បារាំងរឹតចំណងយោធាជាមួយជប៉ុន នៅ២ថ្ងៃមុនទទួលប្រធានាធិបតីចិន នៅប៉ារីស
បារាំង និងជប៉ុនបានព្រមព្រៀងគ្នាដើម្បីបើកការចរចាជាផ្លូវការស្តីពីការចូលទៅប្រើព័ត៌មានកងទ័ពគ្នាទៅវិញ ទៅមក។ នេះបើតាមការប្រកាសរបស់វិមានប្រធានាធិបតីបារាំង នៅបន្ទាប់ពីលោកប្រធានាធិបតីបារាំង លោកម៉ាក្រុងទទួលជួបនាយករដ្ឋមន្រ្តីជប៉ុន ហ្វូមីអូ គីស៊ីដា កាលពីថ្ងៃព្រហស្បតិ៍ទី ២ឧសភា នៅវិមានអេលីហ្សេ។ មានដែនដីកោះរបស់ខ្លួននៅមហាសមុទ្រប៉ាស៊ីហ្វិក បារាំងបានដៅពង្រឹងតួនាទីរបស់ខ្លួន នៅអាស៊ីប៉ាស៊ីហ្វិក ដោយខិតចូលទៅជិតជប៉ុន តាមរយៈការធ្វើសមយុទ្ធរួមគ្នាជាច្រើនលើក។ បារាំងទទួលនាយករដ្ឋមន្រ្តីជប៉ុន និងប្រកាសរឹតចំណងមិត្តភាពជាមួយជប៉ុន ក្នុងវិស័យយោធា នៅតែ ៣ថ្ងៃមុនដែលបារាំងត្រូវទទួលប្រធានាធិបតីចិន លោកស៊ី ជីនពីងដែលត្រូវធ្វើទស្សនកិច្ចផ្លូវរដ្ឋនៅបារាំង ចាប់ពីថ្ងៃចន្ទទី ៦ឧសភា។
ចុះផ្សាយនៅថ្ងៃ៖
ស្តាប់ - ០៣:១៤
នៅក្នុងបរិបទដែលភាពតានតឹង កាន់តែមានច្រើន នៅតំបន់ឥណ្ឌូប៉ាស៊ីហ្វិក បារាំងត្រូវការរឹតចំណងសម្ព័ន្ធភាពជាមួយប្រទេសនៅក្នុងតំបន់។ ជាក់ស្តែង នៅក្នុងពេលទទួលជួបនាយករដ្ឋមន្រ្តីជប៉ុន លោកហ្វូមីអូ គីស៊ីដា នៅទីក្រុងប៉ារីស កាលពីថ្ងៃព្រហស្បតិ៍ រដ្ឋាភិបាលបារាំងបញ្ចុះបញ្ចូលបានសម្រេចឲ្យភាគីជប៉ុនយល់ព្រមបើកការចរចាដើម្បីឲ្យកងទ័ពរបស់ប្រទេសទាំងពីរអាចចូលទៅប្រើប្រាស់ព័ត៌មានគ្នាទៅវិញ ទៅមក។
យោងតាមការប្រកាសរបស់វិមានប្រធានាធិបតីបារាំង និងរដ្ឋាភិបាលជប៉ុន នៅក្រោយជំនួបរវាងប្រធានាធិបតីបារាំងម៉ាក្រុង និងលោកនាយករដ្ឋមន្រ្តីជប៉ុន ហ្វូមីអូ គីស៊ីដា ជប៉ុននិងបារាំងបានយល់ព្រមព្រៀងគ្នាថា នឹងបើកការពិភាក្សាដើម្បីឈានទៅចុះកិច្ចព្រមព្រៀងស្តីពីការចូលប្រើប្រាស់ទៅវិញ ទៅមក ឬជាភាសាអង់គ្លេសថា Reciprocal Access Agreement។
គួរបញ្ជាក់ថា ទោះបារាំងធ្លាប់ចូលរួមធ្វើសមយុទ្ធយោធាជាមួយជប៉ុន ក្នុងទម្រង់ ទ្វេភាគី ឬច្រើនប្រទេស នៅប៉ុន្មានឆ្នាំមកនេះ ហើយនិងការទាមទាររបស់បារាំងនៅ១ឆ្នាំនេះ ប៉ុន្តែ ជប៉ុននៅមិនទាន់យល់ព្រមចុះកិច្ចព្រមព្រៀងកងទ័ពស្តីពីការចូលប្រើប្រាស់គ្នាទៅវិញ ទៅមកជាមួយបារាំង។
ទើបតែនៅក្នុងទស្សនកិច្ចរបស់លោកនាយករដ្ឋមន្រ្តី គីស៊ីដានៅទីក្រុងប៉ារីស កាលពីថ្ងៃព្រហស្បតិ៍ ដែលភាគីទាំងពីរប្រកាសថា ភាគីទាំងពីរនឹងបើកការចរចា ដែលអាចត្រូវការពេលវេលាដល់ទៅ១ឆ្នាំ ទម្រាំបង្កើតចេញកិច្ចព្រមព្រៀងស្តីពីការរឹតចំណងយោធារវាងប្រទេសទាំងពីរ។
សព្វថ្ងៃនេះ មានប្រទេសបី គឺអាមេរិក អង់គ្លេស និងអូស្ត្រាលី ដែលបានចុះកិច្ចព្រមព្រៀង ស្តីពីចូលទៅប្រើប្រាស់ទៅវិញ ទៅមក ជាមួយជប៉ុន នៅក្នុងគោលដៅរឹតចំណងយោធារវាងគ្នាដើម្បីទប់ទល់នឹងការពង្រីកឥទ្ធិពលរបស់ចិនដែលចេះតែកើនឡើងខ្លាំងនៅតំបន់ឥណ្ឌូប៉ាស៊ីហ្វិក។
កិច្ចព្រមព្រៀង Reciprocal Access Agreement (RAA) របស់ជប៉ុន ជាមួយអូស្ត្រាលីមាននិយាយពីការសម្រួលដល់ការដាក់ពង្រាយកងកម្លាំងទ័ពស្វ័យការពាររបស់ជប៉ុន និងទាហានអូស្ត្រាលី។ កិច្ចព្រមព្រៀងនេះស្រដៀងគ្នានឹងកិច្ចព្រមព្រៀងជប៉ុន អាមេរិកដែលផ្តោតសំខាន់លើការសម្រួលការដឹកជញ្ជូន និងផ្គត់ផ្គង់អាវុធដើម្បីធ្វើសមយុទ្ធរួមគ្នា និងប្រតិបត្តិការរួមគ្នាក្នុងពេលមានគ្រោះមហន្តរាយ។
មានមូលដ្ឋានទ័ពអាមេរិក ជាមួយវត្តមានទ័ពអាមេរិកជាង ៥៤០០០នាក់ ជប៉ុនបានស្វះស្វែង រឹតចំណងយោធាជាមួយបណ្តាប្រទេសដែលមានក្តីបារម្ភដូចជប៉ុន នោះគឺការពង្រីកឥទ្ធិពលរបស់ចិននៅឥណ្ឌូប៉ាស៊ីហ្វិក។ ការគំរាមរបស់ចិនទៅលើកោះតៃវ៉ាន់ និងជម្លោះដណ្តើមដីកោះជាមួយចិន ជាហេតុផលចំបងដែលធ្វើឲ្យជប៉ុនបំប៉ោងកញ្ចប់ថវិកាយោធា និងចង់ដោះដៃបន្តិចម្តងៗ ពីរដ្ឋធម្មនុញ្ញសន្តិភាព ដែលបានចាប់ចងដៃកងទ័ពជប៉ុនតាំងពីជប៉ុនចាញ់សង្រ្គាមលោកលើកទី២។ ងាយមកនិយាយពីបារាំងដែលមានដីកោះរបស់ខ្លួននៅឥណ្ឌូប៉ាស៊ីហ្វិកដែរ បារាំងត្រូវការជប៉ុនដើម្បីពង្រឹងវត្តមាននៅក្នុងតំបន់ និងចង់សហការជាមួយជប៉ុននៅក្នុងវិស័យឧស្សាហកម្មយោធា។ បារាំងចាប់ផ្តើមសេដ្ឋកិច្ចសង្រ្គាម និងនាំមុខគេ អំពាវនាវឲ្យពង្រឹងកងទ័ពអឺរ៉ុប នៅចំពោះមុខការគំរាមកំហែងរបស់ រុស្ស៊ីដែលកំពុងធ្វើសង្រ្គាមឈ្លានពានអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ