ប្រជាពលរដ្ឋ៨នាក់ដែលសរសេរអក្សរលើដំបូលផ្ទះ ស្វែងរកអន្តរាគមន៍ពីលោក អូបាម៉ា ត្រូវអាជ្ញាធរដោះលែង
អាជ្ញាធរក្រុងភ្នំពេញ បានដោះលែងប្រជាពលរដ្ឋ ៨ នាក់ ដែលក្នុងនោះ មានស្ត្រី ៦ នាក់ ឲ្យវិលត្រឡប់មកផ្ទះវិញហើយ កាលពីម៉ោងជាង ៧ យប់ ថ្ងៃទី១៥វិច្ឆិកាម្សិលមិញ។ ប្រជាពលរដ្ឋទាំងនោះ ត្រូវបានអាជ្ញាធរចាប់ខ្លួន យកទៅឃុំឃាំង និងសួរនាំ កាលពីព្រឹកព្រលឹមថ្ងៃទី១៥វិច្ឆិកា បន្ទាប់ពីពួកគេ បានសរសេរអក្សរ "SOS" និងបិតរូបថតលោក អូបាម៉ា លើដំបូលផ្ទះ ដើម្បីស្វែងរកអន្តរាគមន៍ក្នុងរឿងដីធ្លី ពីប្រធានាធិបតីអាមេរិក ដែលនឹងមកចូលរួមកិច្ចប្រជុំនៅកម្ពុជា នៅថ្ងៃទី១៩ ខែវិច្ឆិកាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកស្រី ភួង សុភាព អាយុ ៣៨ ឆ្នាំ ជាស្ត្រីម្នាក់ ក្នុងចំណោមប្រជាពលរដ្ឋ ៨ នាក់ ដែលអាជ្ញាធរចាប់ខ្លួន បានឲ្យដឹងថា អាជ្ញាធរ បានឲ្យក្រុមប្រជាពលរដ្ឋ ផ្តិតមេដៃលើកិច្ចសន្យាថា បញ្ឈប់សកម្មភាពតវ៉ា សរសេរអក្សរ ឬក៏លើកបដា នៅពេលកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ចាប់ពីថ្ងៃទី១៥ ដល់ថ្ងៃទី២០ ខែវិច្ឆិកា ឆ្នាំ២០១២។
អ្នកស្រី ភួង សុភាព ដែលប្រឈមនឹងបាត់បង់ផ្ទះ នៅជាប់នឹងរបងព្រលានយន្តហោះភ្នំពេញ ក៏បានបន្ថែមថា អាជ្ញាធរមូលដ្ឋាន ក៏បានឡើងលើដំបូលផ្ទះ លុបអក្សរ សុំជំនួយបន្ទាន់ពីលោកអូបាម៉ា និងបករូបថតរបស់លោក អូបាម៉ា ចេញពីដំបូលផ្ទះ របស់ប្រជាពលរដ្ឋ ដែលស្ថិតនៅជាប់នឹងរបងព្រលានយន្តហោះភ្នំពេញផងដែរ។
សូមរម្លឹកថា ក្រុមប្រជាពលរដ្ឋជាង ១៨០ គ្រួសារ នៅជាប់នឹងរបងព្រលានយន្តហោះ ប្រឈមនឹងការបណ្ថេញចេញពីលំនៅដ្ឋាន ដោយអាជ្ញាធរ តម្រូវឲ្យរុះរើផ្ទះចេញ ត្រូវពង្រីកព្រលានយន្តហោះ ដែលឃ្លាតពីរបង សព្វថ្ងៃ ចំនួន ១០ ម៉ែត្រ។
ប្រជាពលរដ្ឋអះអាងថា ការតម្រូវឲ្យប្រជាពលរដ្ឋរុះរើផ្ទះសម្បែងចេញនោះ គឺអាជ្ញាធរ មិនបានផ្តល់សំណងអ្វីឡើយ ទោះបីជាទីតាំងដីថ្មី សម្រាប់ដោះដូរ ក៏គ្មានដែរ ខណៈដែលប្រជាពលរដ្ឋមានប្លង់សម្គាល់កម្មសិទ្ធិដី និងផ្ទះ ចេញដោយអាជ្ញាធរមូលដ្ឋានយ៉ាងត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ