អ៊ុងសាន់ស៊ូជីអំពាវនាវការផ្សះផ្សាជាតិនៅទីក្រុងអូស្លូ
ប្រមុខបក្សប្រឆាំងភូមាលោកស្រី អ៊ុងសាន់ស៊ូជីនៅថ្ងៃសៅរ៍១៦មិថុនាម្សិលមិញ បានសន្យាថានឹងបន្តការប្រយុទ្ធតស៊ូរបស់ខ្លួនជាបន្តទៀតដើម្បីជំរុញឲ្យភូមាមានលទ្ធិប្រជាធិបតេយ្យពេញលេញ-នេះជាសេចក្តីថ្លែងរបស់លោកស្រីស៊ូជីនៅឱកាសទទួលរង្វាន់ណូបែលសន្តិភាពនៅទីក្រុង Oslo។ រង្វាន់ណូបែលដែលគេបានប្រកាសផ្តល់ជូនលោកស្រីតាំងពីឆ្នាំ១៩៩១។ ប៉ុន្តែលោកស្រីមិនអាចចេញមកក្រៅប្រទេសបាន ដោយភូមាជំនាន់នោះស្ថិតនៅក្រោមការក្តោបក្តាប់នៃរបបសឹក។ ក្រោមស្នូរទះដៃយ៉ាងកងរំពងពីសំណាក់អ្នកចូលរួមក្នុងពិធីប្រគល់រង្វាន់ណូបែលនេះ លោកស្រីស៊ូជីបានថ្លែងទៀតថា “លោកស្រីនឹងខិតខំប្រឹងប្រែងអស់ពីសមត្ថភាពដើម្បីការផ្សះផ្សាជាតិនៅក្នុងប្រទេសរបស់លោកស្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៦
នៅថ្ងៃសៅរ៏១៦មិថុនាម្សិលមិញ នាឱកាសទទួលរង្វាន់ណូបែលសន្តិភាពនៅទីក្រុង Osloប្រទេស Norvège លោកស្រីអ៊ុងសាន់ស៊ូជីប្រកបដោយទឹកចិត្តដ៏រំភើបខ្លាំងបានថ្លែងថា “បក្សរបស់លោកស្រី គឺសម្ព័ន្ធជាតិដើម្បីលទ្ធិប្រជាធិបតេយ្យនិងរូបគាត់ផ្ទាល់ បានត្រៀមខ្លួនជា ស្រេចប្រកបដោយឆន្ទៈមោះមុត ដើម្បីដើរតួនាទីគ្រប់យ៉ាងនៅក្នុងដំណើរការផ្សះផ្សាជាតិ”។
លម្អដោយផ្កាសៀតនៅលើភ្នួងសក់និងមានសម្លៀកបំពាក់ជាប្រពៃណីរបស់ភូមាជាមួយនឹងក្រមាបង់កពណ៌ផ្កាត្របែកព្រៃលោកស្រីស៊ូជីដែលគេប្រសិទ្ធិនាមឲ្យថា “វីរនារី នៃទីក្រុងរ៉ង់ហ្គូន” បានទទួលការទះដៃអបអរសាទរយ៉ាងខ្លាំងក្លាពីសំណាក់បណ្តាឥស្សរជននិងប្រជាជនភូមាមួយចំនួនដែលជាអ្នកភៀសខ្លួនមករស់នៅក្រៅប្រទេសបានមកជួបជុំគ្នានៅទីមហាសាលដ៏ធំមួយនៃទីក្រុងអូស្លូនេះ។ នៅឱកាសនោះ លោកស្រីស៊ូជី បានរំលឹកជាថ្មីថា”គាត់មានជំហរសុទិដ្ឋិនិយមតែប្រកបដោយភាពប្រុងប្រយ័ត្ន” ក្នុងខណៈដែលប្រទេសភូមាកំពុងបោះជំហានទៅរកលទ្ធិប្រជាធិបតេយ្យ។ ភូមា បច្ចុប្បន្នដឹកនាំដោយលោកប្រធានាធិបតីថេនសេន អតីតមេយោធាដែលបានបង្កើតរដ្ឋាភិបាលមួយដែលលោកស្រីស៊ូជី វាយតម្លៃថា នៅពុំទាន់មានលក្ខណៈជាស៊ីវិលពេញលេញនៅឡើយទេ។
ម្យ៉ាងទៀត លោកស្រីស៊ូជី បានសង្កត់ធ្ងន់ដែរទៅលើអំពើហិង្សាដែលនៅតែកើតមានជាបន្តនៅភូមាថ្វីដ្បិតតែរដ្ឋាភិបាលថ្មី បានចុះហត្ថលេខាលើបទឈប់បាញ់គ្នា ជាមួយក្រុមឧទ្ទាមជនជាតិភាគតិចមួយចំនួនធំក៏ដោយក្តី។ ត្រង់នេះ លោកស្រីប្រធានបក្សប្រឆាំង ចង់និយាយសំដៅទៅលើ បញ្ហាជម្លោះរវាងសហគមន៍អ្នកកាន់ព្រះពុទ្ធសាសនានិងសហគមន៍អ្នកកាន់សាសនាអ៊ីស្លាមដែលមានចំនួនភាគតិចនៅក្នុងប្រទេស។ ជម្លោះដ៏កាចសាហាវរវាងសហគមន៍សាសនាទាំងពីរនេះដែលស្ថិតនៅប៉ែកខាងលិចប្រទេស បានសម្លាប់មនុស្សយ៉ាងតិច៥០នាក់ចាប់តាំងពីថ្ងៃ២៨ឧសភាមក-នេះជាការរំលឹករបស់លោកស្រីស៊ូជី។
ទន្ទឹមនេះ លោកស្រីជ័យលាភីរង្វាន់ណូបែលសន្តិភាពក៏មិនភ្លេចដែរ អំពីបញ្ហាអ្នកទោសនយោបាយភូមាដោយបានអំពាវនាវសហគមន៍អន្តរជាតិសុំឲ្យជួយធ្វើអន្តរាគមន៍ដើម្បី ឲ្យរបបភូមាធ្វើ ការដោះលែងពួកអ្នកទោសនយោបាយដោយគ្មានលក្ខខណ្ឌ។
បន្ទាប់ពីពិធីនេះ លោកស្រីស៊ូជី បានអញ្ជើញទៅទស្សនា ការតាំងពិព័រណ៌នៅសារមន្ទីរមួយដែលគេឧទ្ទិសចំពោះលោកស្រី ស៊ូជីក្រោមឈ្មោះថា” មាតាប្រជាធិបតេយ្យ”។ ចំពោះលោក John Peder Egenaes អ្នកតំណាងរបស់អង្គការការពារសិទ្ធិមនុស្សអន្តរជាតិ Amnesty Internationalនៅប្រទេសណ័រវែរ លោកស្រីស៊ូជី គឺជាបុគ្គលគំរូមួយរូបសំរាប់មនុស្សទូទៅនៅក្នុងការងារដើម្បី ជួយទ្រទ្រង់ការពារសិទ្ធិមនុស្សនៅក្នុងពិភពលោក។
សូមបញ្ជាក់ថានៅក្នុងដំណើរទស្សនកិច្ចនៅអឺរ៉ុបជាលើកដំបូងក្នុងរយៈពេល២៤ឆ្នាំចុងក្រោយនេះ លោកស្រីស៊ូជី នឹងត្រូវអញ្ជើញទៅកាន់ប្រទសអង់គ្លេស អៀរឡង់និងបារាំងទៀត បន្ទាប់ពីប្រទេសស្វីសនិងប្រទេសណ័រវែររួចមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ