ឆ្នាំ២០១២ ជា “ឆ្នាំនៃប្រវត្តិសាស្ត្ររុស្ស៊ី“
គឺល្ងាចថ្ងៃ៩មករាម្សិលមិញ ដែលលោកប្រធានាធិបតីមេដវេដេវ បានចេញក្រឹត្យ ប្រកាស ឆ្នាំ២០១២ ជា “ឆ្នាំនៃប្រវត្តិសាស្ត្ររុស្ស៊ី”។ តាមដែលវិមានក្រេមឡាំងជូនជាដំណឹង ខ្លឹមសារនៃក្រឹត្យនេះ គឺដើម្បីទាក់ទាញ ស្មារតីសាធារណជន មកនឹងប្រវត្តិសាស្ត្ររុស្ស៊ីនិងមកលើ តួនាទីដែលរុស្ស៊ី បានដើរក្នុងប្រវត្តិសាស្ត្រពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ក្រឹត្យលោកប្រធានាធិបតីមេដវេដេវ ផ្ទុកផ្តាក់រដ្ឋាភិបាលរុស្ស៊ី ឲ្យបង្កើតឡើងជា
“ គណៈកម្មាធិការ ខាងចាត់ចែងប្រារព្ធ ឆ្នាំនៃប្រវត្តិសាស្ត្ររុស្ស៊ី” ព្រមទាំងឲ្យ ផ្សំឡើងជា “សមាសភាពនៃ គណៈកម្មាធិការនេះ”។ មិនតែប៉ុណ្ណោះ រដ្ឋាភិបាលក៏មានភារៈ តាក់តែងឡើង ជា” ផែនការនៃពិធីធំៗជាគោល ខាងប្រារព្ធឆ្នាំ២០១២ ក្នុងឋានៈជា “ឆ្នាំនៃប្រវត្តិសាស្ត្ររុស្ស៊ី”។
អំពី បំណងលោកប្រធានាធិបតីមេដវេដេវ ប្រកាសឆ្នាំនេះ ជា“ឆ្នាំនៃប្រវត្តិសាស្ត្ររុស្ស៊ី“ គេចាប់ យល់ដឹងតាំងពីក្នុងឆ្នាំ ២០១១កន្លងទៅម៉្លេះ។ មូលហេតុមកពីឆ្នាំ២០១២ ធ្លាក់ចំ កាលបរិច្ឆេទខួប ដ៏សំខាន់ៗមួយចំនួន ក្នុងប្រវត្តិសាស្ត្ររុស្ស៊ី ឧទាហរណ៍ ខួបគម្រប់២០០ឆ្នាំ នៃជ័យជំនះ កងទ័ព និង ប្រជាជនរុស្ស៊ី ក្នុងសង្គ្រាមការពារមាតុភូម៌ ឆ្នាំ១៨១២ ទល់នឹងអំពើឈ្លានពាន នៃកងទ័ព អធិរាជបារាំង Napoléon។
ជាការរម្លឹក គឺថ្ងៃ១២មិថុនាឆ្នាំ១៨១២នោះ ដែលកងទ័ព Napoléon មានគ្នា៦សែននាក់ បាន លុកចូលទឹកដីរុស្ស៊ី នៅត្រង់ក្រុង Neman ប៉ែកខាងលិចបង្អស់នៃប្រទេសរុស្ស៊ី ដោយ កាលណោះ មានទាហានរុស្ស៊ី តែ២សែន៤ម៉ឺននាក់ប៉ុណ្ណោះ ខំតទល់។ ពេលដែលទ័ពបារាំង បានយាត្រា មកដល់រដ្ឋធានីម៉ូស្គូ មេទ័ពរុស្ស៊ី សេនាប្រមុខ Koutouzov បានអនុវត្តយុទ្ធសាស្ត្រ បំបរបង់ក្រុងម៉ូស្គូចោលតែម្តង ហើយដុតវាឲ្យឆេះទ្រលោមទៅ ពីថ្ងៃ ២ដល់៦កញ្ញា ហេតុដែល បង្ខំ Napoléon ឲ្យដកកងទ័ពខ្លួនចេញពីម៉ូស្គូ ដែលប្រែទៅជា ទីរហោស្ថានទៅហើយ។ គឺក្រោមសម្ពាធទ័ពរុស្ស៊ី ដែល Napoléon បានដកកងទ័ពខ្លួន ចេញអស់រលីងពីទឹកដីរុស្ស៊ី នៅថ្ងៃ១៤ធ្នូ ឆ្នាំ១៨១២នោះ។
ជាការកត់សម្គាល់ប្រទេសរុស្ស៊ីសម័យថ្មីរមែងចងចាំពីកាលបរិច្ឆេទបុរាណៗ ក្នុង ប្រវត្តិសាស្ត្រ ខ្លួន បែបយ៉ាង ថ្ងៃទី៤វិច្ឆិកាឆ្នាំ ១៦១២ គឺតាំងពី ៤០០ឆ្នាំមុនម៉្លេះ កាលដែលប្រជាជនរុស្ស៊ី បានបណ្តេញពួកលុកលុយប៉ូឡូញ ចេញអស់ពីទឹកដីរុស្ស៊ី ហើយប្រកាសទិវាបុណ្យ៤វិច្ឆិកា ជា ”ទិវាឯកភាពជាតិ “ ជំនួស “ទិវាបដិវត្តន៍សង្គមនិយមថ្ងៃ៧វិច្ឆិកា” ដែលធ្លាប់ជាបុណ្យធំបំផុត នៅរុស្ស៊ីសម័យអំណាចសូវៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ