អំពើភេរវកម្មបំផ្ទុះរថយន្តលើអគ្គស្នងការដ្ឋានប៉ូលីសចំកណ្តាលបេះដូងទីក្រុងដាម៉ាស
នៅថ្ងៃអាទិត្យ ទី៧ តុលាម្សិលមិញ មានអំពើភេរវកម្មថ្មីវាយប្រហារលើអគ្គស្នងការប៉ូលីសចំកណ្តាលបេះដូងទីក្រុងដាម៉ាស។ អំពើភេរវកម្មរបៀបនេះបាននិងកំពុងបន្តកើតមានក្នុងប្រទេសស៊ីរី និងដែលជាស្នាដៃរបស់ក្រុមភេរវនិយមចំនួនពីរស្និទ្ធនឹងអង្គការអាល់កៃដា។ រីឯប្រទេសកាតា និងអារ៉ាប៊ីសាអូឌីតបានបញ្ជាក់ជាថ្មីម្តងទៀតនាចុងសប្តាហ៍នេះ ថាពួកគេមិនមែនជាអ្នកបញ្ជូនអាវុធធុនធ្ងន់ទៅឲ្យក្រុមអ្នកប្រឆំាងនៅក្នុងប្រទេសស៊ីរីទេ។
ចុះផ្សាយនៅថ្ងៃ៖
ស្តាប់ - ០១:១៦
អំពើភេរវកម្មបំផ្ទុះរថយន្តលើអគ្គស្នងការប៉ូលីសចំកណ្តាលបេះដូងទីក្រុងដាម៉ាសបានកើតមានឡើង ២សប្តាហ៍ ក្រោយពីមានអំពើភេរវកម្មអត្តឃាតប្រឆំាងនឹងសេនាធិការដ្ឋានយោធា។ នេះសបញ្ជាក់ឲ្យឃើញថា គ្មានស្ថានប័នយោធា និងសន្តិសុខណាមួយរបស់របបស៊ីរីបច្ចុប្បន្នអាចរួចផុតពីការវាយប្រហាររបស់ពួកឧទ្ទាមឡើយ។ ពួកឧទ្ទាមដែលមានគ្រប់មធ្យោបាយ ទំាងធនធានមនុស្ស និងពស្តុភារដែលអនុញ្ញាតឲ្យពួកគេបើកការវាយប្រហារចំកណ្តាលបេះដូងទីក្រុងដាម៉ាស ពេលណា ក៏បាន មិនគិតយប់ ឬថ្ងៃទេ។
ឥទ្ធិពលនៃអំពើភេរវកម្មបំផ្ទុះរថយន្តលើអគ្គស្នងការប៉ូលីសក្នុងទីក្រុងដាម៉ាសកាលពីយប់ថ្ងៃអាទិត្យ បានលាន់ឮរហូតដល់រាប់សិបគីឡូម៉ែត្រ និងបណ្តាលឲ្យផ្ទុះបែកកញ្ចក់អាគារនៅព័ទ្ធជុំវិញ។ ប្រជាជនរស់ក្នុងតំបន់នោះបានរៀបរាប់ថា អំពើភេរវកម្មបានបង្កឡើងដោយជនអត្តឃាតម្នាក់ដែលបានបើកឡានចូលទៅក្បែរអគ្គស្នងការប៉ូលីស រួចបានទាញបំផ្ទុះគ្រឿងផ្ទុះនៅក្នុងរថយន្តនោះ។ បន្ទាប់មក ក៏មានអន្តរាគមន៍បាញ់រះយ៉ាងគំហុគពីគ្នីគ្នាគេបន្ថែមទៀត។
ជាទូទៅ អំពើភេរវកម្មរបៀបនេះត្រូវបានចលនារណសិរ្យអាល់ណូស្រា ( Front al-Nosra ) និងចលនាប្រមូលផ្តុំសកម្មជនអ៊ីស្លាម ( Tajamo Ansar al-islam ) ប្រកាសទទួលស្គាល់ជាស្នាដៃរបស់ខ្លួន។ គឺជាចលនាដែលស្និតនឹងអង្គការអាល់កៃដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ