ព្យុងយ៉ាងបាញ់មីស៊ីលបាលីស្ទិកអ៊ីពែរសូនិកស្វាគមន៍ជំនួបកំពូលដើម្បីប្រជាធិបតេយ្យ
នៅថ្ងៃចន្ទទី ១៨ មីនានេះ កូរ៉េខាងជើងបានបាញ់មីស៊ីលបាលីស្ទិករយៈខ្លីជាច្រើនគ្រាប់ ទៅក្នុងសមុទ្ទខាងកើត ឬសមុទ្ទជប៉ុន។ ជាការបាញ់ស្វាគមន៍ដំណើរមកដល់ប្រទេសកូរ៉េខាងត្បូងរបស់លោកប្រមុខការទូតអាមេរិក អង់តូនី ប្លីងកិនផង និងជំនួបកំពូលដើម្បីប្រជាធិបតេយ្យលើកទីបីផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
បើតាមយោធាកូរ៉េខាងត្បូង ព្យុងយ៉ាងបានបាញ់មីស៊ីលបាលីស្ទិក ជាច្រើនគ្រាប់នៅវេលាម៉ោង៧និង៤៤នាទីព្រឹកម៉ោងនៅក្នុងស្រុក ដែលអាចហោះបានចម្ងាយប្រមាណ៣០០គីឡូម៉ែត្រ មុននឹងធ្លាក់ចុះទៅក្នុងសមុទ្ទជប៉ុន។ មីស៊ីលរយៈខ្លីបីគ្រាប់ដែលព្យុងយ៉ាងបានបាញ់មួយខ្សែនៅថ្ងៃនេះ ជាទង្វើគំរាមកំហែងសន្តិសុខនិងសន្តិភាពជប៉ុន តំបន់ ព្រមទាំងសហគមន៍អន្តរជាតិទាំងមូល។ ព័ត៌មានរបស់សេអ៊ូលធ្វើឡើងទន្ទឹមនឹងសេចក្តីប្រកាសថ្កោលទោសរបស់នាយករដ្ឋមន្ត្រីជប៉ុន តាមរយៈសំឡេងអ្នកនាំពាក្យរដ្ឋាភិបាលចំពោះការបាញ់សាកល្បងកាន់តែញយនិងញាប់របស់កូរ៉េខាងជើង។
នេះជាលើកទីពីរហើយ តាំងពីចូលឆ្នាំ២០២៤មក ដែលព្យុងយ៉ាងបានសាកល្បងមីស៊ីលបាលីស្ទិក មានបំពាក់ក្បាលគ្រាប់ លឿនជាងសំលេងអ៊ីពែរសូនិក។ ការបាញ់លើកទីមួយប្រព្រឹត្តនៅថ្ងៃទី១៤មករា ឯការបាញ់លើកនេះធ្វើឡើងតែពីរបីក្រោយការបិទបញ្ចប់លំហាត់សឹកអាមេរិក-កូរ៉េខាងត្បូង និងជួនចំពេលដែលលោកអង់តូនីប្លីងកិន រដ្ឋមន្ត្រីការបរទេសអាមេរិកទើបអញ្ជើញមកដល់ប្រទេសកូរ៉េខាងត្បូង កាលពីក្បាលល្ងាច។ លោកប្រមុខការទូតត្រូវមានជំនួបជាមួយប្រធានាធិបតីកូរ៉េខាងត្បូង លោក យូន សុកយោល និងចូលរួមក្នុងជំនួបកំពូលដើម្បីប្រជាធិបតេយ្យនៅថ្ងៃចន្ទនេះ។
ជំនួបកំពូលដើម្បីប្រជាធិបតេយ្យ ដែលផ្តួចផ្តើមឡើងដោយប្រធានាធិបតីអាមេរិកចូបៃដិន ត្រូវរៀបចំធ្វើជាលើកទីបី នៅក្រុងសេអ៊ូលពីថ្ងៃចន្ទរហូតដល់ថ្ងៃពុធទី ២០មីនា ដោយមានការចូលរួមពីសំណាក់ថ្នាក់ដឹកនាំជាន់ខ្ពស់រដ្ឋាភិបាល និងអង្គការក្រៅរដ្ឋាភិបាល ព្រមទាំងសង្គមស៊ីវិល ជាច្រើននាក់។
ក្រោយជំនួបជាមួយលោកប្រធានាធិបតីយូនសុកយោល លោកអង់តូនីប្លីងកិន បានថ្កោលទោសកូរ៉េខាងជើងនិងបានប្តេជ្ញាជាថ្មីការពារជានិច្ចសន្តិសុខឱ្យសាធារណរដ្ឋកូរ៉េខាងត្បូង។ ប្រមុខការទូតអាមេរិកក៏បានជួបជាមួយសមភាគីកូរ៉េខាងត្បូង និងជជែកអំពីការពង្រឹងសម្ព័ន្ធភាពរវាងវ៉ាស៊ីនតោននិងសេអ៊ូល ក្នុងក្របខ័ណ្ឌនៃនយោបាយដាច់ខាតរារាំង មហិច្ឆតារបស់កូរ៉េខាងជើង។ កាលពីថ្ងៃព្រហស្បតិ៍ អាមេរិកនិងកូរ៉េខាងត្បូងបានបិទបញ្ចប់សមយុទ្ធប្រចាំឆ្នាំ ទ្រង់ទ្រាយធំដែលមានទាហានចូលរួមក្នុងចំនួនដ៏ច្រើនទ្វេដងបើប្រៀបទៅនឹងឆ្នាំ២០២៣ និងដោយមានកងវាយលុកផ្លូវអាកាសនិងការចាប់មីស៊ីលផង។
ជាចម្លើយតបនឹងសមយុទ្ធ កូរ៉េខាងជើងតែបាញ់មីស៊ីលតបតវិញ ប៉ុន្តែសម្រាប់អ្នកជំនាញ ការបាញ់មីស៊ីលរបស់ព្យុងយ៉ាងលើកនេះ ជាសារបង្កប់អត្ថន័យដ៏ច្បាស់លាស់មួយថាកូរ៉េខាងជើងពិតជាមានសមត្ថភាពធ្វើសកម្មភាពគ្រប់ពេល ទោះប្រមុខការទូតអាមេរិកកំពុងស្ថិតនឹងកន្លែងក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ