អណ្តូងរ៉ែមួយបានផ្ទុះបណ្តាលឲ្យស្លាប់កម្មកររ៉ែ ១៦នាក់
ការផ្ទុះនេះ បានប្រព្រឹត្តទៅយប់មិញ នៅវេលាម៉ោង ១និង៥៧នាទី រំលងអធ្រាត្រចូលថ្ងៃទី ២៩កក្កដានេះទៅហើយ គឺ ក្នុងអណ្តូងរ៉ែមួយ នៃខេត្ត Lugansk ប៉ែកខាងកើតបង្អស់ប្រទេសអ៊ុយក្រែន ជាប់នឹងព្រំប្រទល់រុស្ស៊ីផ្ទាល់។ ផ្ទុះគ្ឌាំងនេះ តាមមតិក្រុមអង្កេត គឺបណ្តាលមកពីការឆេះយ៉ាងគំហុក នៃឧស្ម័ន Methane ដែលភាយចេញយ៉ាងច្រើនសន្ធឹកសន្ធាប់តែម្តង ពីធ្យូងថ្ម ក្នុងអណ្តូងនោះ។
ចុះផ្សាយនៅថ្ងៃ៖
ស្តាប់ - ០២:០៩
ពេលផ្ទុះនោះ មានកម្មករចំនួន២៨នាក់បានជាប់ដៃជីកយកធ្យូងថ្ម នៅក្នុងជម្រៅ ៩១៥ម៉ែត្រ។ ពីក្នុងនោះ មាន១៦នាក់បានធ្លាក់ខ្លួនស្លាប់ភ្លាម។ ៣នាក់ដែលរលាក ស្បែក ក្នុងកម្រិតយ៉ាងធ្ងន់បានត្រូវដឹកទៅមន្ទីរពេទ្យជាបន្ទាន់។ ចំណែក៩នាក់ទៀត ស្រាប់តែ បាត់ខ្លួនរកមិនទាន់ឃើញទេ។
ក្រុមអង្កេត ដែលបានបង្កើតឡើងទៅតាមការណែនាំ របស់លោកប្រធានាធិបតីYanukovitch សម្រាប់វែកញែក អំពីមូលហេតុនៃការផ្ទុះនោះ បានសន្និដ្ឋានត្រួសៗ ថា គឺ ប្រហែលមកពី ឧស្ម័ន Methane គ្មានពណ៌ ដែលមិនអាចត្រូវគេមើលឃើញ វាភាយចេញ យ៉ាងច្រើនគំហុក ពីធ្យូងថ្ម ហើយពេលវាទង្គិច នឹងធាតុOxygene ក៏ឆេះវឹប បង្កឲ្យផ្ទុះគ្ឌាំងតែម្តង។
គួរបញ្ជាក់ថា ៩៦% នៃអណ្តូងរ៉ែនៅអ៊ុយក្រែន គិតតាំងពីដំណាច់ទសវត្សទី៨០មក ឥតបានទទួលការជួសជុលទេ។ ម៉្លោះហើយ បានជាវាឧស្សាហ៏កើតមានគ្រោះថ្នាក់។ ព្រឹកថ្ងៃនេះតែម្តង ក្នុងអណ្តូងរ៉ែនៃខេត្ត Donetsk នៅជិតខាង ស្រាប់តែមានឧប្បត្តិហេតុកើតឡើង បណ្តាលឲ្យស្លាប់កម្មករម្នាក់ដែរ និងរបួស៨នាក់។
ក្នុងខេត្ត Donetskនោះឯង ដែលល្បីជាជង្រុកធ្យូងថ្ម កាលពី៤ឆ្នាំមុន ដោយមកពីការផ្ទុះនៃធាតុ Methane មានកម្មករស្លាប់ដល់ទៅជាង១០០នាក់។ ហើយក្នុងចន្លោះពីឆ្នាំ១៩៩៩ ដល់២០០៧ មានស្លាប់ដល់ទៅជាង១៨០នាក់ ហេតុដែលប្រែអណ្តូងរ៉ែនៅអ៊ុយក្រែនទៅស្ថិតក្នុងចំណោម អណ្តូងរ៉ែ ដែលគ្រោះថ្នាក់ជាងគេលើពិភពលោក។
ដោយមកពីគ្រោះថ្នាក់នេះ ក្នុងអំឡុងទសវត្សទី៩០ អាជ្ញាធរអ៊ុយក្រែនបានបិទឲ្យឈប់ដំណើរការ អស់១/៣ គឺអណ្តូងរ៉ែណាដែល អាយុសុទ្ធតែជាង ១០០ឆ្នាំហើយ។
អ៊ុយក្រែន ទោះបីក្នុង១ឆ្នាំៗ ផ្តល់ជាមធ្យម បានធ្យូងថ្មប្រមាណ៨០លានតោនក្តីក៏ប្រទេសនេះ ឥតជាប់ឈ្មោះទេ ក្នុងបញ្ជី១០ប្រទេសដែលនាំមុខគេវិស័យនេះ ៖ ចិនជាប់លេខ១ដោយផលិត បានធ្យូងថ្មក្នុង១ឆ្នាំដល់ជាង ៣.០០០លានតោន។ ស.រ.អា.ជាប់លេខ២ ដោយតួលេខ១.០០០លានតោន។ ឥណ្ឌាជាប់លេខ៣ ដោយផលិតបាន៥៦០លានតោន។ រុស្ស៊ីជាប់លេខ៥ ដោយផ្តល់បាន ៣០០លានតោន។ កាហ្សាកស្ថាន ជាប់លេខ១០ត្រឹមតួលេខ១០០លានតោន។
ចំណែកអណ្តូងរ៉ែ ដែលមានជម្រៅ ជ្រៅជាងគេ ដល់ទៅ ៤.៥០០ម៉ែត្រក្រោមដី គឺស្ថិតនៅសាធារណរដ្ឋអាហ្វ្រិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ