ក្រុមយុវជនស្ម័គ្រចិត្តវាស់ដីបាន ៤៤ម៉ឺនហិកតា
រយៈពេល ៥ ខែ ចាប់ពីចុងខែមិថុនា រហូតដល់ចុងខែវិច្ឆិកានេះ ក្រុមយុវជនស្ម័គ្រចិត្ត បានចុះវាស់វែងដី ដើម្បីធ្វើប័ណ្ណកម្មសិទ្ធិផ្តល់ឲ្យប្រជាពលរដ្ឋ បានចំនួន ២៧៥.០០០ ក្បាលដី ត្រូវនឹង ៤៤ ម៉ឺនហិកតា។ តាមផែនការ រដ្ឋាភិបាល កំណត់ឲ្យក្រុមយុវជនវាស់វែងដីធ្លី ផ្តល់ប័ណ្ណកម្មសិទ្ធិស្របច្បាប់ ចំនួន ១,៨ លានហិកតា។ ដើម្បីសំរេចផែនការនេះ រដ្ឋាភិបាល បានបន្ថែមក្រុមយុវជន ចំនួន ២១ ក្រុមទៀត ដែលនាំឲ្យក្រុមយុវជនស្ម័គ្រចិត្តវាស់វែងដីធ្លី កើនដល់ ១៦៨ ក្រុម។ ក្នុងមួយក្រុម មានចំនួន ១២ នាក់។ រីឯមន្ត្រីជំនាញខាងសុរិយោដី ក៏មានចំនួន ស្មើនឹងក្រុមយុវជនស្ម័គ្រចិត្ត ដើម្បីចុះវាស់វែងដីធ្លី នៅ ២១ ខេត្ត។
ចុះផ្សាយនៅថ្ងៃ៖
ស្តាប់ - ០១:៤៥
បន្ទាប់ពីឈប់សម្រាក ចាប់តាំងពីថ្ងៃទី២៣វិច្ឆិកា គឺនៅព្រឹកថ្ងៃទី២៩វិច្ឆិកានេះ ក្រុមយុវជនស្ម័គ្រចិត្តវាស់វែងដីធ្លី ក្នុងសម្លៀកបំពាក់យោធាប៉ារ៉ា មានស្លាកសញ្ញា ក្រសួងរៀបចំដែនដី នគរូបនីយកម្ម និងសំណង់ បានឡើងឡានទាហាន ចេញពីកោះពេជ្រ ក្នុងទីក្រុងភ្នំពេញ ឆ្ពោះទៅបន្តបំពេញបេសកកម្ម តាមបណ្តាខេត្តនានាវិញ។
តាមមន្ត្រីជំនាញ មកដល់ពេលនេះ រដ្ឋាភិបាលបានបន្ថែមក្រុមយុវជនចំនួន ២១ ក្រុមបន្ថែមទៀត ដែលនាំឲ្យក្រុមយុវជន កើនដល់ ១៦៨ ក្រុម ស្មើនឹង ២០១៦ នាក់។ ក្នុងមួយក្រុម មានចំនួន ១២ នាក់។ រីឯមន្ត្រីជំនាញសុរិយោដី ដែលចុះទៅបំពេញការងារវាស់វែងដីធ្លី ជាមួយនឹងក្រុមយុវជន ក៏មានចំនួនដូចគ្នាដែរ។
ក្នុងពេលជូនដំណើរក្រុមយុវជនស្ម័គ្រចិត្ត ឡើងឡាន នៅព្រឹកមិញ អគ្គនាយកសុរិយោដី និងភូមិសាស្ត្រ នៃក្រសួងដែនដី នគរូបនីយកម្ម និងសំណង់ លោក ស សុវណ្ណ បានថ្លែងថា ចាប់ពីដំណើរការវាស់វែងដីធ្លី ក្នុងរយៈពេល ៥ ខែ គិតមកដល់ថ្ងៃទី២៣វិច្ឆិកា ក្រុមយុវជនស្ម័គ្រចិត្ត បានចុះវាស់វែងដីជូនប្រជាពលរដ្ឋ បានចំនួន ២៧៥.០០០ ក្បាលដី ដែលស្មើនឹង ៤៤ ម៉ឺនហិកតា។ មកដល់ពេលនេះ រដ្ឋាភិបាលក៏បានចែកប័ណ្ណកម្មសិទ្ធិដីធ្លីដល់ប្រជាពលរដ្ឋ បានប្រមាណ ១៣ ម៉ឺនប័ណ្ណកម្មសិទ្ធិ។
តាមផែនការ ក្រុមយុវជនស្ម័គ្រចិត្ត ដែលដឹកនាំដោយលោក ហ៊ុន ម៉ានិត កូនប្រុសលោកនាយករដ្ឋមន្ត្រី ហ៊ុន សែន ត្រូវចុះវាស់វែងដីធ្លី នៅ ២១ ខេត្ត ដែលមានផ្ទៃសរុប ១,៨ លានហិកតា ដើម្បីធ្វើប័ណ្ណកម្មសិទ្ធិ ចែកជូនប្រជាជន ៤០ ម៉ឺនគ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ