លោកពូទីនប្រកាសអួតថា អាវុធនុយក្លេអ៊ែររបស់រុស្ស៊ី ទំនើបជាងរបស់អាមេរិក
នៅថ្ងៃទី១៥មីនា ប្រជាជនរុស្ស៊ីនឹងត្រូវទៅបើឆ្នោតជ្រើសរើសប្រធានាធិបតី ដែលគេជឿថាគ្មាននរណាអាចយកឈ្នះបេក្ខភាព របស់លោកពូទីន បាននោះឡើយ។ នៅក្នុងបទសម្ភាសន៍តាមទូរទស្សន៍ ផ្សាយកាលពីយប់ថ្ងៃពុធ លោកពូទីនថ្លែងសារជាថ្មីម្តងទៀត គំរាមអំពីសង្គ្រាមនុយក្លេអ៊ែរ។ លោលពូទីនប្រកាសថា សព្វាវុធនុយក្លេអ៊ែររបស់រុស្ស៊ី ទំនើបជាងអាវុធនុយក្លេអ៊ែររបស់អាមេរិក តែលោកថារុស្ស៊ីគ្មានចេតនាណា ប្រើអាវុធនុយក្លេអ៊ែរទេ ប្រសិនបើអធិបតេយ្យភាពរបស់រុស្ស៊ី មិនត្រូវបានគេគំរាមទេនោះ។
ចុះផ្សាយនៅថ្ងៃ៖
ស្តាប់ - ០២:០២
ក្នុងបទសម្ភាសន៍វែងអន្លាយតាមទូរទស្សន៍ជាតិរុស្ស៊ី លោកពូទីនបាននិយាយគំរាមដូចសព្វមួយដង អំពីសង្គ្រាមដែលអាចរាលដាលជាសង្គ្រាមនុយក្លេអ៊ែរ ប្រសិនបើប្រទេសលោកខាងលិច នៅតែបន្តជួយអ៊ុយក្រែន។ ក្នុងន័យបញ្ចើចបញ្ចើ លោកប្រធានាធិបតីរុស្ស៊ី បានលើកឡើងថា បើនិយាយពីប្រព័ន្ធបាញ់អាវុធនុយក្លេអ៊ែរធន់ធំ គឺមានតែរុស្ស៊ី និងអាមេរិកទេដែលមាន។ តែលោកពូទីនបានអួតថា ត្រង់ចំណុចនេះ ទាំងបច្ចេកវិទ្យា ទាំងគ្រឿងផ្សំនុយក្លេអ៊ែរ គឺរុស្ស៊ីទំនើបជាងរបស់អាមេរិក។
លោកពូទីន បានបន្ថែមទៀតថា រុស្ស៊ីបានត្រៀមខ្លួនរួចហើយ ប្រសិនបើមានសង្គ្រាមនុយក្លេអ៊ែរ ក៏ប៉ុន្តែបើនិយាយថារុស្ស៊ីចង់ធ្វើសង្គ្រាមនេះ គឺមិនទេ រុស្ស៊ីមិនដែលគិតថាចង់ប្រើអាវុធនុយក្លេអ៊ែរ នៅអ៊ុយក្រែននោះទេ។ លោកពូទីនបានពន្យល់ថា រហូតមកទល់ពេលនេះ រុស្ស៊ីគ្មានហេតុផលអ្វី ដែលត្រូវទៅប្រើអាវុធមហាប្រល័យនេះទេ។ ប្រធានាធិបតីរុស្ស៊ីបន្តថា រុស្ស៊ីមានទ្រឹស្តីយោធា ដែលអនុញ្ញាឲ្យប្រើអាវុធនុយក្លេអ៊ែរបាន ល្គឹកណា ទាល់តែ ជីវិតរបស់ប្រទេសរុស្ស៊ីត្រូវគេគំរាម ឬមួយអធិបតេយ្យភាពនិងឯករាជ្យភាពរបស់រុស្ស៊ី ត្រូវបានគេវាយប្រហារ។
គួរកត់សំគាល់ថា សំដីខាងលើរបស់លោកពូទីននេះ គឺជាសារគំរាមដោយប្រយោលថា រុស្ស៊ីអាចប្រើអាវុធនុយក្លេអ៊ែរ ប្រសិនបើរុស្ស៊ីចាត់ទុកត្រូវគេគំរាមវាយប្រហារ។ ក្នុងបរិបទដែលក្រុមប្រទេសលោកខាងលិច ក៏ដូចជាអូតង់កំពុងប្រឹងប្រែងប្រមូលកម្លាំង ដើម្បីជួយអ៊ុយក្រែន គឺរុស្ស៊ីអាចយកចំណុចនេះទៅបកស្រាយថាវាជាការគំរាមមកលើរុស្ស៊ី ក៏ថាបាន។
ភ្លាមៗក្រោយសំដីអួតរបស់លោកពូទីននេះ សេតវិមានបានប្រកាសថា គឺនឹងមិនកែប្រែអ្វី ទៅលើយុទ្ធសាស្ត្រនុយក្លេអ៊ែររបស់អាមេរិកឡើយ។ លោកស្រី Karine Jean Pierre អ្នកនាំពាក្យសេតវិមាន បានប្រាប់អ្នកកាសែតថា យោងតាមព័ត៌មាន និងទិន្នន័យដែលគេប្រមូលបាន គឺគ្មានសញ្ញាណណាមួយ បញ្ជាក់ថា រុស្ស៊ីកំពុងត្រៀមប្រើអាវុធនុយក្លេអ៊ែរ នៅអ៊ុយក្រែននោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ