JO-2024៖ លោកម៉ាក្រុងសម្ពោធភូមិអូឡាំពិក ត្រៀមទទួលអត្តពលិកជាង១៤០០០នាក់
នៅប្រមាណ៥ខែទៀត បារាំងនឹងធ្វើជាម្ចាស់ផ្ទះរៀបចំការប្រកួតកីឡាអូឡាំពិក រដូវក្តៅ នៅទីក្រុងប៉ារីស។ សំណង់ហេដ្ឋារចនាសម្ព័ន្ធនានា កំពុងត្រូវបានគេជួសជុលនិងសាងសង់ យ៉ាងសស្រាក់សស្រាំ។ កាលពីថ្ងៃព្រហស្បតិ៍ ទី២៩កុម្ភៈ លោកប្រធានាធិបតីបារាំង អេម៉ានុយអែល ម៉ាក្រុង បានទៅបើកសម្ពោធភូមិអូឡាំពិក នៅខាងជើងក្រុងប៉ារីស ជាទីកន្លែងដែលបារាំងនឹងទទួលអត្តពលិកទាំងអស់ឲ្យស្នាក់នៅ។ សំណង់ភូមិអូឡាំពិក ដែលលោកម៉ាក្រុង បានអួតសរសើរថា ជាគម្រូទាំងផ្នែកសង្គម និងបរិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៦
ថ្លែងទៅកាន់ក្រុមការងារសាងសង់ភូមិអូឡាំពិក ដែលស្ថិតនៅសង្កាត់ Saint-Denis ខាងជើងទីក្រុងប៉ារីស លោកម៉ាក្រុងបានពោលថា៖ “យើងទាំងអស់គ្នា កំពុងចូលរួមធ្វើដំណើរផ្សងព្រេងដ៏អស្ចារ្យមួយ រួមគ្នា”។ លោកម៉ាក្រុង បានបន្តថា ភូមិអូឡាំពិកជាទីតាំងស្នូ នៃការប្រកួតកីឡាអូឡាំពិកនៅប៉ារីស ដែលបារាំងបានចាប់ផ្តើមសាងសង់ ចំណាយពេលអស់៧ឆ្នាំ នឹងក្លាយជាកំណត់ត្រាប្រចាំសតវត្សសម្រាប់បារាំង។
លោកម៉ាក្រុងបានអបអរទៀតថា ទោះបីជាមានបញ្ហាអាក់ខានដោយសារតែវិបត្តិកូវីដ១៩ តែក្រុមការងារសាងសង់ បានប្រឹងប្រែងគោរពកាលវិភាគសាងសង់ នៅក្នុងលក្ខខណ្ឌការងារគួរជាទីយកគម្រូតាម ជាពិសេសគឺទាក់ទិននឹង ការគោរពលក្ខខណ្ឌសុវត្ថិភាពរបស់បុគ្គលិក និងពលករសំណង់ទាំងអស់។
ក្នុងឱកាសបើកសម្ពោធភូមិអូឡាំពិកនេះ លោក Nicolas Ferrand អគ្គនាយកក្រុមហ៊ុន Solideo ដែលជាក្រុមហ៊ុនទទួលបន្ទុកការងារប្រគល់សំណង់អូឡាំពិក បានប្រគល់កូនសោជានិម្មិតរូប ជូនលោក Tony Estanguet ប្រធានគណៈកម្មាធិការរៀបចំការប្រកួតកីឡាអូឡាំពិកនៅប៉ារីស។ លោក Nicolas Ferrand បានថ្លែងថា សំណង់ភូមិអូឡាំពិករបស់បារាំង មិនត្រឹមតែជាមុខមាត់កិត្តិយសរបស់បារាំងប៉ុណ្ណោះទេ តែសំណង់នេះបានចារកំណត់នូវ គម្រូជាច្រើន នៅក្នុងវិស័យស្ថាបត្យកម្មទំនើប នៃសតវត្សទី២១។
សូមបញ្ជាក់ថា ភូមិអូឡាំពិករបស់បារាំង នឹងត្រូវទទួលអត្តពលិក ទាំងអស់ប្រមាណជាង១៤០០០នាក់ ដែលនឹងមកចូលរួមប្រកួតកីឡាអូឡាំពិក ទីក្រុងប៉ារីស នៅខែកក្កដាខាងមុខ។ មានទំហំផ្ទៃដី ៥២ហិកតា ភូមិអូឡាំពិកបារាំង មានអគារសរុប៨២អគារ ចែកជាផ្ទះអាប៉ាតឺម៉ង់ត៍ ចំនួន៣០០០ ដែលមានបន្ទប់សរុប ៧២០០បន្ទប់។ បន្ទប់នីមួយៗមានទំហំ ១២ម៉ែត្រក្រឡា ទទួលកីឡាករស្នាក់នៅចំនួន២នាក់។ បច្ចុប្បន្នក្រុមការងារសាងសង់ កំពុងតែពន្លឿនការបំពាក់គ្រឿងសង្ហារឹមចាំបាច់ នៅតាមបន្ទប់។ ទៅតាំងញ៉ាំអាហារធំមួយ នឹងត្រូវសាសង់ ដែលមានកន្លែងអង្គុយសរុប ៣២០០កន្លែង ជាមួយនឹងម្ហូបអាហារ៦រស់ជាតិផ្សេងគ្នា មានទាំងម្ហូបបែបបារាំង បែបអ៊ីតាលី និងម្ហូបអាស៊ីជាដើម។
លោក Laurent Michaud ប្រធានភូមិអូឡាំពិក បានអះអាងថាសំណង់អគារ ព្រមទាំងបរិក្ខាប្រើប្រាស់ទាំងអស់នៅក្នុងបន្ទប់ ត្រូវបានស្ថាបនាឡើងជាមួយកីឡាករ និងដើម្បីកីឡាករ។ មានលំហនិងការរៀបចំ ប្រៀបបីដូចជាទីក្រុងមួយ ភូមិអូឡាំពិកបារាំងនឹងមានហាងលក់ទំនិញ១ ស្នងការដ្ឋាននគរបាល១ មន្ទីរពេទ្យ១បំពាក់ដោយបរិក្ឋាពេទ្យទំនើបៗសម្រាប់កីឡាករ ទីតាំងហាត់ប្រាណ និងមានទាំងហាងកាត់សក់ផង។ ការធ្វើដំណើរនៅក្នុងភូមិអូឡាំពិក គេអាចជិះកង់ ឬជិះរថយន្តអគ្គីសនី ដែលនឹងដំណើរការពេញ២៤ម៉ោង។ ពោលគឺភូមិអូឡាំពិកនេះ ត្រូវបានគេគិតគូរឡើង ដោយធ្វើយ៉ាងណា ឲ្យកីឡាករទាំងអស់ស្នាក់នៅដោយផាសុខភាព មិនខ្វះអ្វី និងមានបរិយាកាសភាតរភាព សាមគ្គីភាព។
គួរបញ្ជាក់ដែរថា ក្រោយចប់ការប្រកួតកីឡាអូឡាំពិក និងកីឡាប៉ារ៉ាឡាំពិក សំណង់អគារក្នុងភូមិអូឡាំពិកភាគខាងជើងទីក្រុងប៉ារីសនេះ នឹងត្រូវកែប្រែឲ្យក្លាយជាផ្ទះ សម្រាប់ទទួលប្រជាជនស្នាក់នៅ និងសម្រាប់ជាទីតាំងធ្វើការរបស់ក្រុមហ៊ុននានាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ