ទស្សនកិច្ចដ៏កម្ររបស់ប្រធានកាកបាទក្រហមអន្តរជាតិនៅកូរ៉េខាងជើង
ប្រធានគណៈកម្មការកាកបាទក្រហមអន្តរជាតិ ហៅកាត់ថា CICR លោក Peter Maurer បានអញ្ជើញទៅដល់ប្រទេសកូរ៉េខាងជើង នៅថ្ងៃអង្គារម្សិលមិញ ដើម្បីបំពេញទស្សនកិច្ច ផ្លូវការ ដ៏កម្រមួយនៅ ឧបទ្វីបកូរ៉េ។ នេះបើតាមសេចក្តីប្រកាសព័ត៌មានរបស់អង្គការមនុស្សធម៌ដែលមានទីស្នាក់ការនៅក្រុងហ្សឺណែវ ប្រទេសស្វីស។
ចុះផ្សាយនៅថ្ងៃ៖
ស្តាប់ - ០១:៥៨
ទស្សនកិច្ចផ្លូវការរបស់ប្រធានកាកបាទក្រហមនៅព្យុងយ៉ាង ប្រព្រឹត្តទៅជាលើកចុងក្រោយ កាលពី២១មុនឆ្នាំមុន។
លោក Peter Maurer ត្រូវជួបសន្ទនាជាមួយនឹងមន្ត្រីជាន់ខ្ពស់របស់រដ្ឋាភិបាល និងតំណាងកាកបាទក្រហមកូរ៉េខាងជើង និងខាងត្បូង ស្តីអំពីសំណុំរឿងមនុស្សធម៌ផ្សេងៗ។ ការបង្រួបបង្រួមគ្រួសារដែលបែកបាក់តាំងពីសម័យសង្គ្រាម ១៩៥០-៥៣ ក៏ជាប្រធានបទសំខាន់មួយ ដែលប្រធានគណៈកម្មការកាកបាទក្រហមអន្តរជាតិ លោក Peter Maurer ត្រូវលើកយកមកជជែកជាមួយនឹងភាគីបក្ខដិបក្ខទាំងពីរដែរ។ អង្គការCICR បានរំលឹកជាថ្មីអំពីតួនាទីជាអ្នកពិគ្រោះយោបល់ ដើម្បីឈានដល់ការរៀបចំជំនួបគ្រួសារ។ កាលពីថ្ងៃអាទិត្យទី១៨សីហា កូរ៉េខាងជើងទើបព្រមព្រៀងតាមសំណើរបស់កូរ៉េខាងត្បូង បើកកិច្ចចរចាស្តីពីការបង្រួបបង្រួមគ្រួសារដែលព្រាត់ប្រាស់គ្នាក្រោយសង្គ្រាម។
ម្យ៉ាងវិញទៀត សម្រាប់ លោក Peter Maurer ការជ្រើសរើសពេលវេលាទស្សនកិច្ច ចំពេលខួប៦០ឆ្នាំនៃការព្រមព្រៀងឈប់បាញ់រវាងកូរ៉េទាំងពីរដូច្នេះ ក៏ព្រោះតែអង្គការចង់បង្ហាញចេតនា ចង់ជួយដោះស្រាយបញ្ហាមនុស្សធម៌ឱ្យបងប្អូនគូសត្រូវទាំងពីរផង និងបំណងប្រាថ្នាបង្កើនកិច្ចសហប្រតិបត្តិការ និងការផ្តោះប្តូរជាមួយប្រទេសទាំងពីរនេះផង។
សូមបញ្ជាក់ថា អង្កការកាកបាទក្រហមមានវត្តមានក្នុងប្រទេសកូរ៉េខាងជើង តាំងពីជាង១០ឆ្នាំមកហើយ។ ដោយមានសហការជាមួយនឹងកាកបាទក្រហមក្នុងស្រុក CICR ជួយឧបត្ថម្ភ គាំទ្រមជ្ឈមណ្ឌលអប់រំកាយនិងនិតិសម្បទារនៅទីក្រុងព្យុងយ៉ាង និងមន្ទីរពេទ្យចំនួនបួននៅតាមខេត្ត។
លោក Peter Maurer នឹងស្នាក់នៅក្នុងប្រទេសកូរ៉េខាងជើង រហូតដល់ថ្ងៃទី ២៣ សីហា មុននឹងបន្តដំណើរទៅកាន់ប្រទេសជិតខាងចិន និងកូរ៉េខាងត្បូង។ ទស្សនកិច្ចនៅកូរ៉េខាងត្បូង ប្រព្រឹត្តទៅជួនចំពេលដែលអង្គការCICR គ្រោងនឹងបង្កើតការិយាល័យអចិន្ត្រៃយ៍មួយក្នុងប្រទេសនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ