កម្ពុជាត្រូវការធនធានមនុស្សផ្នែកទេសចរ និងបដិសណ្ឋាកិច្ច ៥០ម៉ឺននាក់បន្ថែមទៀត
ស្របពេលដែលវិស័យទេសចរណ៍កំពុងតែរីកចម្រើននៅកម្ពុជា រដ្ឋមន្ត្រីក្រសួងទេសចរណ៍លោក ថោង ខុន បានថ្លែងថា កម្ពុជាត្រូវការធនធានមនុស្សផ្នែកទេសចរ និងបដិសណ្ឋាកិច្ចចំនួន៥០ម៉ឺននាក់បន្ថែមទៀត ដើម្បីផ្គត់ផ្គង់តម្រូវការទីផ្សារ។ លោករដ្ឋមន្ត្រីបានលើកឡើងដូច្នេះ នៅក្នុងឱកាសបើកការតាំងពិព័រណ៍ម្ហូបអាហារនិងភេសជ្ជៈ និងការប្រកួតធ្វើម្ហូបអាហារខ្នាតអន្តរជាតិ នៅក្រុងសៀមរាម កាលពីថ្ងៃទី ៦តុលា ម្សិលមិញនេះ។
ចុះផ្សាយនៅថ្ងៃ៖
ស្តាប់ - ០១:១២
កំណើនភ្ញៀវទេសចរមកកំសាន្តនៅកម្ពុជាកើនឡើងពីមួយឆ្នាំទៅមួយឆ្នាំ ហើយកម្ពុជាក៏ត្រូវការធនធានមនុស្សផ្នែកបម្រើសេវាកម្មទេសចរនេះជាច្រើនម៉ឺននាក់ផងដែរ ខណៈដែលបច្ចុប្បន្នធនធានផ្នែកនេះ កំពុងតែខ្វះខាតនៅឡើយ។
លោកទិត ចន្ថា អ្នកនាំពាក្យក្រសួងទេសចរណ៍បានបញ្ជាក់ប្រាប់វិទ្យុបារាំងថា កម្ពុជាចាំបាច់ត្រូវតែផ្តល់ការបណ្តុះបណ្តាលធនធានមនុស្សដែលមានសមត្ថភាពគ្រប់គ្រាន់ និងធ្វើការផ្លាស់ប្តូរបទពិសោធន៍ទៅវិញទៅមក ដើម្បីទទួលបានចំណេះដឹងប្រកបដោយគុណភាពលើវិស័យទេសចរណ៍និងបដិសណ្ឋាកិច្ច។
លោកទិត ចន្ថា បានបន្តទៀតថាការបណ្តុះបណ្តាលធនធានមនុស្សខាងផ្នែកនេះនឹងត្រូវធ្វើឡើងតាមរយៈរូបភាពជាច្រើនដែលមានដូចជានៅតាមសណ្ឋាគារ ឬក៏ភោជនីយដ្ឋានផ្ទាល់ តាមរយៈអ្នកគ្រប់គ្រងទៅកាន់បុគ្គលិកគ្រប់លំដាប់ថ្នាក់។ ការបណ្តុះបណ្តាលទីពីរគឺធ្វើឡើងតាមរយៈសាលារៀនឯកជន និងទីបីតាមរយៈក្រសួងទេសចរណ៍ ដែលក្រសួងគ្រោងនឹងបើកសាលាបង្រៀនខាងផ្នែកសណ្ឋាគារ និងបដិសណ្ឋាកិច្ចនេះ នៅក្នុងឆ្នាំ២០១៦ខាងមុខ។
សូមបញ្ជាក់ថាភ្ញៀវទេសចរអន្តរជាតិដែលមកទស្សនានៅកម្ពុជាកាលពីឆ្នាំ២០១៤ មានចំនួន ៤លាន៥សែននាក់ ហើយនៅឆ្នាំ២០១៥នេះ មានចំនួនជិត៥លាននាក់។ តាមរយៈតួរលេខកើនឡើងជាលំដាប់នៅប៉ុន្មានឆ្នាំចុងក្រោយនេះ ក្រសួងបានបង្ហាញថានៅឆ្នាំ២០២០ខាងមុខ កម្ពុជានឹងទទួលបានភ្ញៀវទេសចរចំនួន ៧លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ