ឯកអគ្គរដ្ឋទូតអាមេរិកសម្តែងទុក្ខក្រៀមក្រំចំពោះការបាត់បង់សម្តេចឪ
ឯកអគ្គរដ្ឋទូតអាមេរិកប្រចាំកម្ពុជា លោក វីលៀម ថូដ បានសម្តែងសមានទុក្ខយ៉ាងក្រៀមក្រំចំពោះការបាត់បង់អតីតព្រះមហាក្សត្រខ្មែរ សម្តេចឪ នរោត្តម សីហនុ។ ការសម្តែងមរណៈទុក្ខ នេះបានធ្វើឡើងតាមរយៈការឆ្លើយសំណួររបស់ប្រជាពលរដ្ឋខ្មែរជាច្រើនដែលបានចោទសួរតាមលិខិតអំពីទស្សនៈរបស់ស្ថានទូតអាមេរិកចំពោះការសោយទិវង្គតរបស់ព្រះមហាវីរក្សត្រខ្មែរ។ ការចោទសំណួរ និងការសម្តែងសមានទុក្ខរបស់មន្ត្រីជាន់ខ្ពស់អាមេរិកបានកើតឡើងខណៈដែលសហរដ្ឋអាមេរិកហាក់នៅស្ងប់ស្ងៀមចំពោះព្រះបរមសពសម្តេចឪ។
ចុះផ្សាយនៅថ្ងៃ៖
ស្តាប់ - ០២:២៦
នៅក្នុងខ្ទង់ព័ត៌មានប្រចាំសប្តាហ៍របស់ខ្លួន ឯកអគ្គរដ្ឋទូតអាមេរិកប្រចាំកម្ពុជា លោក វីលៀម ថូដ ( William E. Todd) បានសម្តែងសមានទុក្ខដ៏ក្រៀមក្រំបំផុតចំពោះព្រះបរមសពសម្តេចឪនរោត្តម សីហនុ។ នេះមិនមែនជារឿងចៃដន្យទេដែលតំណាងទីក្រុងវ៉ាស៊ីនតោនបានសម្តែងសមានទុក្ខ និងនិយាយអំពីវីរភាពរបស់អតីតព្រះមហាក្សត្រខ្មែរ សម្តេចឪ នរោត្តម សីហនុ។
ប៉ុន្តែ លោកបានប្រាប់ឲ្យដឹងតាមរយៈខ្ទង់ព័ត៌មានប្រចាំសប្តាហ៍ថា លោកបានទទួលសំណួរមួយចំនួនដែលចង់ដឹងពីទស្សនៈរបស់ស្ថានទូតអាមេរិកចំពោះការសោយទិវង្គតរបស់ព្រះមហាវីរក្សត្រខ្មែរ។ គឺសំណួរទាំងអស់នោះហើយដែលបានធ្វើឲ្យឯកអគ្គរដ្ឋទូតអាមេរិកឆ្លើយតបដោយបង្ហាញពីសមានទុក្ខអស់ពីដួងចិត្តចំពោះព្រះមហាក្សត្រ ព្រះមហាក្សត្រី រាជវង្ស និងប្រជាជនកម្ពុជាដែលបានបាត់បង់ព្រះវររាជបិតា របស់ខ្លួន។
លោក វីលៀម ថូដ ក៏បានបរិយាយយ៉ាងវែងអំពីសារសំខាន់របស់អង្គសម្តេចឪចំពោះប្រជាជនកម្ពុជា។ លោកកត់សម្គាល់ថា ព្រះបាទសម្តេចព្រះ នរោត្តម សីហនុ គឺជាមហាក្សត្រដែលមានចំណែកយ៉ាងសកម្មក្នុងប្រវត្តិសាស្ត្រប្រទេសកម្ពុជាអស់រយៈពេលជាង៧ទសវត្សរ៍ ហើយកេរដំណែលរបស់ព្រះអង្គនៅមានឥទ្ធិពលយូរអង្វែងសម្រាប់ប្រទេសកម្ពុជា។ ឯកអគ្គរដ្ឋទូតអាមេរិករូបនេះក៏បានសង្កេតឃើញអំពីការស្រឡាញ់ដ៏ជ្រាលជ្រៅរបស់ប្រជាជនកម្ពុជាចំពោះអង្គសម្តេចឪផងដែរ។
ការសម្តែងសមានទុក្ខជាសាធារណៈរបស់លោក វីលៀម ថូដ ហាក់បានទម្លាយភាពស្ងប់ស្ងាត់របស់សហរដ្ឋអាមេរិកចំពោះការសោយទិវង្គតរបស់សម្តេចឪ។ រដ្ឋាភិបាលក្រុងវ៉ាស៊ីនតោនហាក់មិនសូវចាប់អារម្មណ៍ប៉ុន្មានទេទៅលើព្រឹត្តិការណ៍នេះ។ ជាក់ស្តែង ក្នុងពេលមានវត្តមាននៅកម្ពុជាក្នុងកិច្ចប្រជុំកំពូលអាស៊ានកាលពីចុងខែវិច្ឆិកាឆ្នាំ២០១២ កន្លងទៅ លោកបារ៉ាក់ អូបាម៉ា ប្រធានាធិបតីអាមេរិក មិនបានចូលទៅគោរពវិញ្ញាណក្ខន្ធព្រះបរមសពសម្តេចឪនៅក្នុងព្រះបរមរាជវាំងដូចជាមេដឹកនាំមកពីប្រទេសផ្សេងទៀតឡើយ។ សហរដ្ឋអាមេរិកក៏មិនបានចាត់តំណាងជាន់ខ្ពស់មកចូលរួមក្នុងពិធីថ្វាយព្រះភ្លើងព្រះបរមសពនៅថ្ងៃចន្ទស្អែកនេះដែរ។
យ៉ាងណាក៏ដោយ លោក ឯកអគ្គរដ្ឋទូត វីលៀម ថូដ បានបញ្ជាក់ថា លោកមានកិត្តិយសធ្វើជាតំណាងសហរដ្ឋអាមេរិកចូលរួមក្នុងពិធីតម្កល់ និងថ្វាយព្រះភ្លើងព្រះបរមសពសម្តេចឪ នៅថ្ងៃស្អែក។ លោកអះអាងថា សូមសម្តែងសមានទុក្ខអស់ពីដួងចិត្តក្នុងនាមស្ថានទូតអាមេរិក និងប្រជាជនអាមេរិកចំពោះប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ