សភាអឺរ៉ុប បោះឆ្នោតអនុម័តច្បាប់ រឹតត្បិតការនាំចេញសំរាមប្លាស្ទិក និងកាកសំណល់គ្រោះថ្នាក់
សភាអឺរ៉ុបនៅទីក្រុងស្ត្រាសបួរ កាលពីថ្ងៃអង្គារទី២៧កុម្ភៈ បានបោះឆ្នោតអនុម័តច្បាប់ថ្មីមួយ ដើម្បីពង្រឹង និងរឹតត្បិតការនាំចេញកាកសំណល់ប្លាស្ទិក ព្រមទាំងកាកសំណល់ដែលអាចបង្កគ្រោះថ្នាក់ផ្សេងទៀត។ ចាប់ពីពេលនេះទៅ ប្រទេសអឺរ៉ុប មិនអាចនាំចេញកាកសំណល់ទាំងនេះ ទៅកាន់ប្រទេសផ្សេងដែលមិនមែនជាសមាជិកអង្គការ OCDE បានទេ ល្គឹកណាទាល់តែគោរពឲ្យបាន នូវលក្ខខណ្ឌសុវត្ថិភាពបរិស្ថានមួយចំនួន។
ចុះផ្សាយនៅថ្ងៃ៖
ស្តាប់ - ០៣:០៧
សមាជិកសភាអឺរ៉ុប ៥៨៧នាក់ ពោលគឺសឹងតែទាំងអស់ បានបោះឆ្នោតយល់ព្រម ទទួលយកកិច្ចព្រមព្រៀង ដែលអ្នកចរចានៃសភាអឺរ៉ុប និងប្រទេសសមាជិកអឺរ៉ុប បានត្រូវរ៉ូវគ្នា កាលពីខែវិច្ឆិកា។ ជាបឋម អត្ថបទកិច្ចព្រមព្រៀងនេះ មានខ្លឹមសាររក្សាការហាមឃាត់ ការនាំចេញសំរាមដែលធម្មតាត្រូវកំទេចចោល ទៅកាន់ប្រទេសផ្សេងទៀត ក្រៅពីអឺរ៉ុប។
រីឯកាកសំណល់ ដែលអាចបង្កគ្រោះថ្នាក់ ហើយដែលធម្មតាត្រូវយកទៅកែច្នៃ គឺប្រទេសអឺរ៉ុបអាចនាំចេញបាន ទៅកាន់ប្រទេសដែលជាសមាជិក របស់អង្គការ OCDE តែប៉ុណ្ណោះ។ បន្ថែមពីនេះ អត្ថបទថ្មីនេះបានកំណត់លក្ខខណ្ឌបន្ថែមថា ប្រទេសសមាជិកអង្គការOCDE ដែលអាចទទួលការនាំចូលកាកសំណល់ទាំងនោះបាន គឺទាល់តែមាន ហេដ្ឋារចនាសម្ព័ន្ធចាំបាច់គ្រប់គ្រាន់ និងត្រឹមត្រូវ ដើម្បីស្តុក និងកែច្នៃសំរាម ដោយគោរពទៅតាមក្រិត្យក្រមបរិស្ថាន។ អង្គភាពវិសោធនកម្មឯករាជ្យមួយ នឹងត្រូវគេប្រគល់តួនាទី វាយតម្លៃលើលក្ខខណ្ឌទាំងអស់នេះ ហើយដែលក្រុមហ៊ុននាំចេញសំរាម អាចចូលទៅពិនិត្យមើលព័ត៌មានទាំងនោះបាន នៅក្នុងបញ្ជីរួមរបស់គណៈកម្មការអឺរ៉ុប មុននឹងសម្រេចនាំសម្រេច នាំសំរាមចេញទៅកាន់ប្រទេសណាមួយ។
ដោយឡែកទាក់ទិននឹងកាកសំណល់ប្លាស្ទិកវិញ អត្ថបទច្បាប់ថ្មីនេះ បានហាមឃាត់ការនាំចេញទាំងស្រុង ទៅកាន់ប្រទេសដែលមិនមែនជាសមាជិកOCDE ទោះបីជាប្រភេទកាកសំណល់ដែលមិនបង្កគ្រោះថ្នាក់ក៏ដោយ។ ក្នុងរយៈពេល៥ឆ្នាំទៀត ប្រសិនបើប្រទេសមិនមែនសមាជិកOCDEណាមួយ ចង់ស្នើសុំមកកាន់គណៈកម្មការអឺរ៉ុប ថាចង់នាំចូលកាកសំណល់ប្លាស្ទិក គឺប្រទេសនោះ ត្រូវបង្ហាញឲ្យបានច្បាស់ ថាខ្លួនគោរពលក្ខខណ្ឌដ៏តឹងតែង នៃវិធានការគ្រប់គ្រងសំរាម។
ចំពោះការនាំចេញកាកសំណក់ប្លាស្ទិកទៅកាន់បណ្តាប្រទេសសមាជិក OCDE គឺប្រទេសអឺរ៉ុបអាចធ្វើបាន តែដោយត្រូវគោរព លក្ខខណ្ឌបន្ថែមមួយចំនួនទៀត ដែលតឹងតែងជាងមុន។ ជាក់ស្តែង ដូចជាការគោរពនីតិវិធីផ្តល់ព័ត៌មានជាក់លាក់ ថាគ្មានករណីគ្រោះថ្នាក់ ឬផលប៉ះពាល់ធំដុំកើតឡើងទៅលើបរិស្ថាន និងសុខភាពមនុស្ស។
អត្ថបទច្បាប់ថ្មីរបស់អឺរ៉ុបនេះ បានជំរុញឲ្យប្រទេសសាមជិកទាំងអស់ ត្រូវតែកំណត់វិធានការដាក់ទណ្ឌកម្ម ពិន័យ ឲ្យបានតឹងតែង មានប្រសិទ្ធភាព សមមាត្រ និងអាចធ្វើឲ្យខ្លាចរអា។ ក្នុងករណីជាប់ទោស គឺត្រូវតែមានការពិន័យជាប្រាក់ និងការដកអាជ្ញាបណ្ណនាំចេញជាដើម។
សូមបញ្ជាក់ថា ផ្អែកតាម Eurostat នៅឆ្នាំ២០២២ សហភាពអឺរ៉ុបបាននាំចេញកាកសំណល់ចំនួន ៣២,១ លាន តោន ក្នុងនោះ មាន១២,៤លានតោន គឺនាំចេញទៅតួកគី ៣,៥លានតោន នាំចេញទៅឥណ្ឌា និង១,៦លានតោននាំចេញទៅអេហ្ស៊ីប។ ចិនដែលពីមុនមក ធ្លាប់ជាគោលដៅនាំចេញសំរាមដ៏សំខាន់មួយរបស់ពិភពលោក បានសម្រេចបិទទ្វារលែងទទួលការនាំចូលសំរាមកែច្នៃពីបរទេស ចាប់ពីឆ្នាំ២០១៨ និងបានកាត់បន្ថយបន្តិចម្តងៗ នូវការនាំចូលសំរាមប្លាស្ទិក លោហៈ សាច់ក្រណាត់ និងកំទេចដែកជាដើម។ ចំណែកឥណ្ឌូណេស៊ីវិញ បានបញ្ជូនកាកសំណល់គ្រោះថ្នាក់ ត្រលប់ទៅកាន់ប្រទេសអឺរ៉ុបវិញ បន្ទាប់ពីជន់ជោរដោយកាកសំណល់ ដែលមិនគោរពទៅតាមលក្ខខណ្ឌនាំចូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ