ទស្សនកិច្ចតំណាងការទូតអឺរ៉ុប កាថឺរីន អាស្ហតុន នៅអ៊ីរ៉ង់
នៅថ្ងៃអាទិត្យនេះ ក្នុងពេលបំពេញទស្សនកិច្ចនៅអ៊ីរ៉ង់ តំណាងការទូតអឺរ៉ុប លោកស្រី កាថឺរីន អាស្ហតុន Catherine Ashton បានលើកឡើងថា កិច្ចចរចាសំណុំរឿងនុយក្លេអ៊ែរជាមួយអ៊ីរ៉ង់ មិនអាចនឹងធានាថាផ្តល់ភាពជោគជ័យ សម្រាប់កិច្ចព្រមព្រៀងចុងក្រោយនោះទេ។ ប៉ុន្តែភាគីចរចាត្រូវតែកំណត់ទិសដៅថា នឹងសម្រេចអោយបាននូវកិច្ចព្រមព្រៀងចុងក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
តាំងពីថ្ងៃសៅរ៍ម្សិលមិញ តំណាងការទូតអឺរ៉ុប លោកស្រី កាថឺរីន អាស្ហតុន Catherine Ashton បានចុះទៅបំពេញទស្សនកិច្ចនៅអ៊ីរ៉ង់ ដើម្បីពិភាក្សាជាមួយរដ្ឋាភិបាលអ៊ីរ៉ង់ ពីទំនាក់ទំនងរវាងសហភាព អឺរ៉ុប និងពីសំណុំរឿងនុយក្លេអ៊ែរអ៊ីរ៉ង់។ លោកស្រីអាស្ហតុន បានជួបជាមួយលោក ចាវ៉ាដ ហ្សារីហ្វ តំណាងផ្នែកចរចានុយក្លេអ៊ែរអ៊ីរ៉ង់។ តំណាងការទូតអឺរ៉ុបលើកឡើងថា ការចរចាសំណុំរឿងនុយក្លេអ៊ែរអ៊ីរ៉ង់ រវាងអ៊ីរ៉ង់ និងប្រទេសមហាអំណាច៥+១ មានបារាំង អាមេរិក អង់គ្លេស រុស្ស៊ី ចិន និងអាល្លឺម៉ង់នោះ មិនអាចនឹងធានាថា ផ្តល់ភាពជោគជ័យសម្រាប់កិច្ចព្រមព្រៀងចុងក្រោយនោះទេ។ សម្រាប់លោកស្រីអាស្ហតុន ការចរចានេះ មានដំណើរការពិបាកណាស់ ប៉ុន្តែ ភាគីចរចាទាំងអស់ បានសម្រេចថា ត្រូវតែសម្រេចចេញអោយបាននូវកិច្ចព្រមព្រៀងចុងក្រោយមួយ។
គួររំលឹកឡើងវិញថា កាលពីខែវិច្ឆិកា ឆ្នាំ២០១៣ អ៊ីរ៉ង់និងប្រទេសមហាអំណាច៥+១ បានសម្រេចចេញកិច្ចព្រមព្រៀងបណ្តោះអាសន្នមួយ សម្រាប់រយៈពេល៦ខែ តំរូវអោយអ៊ីរ៉ង់ព្យួរចោលរាល់សកម្មភាពនុយក្លេអ៊ែរ ជាការផ្តោះប្តូរជាមួយការបន្ធូរបន្ថយទណ្ឌកម្មពីបណ្តាប្រទេសលោកខាងលិច។ ប្រទេសលោកខាងលិចតែងសង្ស័យអ៊ីរ៉ង់ថា ចង់ប្រើកម្មវិធីនុយក្លេអ៊ែរស៊ីវិល ដើម្បីផលិតគ្រាប់បែកបរមាណូ។ បណ្តាប្រទេសលោកខាងលិចបានសុំអោយអ៊ីរ៉ង់បិទចោលនូវទីតាំងនុយក្លេអ៊ែរពីកន្លែង គឺទីតាំងចម្រើនធាតុអ៊ុយរ៉ានីញ៉ូម ឈ្មោះថា ហ្វ៊រដូ និងមជ្ឈមណ្ឌលទឹកធ្ងន់ អារ៉ាក់។ ប៉ុន្តែ អ៊ីរ៉ង់បិដសេធ និងប្រាប់វិញថា ត្រៀមខ្លួនចាត់វិធានការដើម្បីធានាថា អ៊ីរ៉ង់មិនបង្វែរកម្មវិធីនុយក្លេអ៊ែរស៊ីវិល អោយបម្រើប្រយោជន៍យោធានោះទេ។
ក្នុងទស្សនកិច្ចនៅអ៊ីរ៉ង់ ចុងសប្តាហ៍នេះដែរ លោកស្រីអាស្ហតុន ក៏បានពិភាក្សាពីបញ្ហាស៊ីរី និងបញ្ហាសិទ្ធិមនុស្សនៅអ៊ីរ៉ង់ជាមួយរដ្ឋាភិបាលអ៊ីរ៉ង់ផងដែរ។ ទាក់ទងនឹងសិទ្ធិមនុស្ស ប្រទេសលោកខាងលិចធ្លាប់រិះគន់អ៊ីរ៉ង់ដែលតែងសម្រេចអោយមានការកាត់ទោសប្រហារជីវិត និងដាក់ពន្ធនាគារបណ្តាសកម្មជនប្រឆាំងនយោបាយ ជាច្រើនញយដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ