នាយករដ្ឋមន្ត្រី ហ៊ុន សែន ចាត់ទុកការរួបរួមរវាងសមរង្ស៊ី និងកឹមសុខាជាព្យុះក្នុងក្អម
ទីបំផុតទៅ នៅថ្ងៃពុធនេះ លោកនាយករដ្ឋមន្ត្រី ហ៊ុន សែន បានបញ្ចេញប្រតិកម្មលើការរួបរួមរវាងលោកសមរង្ស៊ី និងលោក កឹមសុខា ដើម្បីឈានទៅបង្កើតគណបក្សថ្មីមួយ ដើម្បីប្រកួតប្រជែងការបោះឆ្នោត នៅឆ្នាំ២០១៣ ជាមួយគណបក្សប្រជាជនកម្ពុជា របស់លោកនាយករដ្ឋមន្ត្រីហ៊ុនសែន។ តាមលោកនាយករដ្ឋមន្ត្រី ការរួបរួមនោះ គ្រាន់តែជាខ្យល់ព្យុះនៅក្នុងក្អម ដែលមិនមានផលប៉ះពាល់អ្វីដល់គណបក្សប្រជាជនកម្ពុជា ដែលកំពុងកាន់អំណាចឡើយ។ នៅព្រឹកថ្ងៃពុធនេះ លោកនាយករដ្ឋមន្ត្រី ក៏បានប្រកាសថា ករណីចាប់ខ្លួនលោកម៉មសូណង់ដូ គឺរដ្ឋាភិបាល មិនមានគម្រោងបិទការផ្សាយវិទ្យុសំបុកឃ្មុំ FM 105 មេហ្គាហឺតរបស់លោកទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ក្នុងពិធីចែកសញ្ញាប័ត្រដល់និស្សិតសាលាច្បាប់ នាព្រឹកថ្ងៃពុធនេះ លោកនាយករដ្ឋមន្ត្រី ហ៊ុន សែន បានប្រកាសថា ការរួបរួមរវាងគណបក្សសមរង្ស៊ី និងគណបក្សសិទ្ធិមនុស្ស របស់លោក កឹមសុខា ប្រៀបដូចជា ព្យុះក្នុងក្អម ដែលមិនមានផលប៉ះពាល់អ្វីដល់គណបក្សប្រជាជនកម្ពុជា ដែលកំពុងកាន់អំណាចរបស់លោកទេ។
លោកនាយករដ្ឋមន្ត្រី អះអាងថា គណបក្សប្រជាជនកម្ពុជា ក៏ដូចរូបលោកមិនខ្លាចញញើត នឹងការរួបរួមរវាងលោកសមរង្ស៊ី និងលោកកឹមសុខា ក្នុងចលនាប្រជាធិបតេយ្យសង្គ្រោះជាតិ នោះឡើយ។ មិនត្រឹមតែមិនខ្លាចរអា តែលោកនាយករដ្ឋមន្ត្រីនៅព្រឹកមិញ ក៏បានរិះគន់ដល់សម្ព័ន្ធភាពគណបក្សប្រឆាំងនោះ ហើយជំរុញឲ្យមេដឹកនាំគណបក្សជួយខ្លួនឯងពិសេសក្នុងរឿងផ្ទាល់ខ្លួនថែមទៀតផង។
ទោះជាគណបក្សប្រឆាំង សមរង្ស៊ី និងគណបក្សសិទ្ធិមនុស្ស ចាប់ដៃគ្នា ក៏លោកនាយករដ្ឋមន្ត្រី លើកឡើងថា មិនអាចទទួលសំឡេងឆ្នោត ឈ្នះគណបក្សប្រជាជនកម្ពុជា ដូចការគិតគូររបស់មេដឹកនាំគណបក្សប្រឆាំងឡើយ។ អំពីការចាប់ខ្លួន លោក ម៉ម សូណង់ដូ ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ FM 105 MHz ក៏ត្រូវបានលោកនាយករដ្ឋមន្ត្រី ហ៊ុន សែន ប្រកាសថា ករណីនោះ ជារឿងកំហុសឆ្គងរបស់លោកម៉មសូណង់ដូ ដោយរដ្ឋាភិបាល មិនមានផែនការដើម្បីបិទវិទ្យុសំបុកឃ្មុំ ដែលជាសំឡេងរិះគន់រដ្ឋាភិបាលនោះទេ។
ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា នៅសាលាច្បាប់ នាព្រឹកមិញ លោកនាយករដ្ឋមន្ត្រី ក៏បានប្រកាសពីការយល់ព្រម និងត្រៀមខ្លួន ចូលបំភ្លឺដោយផ្ទាល់មាត់ ក្នុងកិច្ចប្រជុំរដ្ឋសភា ដើម្បីឆ្លើយតបនឹងសំណួររបស់អ្នកតំណាងរាស្ត្រគណបក្សសមរង្ស៊ី ជុំវិញរឿងព្រំដែនកម្ពុជា និងវៀតណាម។ រឿងព្រំដែននោះ គណបក្សប្រឆាំង ចោទប្រកាន់ថា រដ្ឋាភិបាលកាត់ដីឲ្យវៀតណាម។ លោកនាយករដ្ឋមន្ត្រី ត្រូវការ ៤ ម៉ោង ដើម្បីពន្យល់ដល់រដ្ឋសភា និងស្នើឲ្យមានការផ្សាយបន្តផ្ទាល់តាមកញ្ចក់ទូរទស្សន៍ផងដែរ។
លោកនាយករដ្ឋមន្ត្រី នៅព្រឹកមិញ ក៏បានលើកឡើងពីបេសកកម្មរបស់ក្រុមយុវជនស្ម័គ្រចិត្ត ដែលបានចុះវាស់វែង ចែកដីដល់ប្រជាពលរដ្ឋ។ ក្រុមយុវជនទាំងនោះ ត្រូវបានលោកនាយករដ្ឋមន្ត្រី អះអាង ពួកគេមានភារកិច្ចត្រឹមតែវាស់វែង ចែកដីដល់ប្រជាពលរដ្ឋ នៅលើដី ដែលមិនមានទំនាស់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ