ឥណ្ឌាបាញ់បង្ហោះយានអវកាសទៅប៉ូលខាងត្បូងនៃឋានព្រះចន្ទ ដើម្បីស្រាវជ្រាវទិន្នន័យ
បន្ទាប់ពីលើកពេលអស់មួយសប្ដាហ៍ នៅទីបំផុតទៅ ឥណ្ឌាបានបាញ់បង្ហោះយានអវកាសរបស់ខ្លួនទៅកាន់ឋានព្រះចន្ទហើយ នៅថ្ងៃចន្ទ ទី២២កក្កដានេះ។ ព្រឹត្តិការណ៍ជាប្រវត្តិសាស្ត្រនេះ ប្រព្រឹត្តធ្វើក្រោមក្រសែភ្នែកឃ្លាំមើលយ៉ាងយកចិត្តទុកដាក់ពីពិភពលោក។ តាមគម្រោង យានអវកាស «ចន្ទ្រយានទី២» របស់ឥណ្ឌា នឹងចុះចតនៅក្បែរប៉ូលខាងត្បូងនៃព្រះចន្ទ ដើម្បីស្រាវជ្រាវប្រមូលទិន្នន័យបញ្ជូនត្រឡប់មកផែនដីវិញ។
ចុះផ្សាយនៅថ្ងៃ៖
ម៉ោង២និង២៣នាទី ម៉ោងនៅក្នុងប្រទេសឥណ្ឌា យានអវកាស «ចន្ទ្រយានទី២» ត្រូវបានបង្ហោះចេញពីស្ថានីយ៍អវកាស Sriharikota ទៅកាន់ឋានព្រះចន្ទ។ ប្រជាជនឥណ្ឌារាប់រយពាន់នាក់ ដែលខកចិត្តនៅពេលការបាញ់បង្ហោះកាលពីថ្ងៃ១៥កក្កដាត្រូវគេលើកពេល បានប្រមូលផ្ដុំគ្នាម្ដងទៀត ដើម្បីទស្សនាការផ្សាយផ្ទាល់នៃព្រឹត្តិការណ៍នេះ ក្នុងទឹកចិត្តរំភើបរីករាយបំផុត។
សូមជម្រាបជូនថា ពីដំបូងឡើយ ឥណ្ឌាចង់បង្ហោះយានអវកាស «ចន្ទ្រយានទី២» ទៅកាន់ឋានព្រះចន្ទតាំងពីថ្ងៃទី១៥កក្កដាមកម្ល៉េះ។ ប៉ុន្តែនៅប្រមាណ៥៦នាទីមុនម៉ោងកំណត់ ទីភ្នាក់ងារអវកាសឥណ្ឌាបានសម្រេចលើកពេលការបាញ់បង្ហោះនោះវិញ ដោយពន្យល់ថា ប្រព័ន្ធបាញ់បង្ហោះជួបប្រទះនឹងបញ្ហាបច្ចេកទេសមួយ។ ទីភ្នាក់ងារអវកាសឥណ្ឌាបានចំណាយពេលមួយសប្ដាហ៍ ដើម្បីដោះស្រាយបញ្ហាបច្ចេកទេសនោះ មុននឹងបាញ់បង្ហោះយានអវកាស ទៅកាន់ឋានព្រះចន្ទ នៅថ្ងៃចន្ទ ទី២២កក្កដានេះ។
នៅក្នុងបេសកកម្មទៅឋានព្រះចន្ទ «ចន្ទ្រយានទី២» ដែលមានទម្ងន់២,៤តោន បាននាំយកទៅជាមួយនូវម៉ាស៊ីនយន្តរ៉ូបូមួយគ្រឿង។ ជារ៉ូបូដែលគេអាចបញ្ជាបានពីចម្ងាយ និងដែលត្រូវចុះចតនៅប៉ូលខាងត្បូងនៃព្រះចន្ទក្នុងអំឡុងខែកញ្ញា ដើម្បីស្រាវជ្រាវប្រមូលទិន្នន័យបញ្ជូនមកកាន់ភពផែនដីវិញ។ តាមគម្រោង សកម្មភាពស្រាវជ្រាវប្រមូលទិន្នន័យលើផ្ទៃដីព្រះចន្ទរបស់យានអវកាសឥណ្ឌា មានរយៈពេលអូសបន្លាយពីថ្ងៃរះដល់ថ្ងៃលិចលើឋានព្រះចន្ទ ស្មើនឹងប្រមាណ១៤ថ្ងៃលើភពផែនដី។
សម្រាប់ឥណ្ឌា ការបាញ់បង្ហោះយានអវកាសទៅឋានព្រះចន្ទនាពេលនេះ គឺជាមោទនភាពថ្មីរបស់ជាតិ។ ឥណ្ឌាមានបំណងក្លាយខ្លួនជាមហាអំណាចអវកាសទី៤ បន្ទាប់ពីអាមេរិក ចិន និងរុស្ស៊ី ដែលបញ្ជូនយាននិងម៉ាស៊ីនរ៉ូបូ ទៅចុះចតលើផ្ទៃព្រះចន្ទ។ នៅឆ្នាំ២០២២ខាងមុខ ភ្នាក់ងារអវកាសឥណ្ឌា មានគម្រោងបញ្ជូនអវកាសយានិករបស់ខ្លួន ឲ្យហោះទៅក្នុងទីអវកាសជាលើកដំបូងនៅឆ្នាំ២០២២។ តាមរយៈបេសកកម្មនោះ ឥណ្ឌារំពឹងថា នឹងអាចចុះកិច្ចសន្យាពាណិជ្ជកម្ម ដើម្បីបាញ់បង្ហោះផ្កាយរណប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ