យោធាបរទេស៤ប្រទេសមកធ្វើសមយុទ្ធយោធានៅកម្ពុជា
យោធាបរទេសរួមមានអាមេរិក ឥណ្ឌូណេស៊ី ម៉ាឡេស៊ី និងនេប៉ាល់បានមកដល់កម្ពុជាហើយ ដើម្បីត្រៀមចូលរួមក្នុងសមយុទ្ធយោធារយៈពេលជាង១០ថ្ងៃ ចាប់ពីថ្ងៃទី១៨ឧសភាខានស្អែកនេះ។ អ្នកនាំពាក្យក្រសួងការពារជាតិកម្ពុជាបានប្រាប់អោយដឹងថា នេះគឺជាសមយុទ្ធផ្នែកមនុស្សធម៌ ឈ្មោះឆ្មាំអង្គរដែលកម្ពុជាធ្លាប់បានធ្វើជាម្ចាស់ផ្ទះម្តងរួចមកហើយកាលពីឆ្នាំកន្លងទៅ។
ចុះផ្សាយនៅថ្ងៃ៖
ស្តាប់ - ០១:៤០
ឆ្មាំអង្គរគឺជាឈ្មោះសមយុទ្ធយោធាដែលកម្ពុជាធ្វើជាម្ចាស់ផ្ទះជាលើកទី២នៅឆ្នាំនេះ។ ជាសមយុទ្ធក្នុងទម្រង់អន្តរជាតិដោយមានការចូលរូមពីយោធាបរទេសចំនួន៤ប្រទេសផ្សេងទៀត។ មានយោធាសរុបទាំងអស់ចំនួនជាង៥០០នាក់ រួមទាំងកងយោធពលខេមរភូមិន្ទផង។ យោធាបរទេសរួមមាន អាមេរិក ឥណ្ឌូណេស៊ី ម៉ាឡេស៊ី និងនេប៉ាល់ ដែលក្នុងចំណោមនោះយោធាអាមេរិកមានជាង២០០នាក់។ សមយុទ្ធនេះនឹងមានរយៈពេលប្រមាណ១០ថ្ងៃ ចាប់ពីថ្ងៃទី១៨ឧសភានេះទៅ។
អ្នកនាំពាក្យក្រសួងការពារជាតិ លោកឧត្តមសេនីយឯក ឈុំ សុជាតិបានថ្លែងប្រាប់វិទ្យុបារាំងអន្តរជាតិនៅថ្ងៃនេះថា សមយុទ្ធឆ្នាំអង្គរនឹងត្រូវធ្វើជាមួយវិញ្ញាសាចំនួន៣។ ទីមួយ ការហ្វឹកហ្វឺនផ្នែកទីបញ្ជាការ ទី២ ការហ្វឹកហ្វឺនផ្នែកវិស្វកម្ម ដូចជាការសាងសង់សាលារៀន និងជួសជុលមន្ទីរពេទ្យជាដើម និងវិញ្ញាសាទី៣គឺ ការព្យាបាលជំងឺ។
អ្នកនាំពាក្យយោធាកម្ពុជាបានពន្យល់ថា សមយុទ្ធឆ្មាំអង្គរ ត្រូវបានរៀបចំដើម្បីពង្រឹងសហប្រតិបត្តិការផ្នែកយោធាអាមេរិក-កម្ពុជា និងកិច្ចសហប្រតិបត្តិការជាមួយយោធានៃប្រទេសជាមិត្តផ្សេងទៀត។ អ្នកនាំពាក្យយោធាដដែលបញ្ជាក់ថា ការរៀបចំសមយុទ្ធយោធានៅកម្ពុជា គឺជាមោទនភាពរបស់កម្ពុជា ហើយថាព្រឹត្តិការណ៍នេះ ក៏ជាឱកាសក្នុងការបង្ហាញអំពីភាពរីកចំរើនរបស់យោធាកម្ពុជា និងបញ្ហាសន្តិសុខនៅកម្ពុជាផងដែរ។
កម្ពុជាបានពង្រឹងផ្នែកយោធាយ៉ាងខ្លាំងក្លាជាមួយប្រទេសមហាអំណាចមួយចំនួន ជាពិសេសអាមេរិក។ ជាមួយអាមេរិក យោធាកម្ពុជាបានធ្វើសមយុទ្ធជាច្រើនលើក ហើយទាហានជើងទឹកអាមេរិកបានចូលមកធ្វើសកម្មភាពសប្បុរសធម៌ នៅខេត្តព្រះសីហនុជាញឹកញាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ