២០១៦ អាជ្ញាធររកឃើញជនអន្តោប្រវេសន៍១៦ម៉ឺននាក់ មានវៀតណាម៩៩ភាគរយ
នៅព្រឹកនេះនាយកដ្ឋានអន្តោប្រវេសន៍បានឲ្យដឹងថាការធ្វើស្ថិតិជនបរទេសអន្តោប្រវេសន៍នៅកម្ពុជារយៈពេល១ឆ្នាំកន្លះ រកឃើញជនបរទេសអន្តោប្រវេសន៍ចំនួន១៦ម៉ឺននាក់ ក្នុងនោះមានជនជាតិវៀតណាម៩៩ភាគរយ។ គណបក្សប្រឆាំងមិនអធិប្បាយលើតួលេខនេះទេ ប៉ុន្តែគណបក្សនេះគាំទ្រវិធានការស្រាវជ្រាវរកជនបរទេសអន្តោប្រវេសន៍របស់ក្រសួងមហាផ្ទៃ។
ចុះផ្សាយនៅថ្ងៃ៖
ស្តាប់ - ០២:១៥
រយៈពេលមួយឆ្នាំកន្លះក្នុងការអនុវត្តផែនការរបស់ក្រសួងមហាផ្ទៃស្តីពីការងារគ្រប់គ្រងជនបរទេសអន្តោប្រវេសន៍ ក្រសួងបានស្រង់ស្ថិតិជនបរទេសអន្តោប្រវេសន៍នៅទូទាំងប្រទេសកម្ពុជា ហើយរកឃើញជនអន្តោប្រវេសន៍ចំនួនជាង១៦ម៉ឺននាក់ ក្នុងនោះមានជនជាតិវៀតណាមប្រមាណ៩៩.៤៩ភាគរយ។ នេះបើតាមសុន្ទរកថាលោកសុខ ផល អគ្គនាយកនៃអគ្គនាយកដ្ឋានអន្តោប្រវេសន៍នៅព្រឹកថ្ងៃទី១៩ ខែសីហា។
ជនអន្តោប្រវេសន៍ ដែលភាគច្រើនជាជនជាតិវៀតណាមនោះ ត្រូវបានអាជ្ញាធរបែងចែកជា៣ប្រភេទរួមមាន ជនអន្តោប្រវេសន៍ ដែលបានចុះបញ្ជីជំរឿនឆ្នាំ២០០២ ជនបរទេសអន្តោប្រវេសន៍កាន់កាប់ឯកសារដ្ឋបាលកម្ពុជាមិនប្រក្រតី និងជនបរទេសស្នាក់នៅយូរគ្មានឯកសារ។ នេះបើតាមលោកសុខ ផល។
ក្នុងសន្ទរកថាដដែលក៏បានឲ្យដឹងដែរថាចំនួនជនបរទេសអន្តោប្រវេសន៍ តាមតួលេខជំរឿនជនបរទេសអន្តោប្រវេសន៍ចាប់ពីឆ្នាំ២០០២ មកដល់ឆ្នាំ២០១៦ មានការកើនឡើងជាលំដាប់ ក្នុងនោះឆ្នាំ២០០២ មានប្រមាណ៧ម៉ឺននាក់ ឆ្នាំ២០១០ មានប្រមាណ១០ម៉ឺននាក់ និងឆ្នាំ២០១៦នេះ ក្រសួងមហាផ្ទៃរកឃើញប្រមាណ១៦ម៉ឺននាក់។
ប្រភពដដែលបានឲ្យដឹងថាចាប់ពីខែឧសភា ឆ្នាំ២០១៤ ដល់ខែមិថុនា ឆ្នាំ២០១៦ ក្នុងការអនុវត្តច្បាប់អន្តោប្រវេសន៍ អគ្គនាយកដ្ឋានអន្តោប្រវេសន៍បានបណ្តេញចេញ និងឃាត់ខ្លួនកសាងសំណុំរឿងបញ្ជូនទៅតុលាការ ចំនួនប្រមាណ១ម៉ឺននាក់មាន៦៨សញ្ជាតិ និងមានជនជាតិវៀតណាម៩ពាន់នាក់។
ជុំវិញតួលេខជនបរទេសអន្តោប្រវេសន៍របស់ក្រសួងមហាផ្ទៃនេះ គណបក្សប្រឆាំងតាមរយៈលោកអេង ឆៃអ៊ាង បានបដិសេធក្នុងការអធិប្បាយលើតួលេខនេះ ប៉ុន្តែគណបក្សនេះគាំទ្រវិធានការស្រាវជ្រាវរកជនបរទេសអន្តោប្រវេសន៍ របស់ក្រសួងមហាផ្ទៃ។
លោកអេង ឆៃអ៊ាង មន្ត្រីជាន់ខ្ពស់គណបក្សសង្រ្គោះជាតិបានបន្ថែមថា ការអនុវត្តច្បាប់អន្តោប្រវេសន៍របស់កម្ពុជាកន្លងមកគឺនៅមានចន្លោះប្រហោងនៅឡើយ ព្រោះថាជនអន្តោប្រវេសន៍ខុសច្បាប់ត្រូវឆ្លងកាត់ការនីតិវិធីរបស់តុលាការជាមុនសិន ទើបបញ្ជូនទៅប្រទេសកំណើតវិញ។ លោកអេង ឆៃអ៊ាង ក៏បានអំពាវនាវឲ្យក្រសួងមហាផ្ទៃអនុវត្តច្បាប់អន្តោប្រវេសន៍ឲ្យបានម៉ឺងម៉ាត់បំផុត។
សូមបញ្ជាក់ថាព្រឹកថ្ងៃទី១៩ ខែសីហានេះ ក្រសួងមហាបានបើកកិច្ចប្រជុំផ្សព្វផ្សាយរបាយការណ៍បូកសរុបជំហានដំបូង ស្តីពីការអនុវត្តវគ្គបន្តការងារគ្រប់គ្រងជនអន្តោប្រវេសន៍ក្នុងប្រទេសកម្ពុជា។ លោក សុខ ផល ក៏បានកំណត់ទិសដៅ និងសំណូមពរមួយចំនួនទៅក្រសួងមហាផ្ទៃផងដែរ ក្នុងគោលបំណងគ្រប់គ្រងជនអន្តោប្រវេសន៍ដែលកំពុងរស់នៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ