ខួប៧០ឆ្នាំនៃសោកនាដកម្មក្នុងព្រៃ Katyn (មេសា ១៩៤០-មេសា ២០១០)
គឺជាលើកទី១ ដែលថ្ងៃពុធ ៧មេសានេះ ប្រមុខរដ្ឋាភិបាលរុស្ស៊ីលោកVladimir Poutine និងសមភាគីប៉ូឡូញ លោកនាយករដ្ឋមន្ត្រី Donald Tusk ចូលរួមក្នុងពិធីស្មិងស្មាធិ៍រួមគ្នាលើផ្នូរក្នុងព្រៃ Katyn នៅប៉ែកខាងលិចប្រទេសរុស្ស៊ី ក្នុងខេត្តSmolensk នៅចម្ងាយ ៤៥០គ.ម. និរតីពីរដ្ឋធានីម៉ូស្គូ ជាទីដែលមានកប់សពនាយទាហានប៉ូឡូញប្រមាណ ៤.០០០នាក់ បាញ់សម្លាប់ ដោយពួកប៉ូលិសសម្ងាត់នៃរបបStaline ក្នុងឆ្នាំ ១៩៤០ ពេលដែលសង្គ្រាមលោកលើក ទី២ទើបឆាបឆេះ។
ចុះផ្សាយនៅថ្ងៃ៖ កែប្រែថ្ងៃទី៖
គិតជាសរុប សម័យនោះ នៅតាមព្រៃនៃដែនដីរុស្ស៊ី Ukraine Bielorussie នៃអតីតសហភាពសូវៀត គឺមានប្រហារជីវិតនាយទាហាន និងឈ្លើយសង្គ្រាមប៉ូឡូញ អស់ជិត២ ម៉ឺន២.០០០នាក់ឯណោះ។
ទោះបីទីស្មសានដែលមានកប់ខ្មោចរួមនេះ បានត្រូវគេរកឃើញ តាំងពី ក្នុងឆ្នាំ ១៩៤៣ក្តី ក៏ អំណាចសូវៀត អស់អំឡុងពេលយូរឆ្នាំ តែងបានខិតខំលាក់បំបាំងរឿងពិតអំពីសោកនាដកម្ម នៅក្នុងព្រៃ Katyn ដោយអះអាងថា នាយទាហានប៉ូឡូញទាំងនោះបានត្រូវបាញ់សម្លាប់ គឺដោយដៃពួកយោធាអាល្លឺម៉ង់ទេតើ ក្រោយពីពួកនេះបានវាយលុកចូលដែនដីសហភាពសូវៀត យ៉ាងគំហុក កាលក្នុងឆ្នាំ ១៩៤១។
តាមពិតទៅ នាយទាហានប៉ូឡូញទាំងនោះបានត្រូវភាគីអាល្លឺម៉ង់ប្រគល់មកក្នុងដៃប៉ូលិសសម្ងាត់សូវៀត ជំនាន់Staline ដែលមានឈ្មោះថា “ស្នងការដ្ឋានប្រជាជនខាងកិច្ចការមហាផ្ទៃ” ហៅកាត់ជាភាសារុស្ស៊ីថា NKVD ដែលគ្រាន់តែអ្នកស្រុកឭឈ្មោះ គឺព្រឺឆ្អឹងខ្នងទៅហើយ។ ប្រគល់នេះ គឺក្រោយពីមានចុះ ក្នុងឆ្នាំ ១៩៣៩ ជាកតិកាសញ្ញារវាងរបបសូវៀត Staline និង របបHitlerអាល្លឺម៉ង់។ ឯកសារនេះ ត្រូវគេស្គាល់ក្រោមឈ្មោះថា កតិកាសញ្ញា Molotov-Ribbentrop ដែលកាលណោះ សុទ្ធតែជារដ្ឋមន្ត្រីការបរទេសចុះហត្ថលេខាតំណាងឲ្យរបបទាំងពីរ។
ទំព័រសោកនាដកម្មក្នុងព្រៃ Katyn បាននាំឲ្យល្អក់យ៉ាងខ្លាំងដល់ទំនាក់ទំនងរុស្ស៊ី- ប៉ូឡូញ។ ទោះបីក្នុងឆ្នាំ ១៩៩០ មេដឹកនាំសូវៀតដែលល្បីខាងធ្វើកំណែទម្រង់ គឺលោក Gorbatchev សុខចិត្តសារភាពអំពីនាទីទទួលខុសត្រូវរបស់សហភាពសូវៀត ចំពោះឃាតកម្មពួកនាយទាហាន និងពួកអ្នកតំណាងដ៏ឆ្នើមៗនៃបញ្ញវន្តប៉ូឡូញក្តី ក៏បណ្ណសារជាច្រើនទាក់ទងនឹងរឿងនេះ នៅតែបន្តស្ថិតនៅក្នុងភាពសម្ងាត់ដដែល។ ការស៊ើបអង្កេតជាផ្លូវការ ធ្វើតាំងពីពេលសារភាពនោះមក ដោយស្ថាប័នរដ្ឋអាជ្ញារុស្ស៊ីបានត្រូវបញ្ឈប់ទៅក្នុងឆ្នាំ ២០០៤ ដោយគ្មានច្រកចេញឲ្យបានច្បាស់លាស់ និងទាំងមិនព្រមចាត់ទុកព្រឹត្តិការណ៍ នៅ Katyn ថា ជាឧក្រិដ្ឋកម្មសង្គ្រាមឡើយ។
រីឯការប៉ុនប៉ងច្រើនឥតគណនារបស់សាច់ញាតិពួកអ្នកអភ័ព្វស្លាប់ទៅ តវ៉ា នៅតាមតុលាការរុស្ស៊ី ទល់នឹងការសំរេចចិត្តឈប់ស៊ើបអង្កេតនេះ គឺសុទ្ធតែចប់ទៅដោយគ្មានលទ្ធផលអ្វីណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ