ការបោះឆ្នោតសភាប្រកបដោយភាពប្រផុតប្រផើយ
ថ្ងៃនេះបណ្តាជនអូស្ត្រាលី ត្រូវបានអញ្ជើញឲ្យទៅធ្វើការបោះឆ្នោតសភា ដែលមានលក្ខណៈប្រកួតប្រជែងជាពិសេសតែម្តង។ ការិយាល័យបោះឆ្នោតបានបិទទ្វារហើយ ការស្ទាបស្ទង់លទ្ធផលក្រោយការបោះឆ្នោតបានបង្ហាញថាគណបក្សពលកររបស់លោកស្រី នាយករដ្ឋមន្ត្រី មានសំឡេងនាំមុខគណបក្សសេរីនិយម ដែលជាបក្សប្រឆាំងយ៉ាងតិចតួចបំផុត។ នេះអាចចាត់ទុកថាលើកទីមួយហើយ ចាប់តាំងពី៧០ឆ្នាំមក ដែលគណបក្សធំមួយអាចឈ្នះឆ្នោត ដោយប្រផុតប្រផើយយ៉ាងដូច្នេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
នៅពេលដែលការិយាល័យបោះឆ្នោតក្នុងរដ្ឋប៉ែកខាងកើតប្រទេស បានបិទ គណបក្សពលករ ដឹកនាំដោយ នាយករដ្ឋមន្ត្រីភេទស្រីទីមួយអូស្ត្រាលី គឺលោកស្រី ជូលីយ៉ា ហ្គីឡាដ ទំនងជានឹងអាចទទួលបានសំឡេងឆ្នោតប្រមាណ ៥១ ទៅ៥២% និង ពី៤៨ ទៅ៤៩% សម្រាប់បក្សសេរីនិយមរបស់លោក ថូនី អ៊ែបត ដែលជាបក្សប្រឆាំង។ នេះបើយោងតាមការស្ទាបស្ទង់លទ្ធផល របស់សារព័ត៌មាន Sydney Morning Herald និងThe Age ។
លទ្ធផលនាំមុខដ៏តិចតួចបែបនេះ បានធ្វើអ្នកស្ទាបស្ទង់មតិមានការប្រុងប្រយ័ត្នយ៉ាងខ្លាំង ព្រោះវាអាចប្តូរផ្លាស់ជ័យជំនះបានក្នុងមួយប៉ប្រិចភ្នែកប៉ុណ្ណោះ។ អ្នកយុទ្ធសាស្ត្រម្នាក់របស់បក្សពលករ ដែលកំពុងកាន់អំណាច លោក គ្រិស បោវេន Chris Bowen បានថែមទាំងបញ្ជាក់ថា លទ្ធផលប្រកៀកប្រកិត មិនប្រាកដប្រជាមែនទែន រហូតអាចប្រែក្រឡាស់អ្នកឈ្នះមកចាញ់ និងអ្នកចាញ់មកឈ្នះវិញក៏ថាបាន។ សេណារីយ៉ូណាអ្វីក៏អាចទៅរួចបានដែរ។
បើគណបក្សពលករមិនអាចរកសំឡេងគាំទ្រដាច់ខាត (៧៦អាសនៈ)សម្រាប់បង្កើតរដ្ឋាភិបាលបានដោយឯកឯងទេ នោះគេត្រូវរកចងសម្ព័ន្ធភាពជាមួយនឹងសមាជិកសភាឯករាជ្យផ្សេងទៀត ឬជាមួយសមាជិកសភាអ្នកបរិស្ថាន។ ការចងសម្ព័ន្ធភាពបែបនេះនឹងធ្វើឲ្យគម្រោងកំណែទម្រង់សន្យាក្នុងពេលឃោសនាបោះឆ្នោតខ្លះមិនអាចចេញរួច មានជាអាទិ៍ការយកពន្ធលើធនធានរ៉ែ។ សេណារីយ៉ូមួយទៀត គឺក្នុងករណីមិនអាចបង្កើតរដ្ឋាភិបាល បាន នោះនឹងជំរុញឲ្យមានការរៀបចំបោះឆ្នោតសាជាថ្មីម្តងទៀត។
សម្រាប់លោកស្រី ជូលីយ៉ា ហ្គីឡាដ (Julia Gillard)ដែលទើបបានឡើងកាន់តំណែងជានាយករដ្ឋមន្ត្រីអូស្ត្រាលី កាលពីខែមិថុនា តាមរយៈការឡើងធ្វើប្រមុខបក្សពលករ និងលោកថូនី អ៊ែបត (Tony Abbott) ប្រធានគណបក្សសេរីនិយម នេះជាលើកមួយហើយ ដែលអ្នកទាំងពីរក្លាយជាអ្នកដឹកនាំបក្សទៅកាន់ហិបឆ្នោត នៅថ្ងៃនេះ ដើម្បីក្លាយជារដ្ឋាភិបាលមួយប្រសូតចេញពីការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ