ទាហានអាហ្វហ្កានីស្ថាន៥នាក់ស្លាប់ក្នុងការវាយប្រហារតាមអាកាសរបស់អូតង់
ទាហានអាហ្វហ្កានីស្ថានយ៉ាងតិច ៥នាក់ បានស្លាប់ និង ៨នាក់ផ្សេងទៀតរងរបួស កាលពីថ្ងៃព្រហស្បតិ៍ នៅក្នុងការវាយប្រហារតាមផ្លូវអាកាសរបស់កងកម្លាំងអូតង់។ ប្រមុខដឹកនាំអាហ្វហ្កានីស្ថានបានថ្កោលទោសការវាយប្រហារនេះ ហើយបានប្រកាសបើកការស៊ើបអង្កេតជាបន្ទាន់មួយ ដើម្បីរកឲ្យឃើញនូវមូលហេតុ ដែលនាំឲ្យមានហេតុការណ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ហេតុការណ៍បានកើតឡើង នៅព្រឹកព្រលឹមថ្ងៃព្រហស្បតិ៍ នៅខេត្តប៉ែកខាងកើតប្រទេសអាហ្វហ្កានីស្ថាន។ អ្នកនាំពាក្យក្រសួងការពារជាតិអាហ្វហ្កានីស្ថានបានឲ្យដឹងថា មានទាហានអាហ្វហ្កានីស្ថាន ៥នាក់ត្រូវស្លាប់ និង ៨នាក់ផ្សេងទៀតត្រូវរងរបួស នៅក្នុងហេតុការណ៍នេះ។ អាជ្ញាធរអាហ្វហ្កានីស្ថានក៏បានអះអាងផងដែរថា ការវាយប្រហារនេះ ត្រូវបានធ្វើឡើងដោយយន្តហោះគ្មានមនុស្សបើក (Drone) របស់សហរដ្ឋអាមេរិក។
អង្គការអូតង់បានប្រកាសទទួលស្គាល់ថាពិតជាមានហេតុការណ៍នេះកើតឡើងមែន ដោយបានលើកឡើងថា ការវាយប្រហារទៅលើគ្នាឯងនេះ គឺជាគ្រោះថ្នាក់អកុសលមួយ។ អូតង់បានថ្លែងចូលរួមរំលែកទុក្ខដល់ជនរងគ្រោះ ហើយសន្យាថា នឹងចាត់វិធានការ ដើម្បីបញ្ចៀសកុំឲ្យគ្រោះថ្នាក់បែបនេះ កើតមានឡើងជាថ្មីទៀត ទៅថ្ងៃអនាគត។
អ្នកនាំពាក្យលោកហាមីដ ការហ្សាយ (Hamid Karzai) ប្រធានាធិបតីអាហ្វហ្កានីស្ថាន ក្រៅពីបានថ្កោលទោសចំពោះការវាយប្រហារនេះ បានប្រកាសឲ្យដឹងថា រដ្ឋាភិបាលបានបើកការស៊ើបអង្កេតមួយ ដើម្បីរកឲ្យឃើញនូវដើមហេតុពិតប្រាកដ ដែលនាំឲ្យមានការវាយប្រហារទៅលើទាហានអាហ្វហ្កានីស្ថានបែបនេះ។
គួរបញ្ជាក់ថា កងទ័ពអាមេរិក និងសម្ព័ន្ធមិត្តក្នុងអង្គការអូតង់ តែងតែធ្វើការវាយប្រហារតាមផ្លូវអាកាស ដោយប្រើយន្តហោះចម្បាំង និងជាពិសេសយន្តហោះគ្មានមនុស្សបើក (Drones) ដើម្បីជាជំនួយដល់កងថ្មើរជើង នៅក្នុងប្រតិបត្តិការប្រឆាំងនឹងពួកឧទ្ទាមតាលីបង់ នៅក្នុងទឹកដីអាហ្វហ្កានីស្ថាន។ ក៏ប៉ុន្តែ ការស្លាប់ជនស៊ីវិលអាហ្វហ្កានីស្ថាននៅក្នុងប្រតិបត្តិការទាំងនេះតែងតែជាបញ្ហាចម្រូងចម្រាសមួយ ដែលបំពុលទំនាក់ទំនង រវាងរដ្ឋាភិបាលក្រុងកាប៊ុល និងរដ្ឋាភិបាលក្រុងវ៉ាស៊ីងតោន។
អាមេរិក និងអូតង់គ្រោងនឹងដកកងទ័ពចេញពីអាហ្វហ្កានីស្ថាន នៅចុងឆ្នាំ២០១៤នេះ ដោយចង់រក្សាទុកតែទាហានខ្លះ ដើម្បីជួយហ្វឹកហ្វឺន និងផ្តល់ប្រឹក្សាដល់កងទ័ពជាតិអាហ្វហ្កានីស្ថាន។ ក៏ប៉ុន្តែ រហូតមកទល់នឹងពេលនេះ លោកប្រធានាធិបតីកាហ្សាយបានបដិសេធមិនព្រមចុះហត្ថលេខាលើកិច្ចព្រមព្រៀងអនុញ្ញាតឲ្យកងទ័ពអាមេរិកបន្តស្ថិតនៅក្នុងប្រទេសអាហ្វហ្កានីស្ថាន ក្រោយឆ្នាំ២០១៤ ដោយបានលើកឡើងនូវហេតុផលជាច្រើន ក្នុងនោះក៏មានផងដែរ ការស្លាប់ជនស៊ីវិលអាហ្វហ្កានីស្ថាន នៅក្នុងប្រតិបត្តិការយោធាអាមេរិក និងអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ