អូតង់ និងរុស្ស៊ីផ្តើមកិច្ចសន្ទនារវាងគ្នាជាថ្មី
នៅថ្ងៃពុធ ទី២០ មេសានេះ រដ្ឋមន្រ្តីការបរទេសនៃប្រទេសសមាជិកអង្គការអូតង់ និងរដ្ឋមន្រ្តីការបរទេសរុស្ស៊ីបើកកិច្ចប្រជុំជាថ្មីក្នុងទីក្រុងព្រុចសែល ប្រទេសបែលហ្ស៊ិក។ នេះជាកិច្ចប្រជុំលើកទី១ បន្ទាប់ពីបានអវត្តមានអស់រយៈពេល ២ឆ្នាំដោយសារតែសំណុំរឿងតានតឹងមួយចំនួន ពិសេសវិបត្តិអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
គឺកាលពី ២ឆ្នាំមុន ពោលក្នុងខែមិថុនា ឆ្នាំ ២០១៤ ដែលប្រមុខការទូតទាំង ២៨រូបនៃក្រុមប្រទេសសមាជិករបស់អង្គការអូតង់ និងប្រមុខការទូតរុស្ស៊ីបានបើកកិច្ចប្រជុំចុងក្រោយរបស់ខ្លួន។ ហើយតាំងពីពេលនោះមក ពោលតាំងពីរុស្ស៊ីបានក្រសោបយកទឹកដីគ្រីមេរបស់ប្រទេសអ៊ុយក្រែនមក អូតង់ក៏បានឈប់ជ្រលក់មាត់រករុស្ស៊ី ព្រមទាំងព្យួររាល់កិច្ចសហប្រតិបត្តិការទាំងអស់ជាមួយក្រុងមូស្គូ។ ទង្វើរបស់អូតង់កាលណោះ គឺដើម្បីប្រឆាំងនឹងរុស្ស៊ីដែលបានលេបត្របាក់យកទឹកដីគ្រីមេរបស់អ៊ុយក្រែន និងក៏ដើម្បីប្រឆាំងនឹងរុស្ស៊ីដែលបានចេញមុខគាំទ្រទាំងផ្លូវអាវុធ និងកម្លាំងទ័ពដល់ពួកបះបោរអ្នកទាមទារផ្តាច់ទឹកដីនិយមនៅប៉ែកខាងកើតប្រទេសអ៊ុយក្រែន។
ក្នុងរយៈពេល ២ឆ្នាំកន្លងទៅ សង្រ្គាមពាក្យសម្តីរវាងអូតង់ និងរុស្ស៊ីបានកើតមានជាហូរហែ នោះបើទោះបីជាទ្វារនៃកិច្ចសន្ទនានយោបាយរវាងភាគីទាំងពីរនៅបើកចំហជានិច្ចក៏ដោយ។ ថ្ងៃនេះ និង ២ឆ្នាំក្រោយមក អូតង់ និងរុស្ស៊ីបានព្រមព្រៀងគ្នាវិលមកកាន់តុចរចាជាថ្មីដោយសង្ឃឹមនឹងអាចកាត់បន្ថយភាពតានតឹងរវាងគ្នា។ យ៉ាងណាក៏ដោយ ជំនួបជាថ្មីរវាងអូតង់ និងរុស្ស៊ីពេលនេះត្រូវបានគេចាត់ទុកជាជំនួបនិមិត្តរូបដែលនឹងគ្មានលទ្ធផលអ្វីជាដុំកំភួនទេ។
តែក្រុមអ្នកវិភាគបានមើលឃើញថា ពិតមែនជាជំនួបនិមិត្តរូបក៏ដោយ ក៏មានសំណុំរឿងធំៗ និងសំខាន់ៗជាច្រើនដែលភាគីទាំងពីរត្រូវលើកយកទៅជជែក។ សំណុំរឿងធំៗ និងសំខាន់ៗទាំងនោះរួមមាន បញ្ហាប្រទេសអាហ្វហ្កានីស្ថាន ឬមួយក៏វិបត្តិអ៊ុយក្រែនដោយតម្រូវឲ្យមានការអនុវត្តន៍ពេញលេញនូវកិច្ចព្រមព្រៀងទីក្រុងមីនស្កិ៍។ ប្រធានរឿងបច្ចុប្បន្នភាពក្តៅគគុកមួយទៀត គឺការប្រឈមមុខដាក់គ្នារវាងរុស្ស៊ី និងអូតង់នៅសមុទ្របាល់ទិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ