពីលទ្ធផលដែលទទួលបានក្នុងឆ្នាំ២០១០ និងផែនការសម្រាប់ធ្វើបន្តក្នុងឆ្នាំ២០១១។ កាលពីឆ្នាំ២០១០កន្លងទៅ ភាគីកម្ពុជានិងវៀតណាមបានបោះបង្គោលចំនួន ៧២ ទីតាំងស្មើនឹង ៨២ បង្គោលលើដីជាក់ស្តែង។ សាងសង់បង្គោលព្រំដែនរួចរាល់ចំនួន ៧៣ ទីតាំងស្មើនឹង ៨៨ បង្គោលលើដីជាក់ស្តែង។ ខណ្ឌសីមាព្រំដែនបានប្រវែង១៥៥ គីឡូម៉ែត្រស្មើនឹង ៣១ ភាគរយនៃផែនការ និងឯកភាពកំណត់ទីតាំងបង្គោលខណ្ឌសីមាចំនួន ៩០ បង្គោលតម្រុយ។
គណៈកម្មការចម្រុះព្រំដែនកម្ពុជា និងវៀតណាមក៏បានគូសចម្លងខ្សែព្រំដែនគោកបាន ៥០គីឡូម៉ែត្រ និងដៅបង្គោលលើផែនទីបានចំនួន ២៧ ទីតាំងស្មើនឹង ២៨ បង្គោលលើផែនទី។ រីឯលទ្ធផលដែលសម្រេចបានពីខែមិថុនាឆ្នាំ២០០៦រហូតដល់ដំណាច់ឆ្នាំ២០១០រួមមាន៖ ការបោះបង្គោលបាន ២០៧ ទីតាំងស្មើនឹង ២៥១ បង្គោលលើទីតាំងជាក់ស្តែង ឬស្មើនឹង ៦៦ ភាគរយនៃខ្សែព្រំដែនទាំងមូល។ សាងសង់បង្គោលព្រំដែនចំនួន១៧១ ទីតាំងស្មើនឹង ២១១បង្គោល។ កម្ពុជានិងវៀតណាមក៏បានខណ្ឌសីមាព្រំដែនគោកបានប្រវែង១៥៥ គីឡូម៉ែត្រ ស្មើនឹង ១២,៤ ភាគរយនៃខ្សែព្រំដែនសរុបប្រវែង ១២៧០ គីឡូម៉ែត្រ។
សម្រាប់ផែនការដែលនឹងត្រូវបន្តធ្វើក្នុងឆ្នាំ ២០១១នេះ ភាគីទាំងពីរបានឯកភាពគ្នាថានឹង បោះបង្គោលព្រំដែនគោកឱ្យបាន ១០០ បង្គោលនៅលើដីជាក់ស្តែង និងខណ្ឌសីមាព្រំដែនគោកឱ្យបាន ៥០០ គីឡូម៉ែត្រ។ កម្ពុជា ងវៀតណាមក៏គ្រោងនឹងបញ្ចប់ការដៅចំណុចបង្គោលខណ្ឌសីមាលើផែនទីឱ្យហើយរួចរាល់ ក្នុងខែមិថុនាខាងមុខ។
សូមបញ្ជាក់ថា ការចុះហត្ថលេខានេះ ខាងកម្ពុជាមានវត្តមានលោក ឡុង វិសាលោ រដ្ឋលេខាធិការក្រសួងការបរទេស និងលោក វ៉ា គឹមហុង ទេសរដ្ឋមន្ត្រី និងជាប្រធានគណៈកម្មការចម្រុះខណ្ឌសីមា និងការបោះបង្គោលព្រំដែនគោកកម្ពុជាវៀតណាម។ រីឯភាគីវៀតណាមវិញ មានលោក ហូ ស្វឹនសឺន អនុរដ្ឋមន្ត្រីក្រសួងការបរទេស និងជាប្រធានគណៈកម្មការចម្រុះខណ្ឌសីមា និងការបោះបង្គោលព្រំដែនគោកកម្ពុជាវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ