អាជ្ញាធរហាមសមាជិកសមាគមអ្នកប្រជាធិបតេយ្យមិនឲ្យប្រមូលញត្តិគាំទ្រដោះលែងលោកម៉ម សូណង់ដូ
បន្ទាប់ពីធ្វើពិធីបួសួងតាមបែបព្រះពុទ្ធសាសនារួចរាល់ សមាជិកសមាគមអ្នកប្រជាធិបតេយ្យនៅទូទាំងប្រទេសកម្ពុជាបានចាប់ផ្តើមដើរប្រមូលស្នាមមេដៃដើម្បីជាញាត្តិដាក់ទៅរដ្ឋាភិបាលឲ្យដោះលែងលោកម៉ម សូណង់ដូប្រធានសមាគមន៍អ្នកប្រជាធិបតេយ្យនិងនាយកវិទ្យុសំបុកឃ្មុំដែលកំពុងឃុំខ្លួនក្នុងពន្ធនាគារព្រៃសឲ្យមានសេរីភាពវិញ ត្រូវបានអាជ្ញាធរធ្វើការឃាត់ខ្លួន និងហាមឃាត់មិនឲ្យបន្តសម្មភាព។ សកម្មភាពនោះតាមគម្រោងរបស់សមាគមគឺគ្រោងធ្វើរយៈពេល១សប្តាហ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
សមាជិកសមាគមអ្នកប្រជាធិបតេយ្យដែលបានដើរប្រមូលស្នាមមេដៃដើម្បីធ្វើញាត្តិយកទៅដាក់ឲ្យរដ្ឋាភិបាលធ្វើការដោះលែងលោកម៉ម សូណង់ដូប្រធានសមាគមន៍អ្នប្រជាធិបតេយ្យនិងនាយកវិទ្យុសំបុកឃ្មុំដែលកំពុងឃុំខ្លួនក្នុងពន្ធនាគារព្រៃស ដែលបានចោទប្រកាន់ថានៅពីក្រោយជម្លោះដីធ្លីនៅក្នុងភូមិប្រមា ឃុំកំពង់ដំរី ស្រុកឆ្លូង ខេត្តក្រចេះ នោះត្រូវបានអាជ្ញាធរខេត្តធ្វើការហាមឃាត់។
ពលរដ្ឋដែលជាសមាជិកសមាគមអ្នកប្រជាធិបតេយ្យនៅក្នុងខេត្តចំនួនដែលត្រូវបានអាជ្ញាធរធ្វើការហាមឃាត់និងឃាត់មិនឲ្យដើរប្រមូលស្នាមមេដៃគាំទ្រដើម្បីធ្វើជាញាត្តិស្នើឲ្យរដ្ឋាភិបាល ដោះលែងលោកម៉ម សូណង់ដូឲ្យមានសេរីភាពវិញ មានដូចជាខេត្តកណ្តាល ខេត្តតាកែវ ក្រចេះនិងខេត្តព្រៃវែង។
សមាជិករបស់សមាគមដែលគាំទ្រលោកម៉ម សូណង់ដូទាំងនោះត្រូវបានអាជ្ញាធរប៉ូលីស និងអភិបាលស្រុកបានហាមឃាត់មិនឲ្យធ្វើការដើរប្រមូលស្នាមមេដៃនៅតាមផ្ទះពលរដ្ឋរឺក៍នៅតាមទីប្រជុំជននោះទេ ដោយអាជ្ញាធរបានសំអាងថាជាសកម្មភាពខុសច្បាប់និងធ្វើឲ្យប៉ះពាល់សណ្តាប់ធ្នាប់សារណៈ។
លោកខាន់ ប៉ិច អាយុ ៥៤ ឆ្នាំ នៅក្នុងឃុំព្រែកហ្លួង ស្រុកខ្សាចកណ្តាល ខេត្តកណ្តាលត្រូវបានប៉ូលីសរដ្ឋបាលឃុំព្រែកហ្លួងធ្វើការឃាត់ខ្លួននិងហាមមិនឲ្យធ្វើសកម្មភាពបន្តទៀតនោះបានឲ្យដឹងថា មូលហេតុដែលលោកដើរប្រមូលស្នាមមេដៃប្រជាពលរដ្ឋនោះគឺដើម្បីយកទៅធ្វើជាញាត្តិស្នើសុំទៅរដ្ឋាភិបាលឲ្យដោះលែងលោកម៉ម សូណង់ដូ។ ហើយការដែលលោកដើរប្រមូលស្នាមមេដៃនោះគឺពុំមានការចាប់បង្ខំនោះទេគឺពលរដ្ឋទាំងអស់ស្ម័គ្រចិត្តដោយខ្លួនឯង។ លោកថា អាជ្ញាធរបានប្រាប់ថាការឃាត់ខ្លួននោះគឺធ្វើតាមបញ្ជាររបស់លោកអភិបាលស្រុកនិងលោកអភិការស្រុក។
គម្រោងរបស់សមាគមរបស់អ្នកប្រជាធិបតេយ្យនិងដើរប្រមូលស្នាមមេដៃពលរដ្ឋដែលគាំទ្រលោកម៉ម សូណង់ដូរទូទាំងប្រទេសមានរយៈពេលមួយសប្តាហ៍ដោយចាប់ផ្តើមថ្ងៃទី២៤ ខែកក្កដា រហូតដល់ថ្ងៃទី៣០កក្កដា បន្ទាប់មកពួកគេនឹងយកញាត្តិនោះទៅដាក់ទៅតាមបណ្តារស្ថានទូតនានាប្រចាំនៅប្រទេសកម្ពុជានិងស្ថាប័នរដ្ឋាភិបាល។
កាលពីថ្ងៃទី២៣ ខែកក្កដា សមាជិកសមាគមអ្នកប្រជាធិបតេយ្យប្រមាណជា១០០នាក់មកពីខេត្តមួយចំនួនបាននាំគ្នាមកធ្វើពិធីបួងសួងនៅខាងមុខព្រះអង្គដងកើ ដើម្បីបន្ទាន់ចិត្តរដ្ឋាភិបាលឲ្យដោះលែងលោកម៉ម សូណង់ដែលកំពុងឃុំខ្លួនក្នុងពន្ធនាគារព្រៃស ពាក់ព័ន្ធទៅនឹងបទចោទដ៏ចម្រូងចម្រាស់រឿងជម្លោះដីធ្លីនៅក្នុងភូមិប្រមា។
នៅខណៈពលរដ្ឋនាំគ្នាដើរប្រមូលស្នាមមេដៃដើម្បីធ្វើជាញ្ញត្តទៅរដ្ឋាភិបាលឲ្យដោះលែងលោកប្រធានសមាគមនោះ លោក សុខ សំអឿន មេធាវីការពារលោកម៉ម សូណង់ដូនិងជានាយកប្រតិបត្តិអង្គការក្រុមអ្នកច្បាប់ការពារសិទ្ធិមនុស្ស បានឲ្យដឹងថានៅពេលនេះលោកកំពុងតែរៀបចំសំណុំឯកសារដើម្បីដាក់ស្នើរទៅតុលាការសុំធានាឲ្យរូបគាត់នៅក្រៅឃុំ។ ហើយឯកសារនេះអាចនឹងដាក់នៅសប្តាហ៍ក្រោយនេះ។
លោក ម៉ម សូណង់ដូ ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ត្រូវបានប៉ូលិសចាប់ខ្លួនកាលពីថ្ងៃទី១៥ កក្កដា បន្ទាប់ពីរូបលោកបានវិលត្រឡប់មកពីបរទេសរយៈពេលបីថ្ងៃ ដោយសាលាដំបូងរាជធានីភ្នំពេញបានសម្រេចឃុំខ្លួននៅពន្ធនាគារព្រៃសក្រោមការចោទប្រកាន់ពីបទផ្ដួចផ្ដើមគំនិតប្រឆាំងអ្នករាជការសាធារណៈ ធ្វើកុបកម្មជ្រៀតជ្រែកខុសច្បាប់នៅក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋកាន់អាវុធខុសច្បាប់ និងប្រឆាំងនឹងអាជ្ញាធរស្របច្បាប់ ដែលមានចែងក្នុងមាត្រា មួយចំនួននៃក្រមព្រហ្មទណ្ឌ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ