ប្រធានាធិបតីបារាំងមិនទាត់ចោលជម្រើសបញ្ជូនទ័ពទៅជួយអ៊ុយក្រែន
ជាអ្នកផ្តួចផ្តើមបើកជំនួបកំពូលស្តីពីអ៊ុយក្រែននៅទីក្រុងប៉ារីស ប្រធានាធិបតីបារាំង លោកអេម៉ានុយអែល ម៉ាក្រុងបានបង្ហាញការគាំទ្រដោយឥតងាករេសម្រាប់អ៊ុយក្រែន ដែលកំពុងធ្លាក់ថយដៃប្រយុទ្ធនៅក្នុងសមរភូមិ។ នៅក្នុងសន្និសីទកាសែត ក្រោយការបិទបញ្ចប់ជំនួបកំពូលកាលពីយប់ថ្ងៃចន្ទម្សិលមិញ មេដឹកនាំបារាំងបានអំពាវនាវឲ្យសម្ព័ន្ធមិត្តរបស់អ៊ុយក្រែនបោះពួយមួយទំហឹងដើម្បីផ្តល់សព្វាវុធជួយអ៊ុយក្រែន។ បន្ថែមពីនោះ លោកប្រធានាធិបតីបារាំងនៅបានលើកឡើងពីជម្រើសបញ្ជូនទ័ពលោកខាងលិចទៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤១
នៅក្នុងកាលៈទេសៈដែលអ៊ុយក្រែនកំពុងជួបការលំបាក នៅក្នុងសមរភូមិប្រយុទ្ធតទល់នឹងរុស្ស៊ី មេដឹកនាំបារាំងប្រកាសវិធានការថ្មីដែលនឹងទៅផ្តល់សន្ទុះការគាំទ្របន្ថែមសម្រាប់អ៊ុយក្រែន។ លោកប្រធានាធិបតី បារាំងប្រកាសវិធានការផ្តល់ជំនួយសព្វាវុធបន្ថែម សម្រាប់អ៊ុយក្រែន នៅបន្ទាប់ពី លោកប្រធានាធិបតីអ៊ុយក្រែន ហ្សេឡេនស្គី ត្អូញត្អែរប្រាប់សម្ព័ន្ធមិត្តថា រហូតមកដល់ពេលនេះ អ៊ុយក្រែនបានទទួលតែ៣០%ប៉ុណ្ណោះ នៃចំនួនគ្រាប់ប្លោង សរុបចំនួន១លានគ្រាប់ដែលអឺរ៉ុបបានសន្យាផ្តល់ជួយអ៊ុយក្រែន។ នៅក្នុងសន្និសីទកាសែត ក្រោយបិទបញ្ចប់ជំនួបកំពូលនៅទីក្រុងប៉ារីស កាលពីថ្ងៃចន្ទ លោកម៉ាក្រុងទទួលស្គាល់ថា សហភាពអឺរ៉ុបបានធ្វើការសន្យាដោយមិនបានគិតល្អិតល្អន់ជាមុន ព្រោះថា ដោយពិតទៅ អឺរ៉ុបខ្លួនឯងគ្មានគ្រាប់ប្លោងចំនួន ១លានគ្រាប់ ដើម្បីអាចផ្តល់ឲ្យអ៊ុយក្រែនទេ។ ប៉ុន្តែ អំណើះតទៅ អឺរ៉ុប និងសម្ព័ន្ធមិត្តរបស់អ៊ុយក្រែនផ្សេងទៀត នឹងព្យាយាម ផ្តល់សន្ទុះជួយអ៊ុយក្រែន ព្រោះគេជឿជាក់ថា បរាជ័យរបស់រុស្ស៊ី នៅក្នុងសមរភូមិអ៊ុយក្រែន សំខាន់ ចាំបាច់ខ្លាំងណាស់សម្រាប់សន្តិសុខ និងស្ថិរភាពនៅអឺរ៉ុប។
នៅចំពោះមុខថ្នាក់ដឹកនាំរបស់បណ្តាប្រទេសសមាជិកសហភាពអឺរ៉ុប ដូចជា លោកនាយករដ្ឋមន្រ្តីអាល្លឺម៉ង់ ប្រធានាធិបតីប៉ូឡូញ នាយករដ្ឋមន្រ្តីហូឡង់ និងរដ្ឋមន្រ្តីការបរទេសអង់គ្លេស កាណាដា អាមេរិក ប្រធានាធិបតីបារាំង លោកម៉ាក្រុង កាលពីថ្ងៃចន្ទ បានប្រកាសបង្កើតសម្ព័ន្ធមិត្តដើម្បីវាយឲ្យចំគោលដៅ ពោលគឺដើម្បីធានាផ្គត់ផ្គង់សព្វាវុធជួយអ៊ុយក្រែន ដូចជា គ្រាប់ មីស៊ីលបាញ់ចម្ងាយមធ្យម ឬមីស៊ីលបាញ់ចម្ងាយឆ្ងាយជាដើម។ នៅថ្ងៃចន្ទ នាយករដ្ឋមន្រ្តីរបស់ប្រទេសឆែកអះអាងថា មានប្រទេសអឺរ៉ុបចំនួន១៥យល់ព្រមចូលរួមនៅក្នុងគម្រោងការដែលផ្តួចផ្តើមដោយប្រទេសឆែក នោះគឺការចូលរួមលុយគ្នាដើម្បីទិញសព្វាវុធពីប្រទេសក្រៅអឺរ៉ុប សម្រាប់យកទៅជួយអ៊ុយក្រែន។ នាយករដ្ឋមន្រ្តីហូឡង់និយាយថា ហូឡង់នឹងចូលរួមវិភាគទាន១០០លានអឺរ៉ូ។ ប្រធានាធិបតីបារាំងលោកម៉ាក្រុង មិនត្រឹមតែបញ្ជាក់ថា បារាំងនឹងចូលរួមក្នុងគម្រោងការរបស់ប្រទេសឆែក ប៉ុន្តែលោកនៅបានលើកឡើងពីជម្រើសបញ្ជូនទ័ពប្រទេសលោកខាងលិចទៅអ៊ុយក្រែន នៅថ្ងៃអនាគត។ សម្រាប់ប្រធានាធិបតីបារាំង ទោះបីជាសព្វថ្ងៃនេះ គេនៅមិនទាន់កុងសង់សុស ដើម្បីបញ្ជូនទ័ពជាផ្លូវការទៅជួយអ៊ុយក្រែន ប៉ុន្តែ គេនឹងធ្វើគ្រប់យ៉ាងដើម្បីកុំឲ្យរុស្ស៊ីឈ្នះសង្រ្គាមនៅអ៊ុយក្រែន។
ទោះការលើកឡើងរបស់ប្រមុខរដ្ឋបារាំងអាចជាសារយុទ្ធសាស្រ្ត ដើម្បីបង្ហាញថា សម្ព័ន្ធមិត្តរបស់អ៊ុយក្រែននៅតែគាំទ្រឥតងាករេសម្រាប់ជួយអ៊ុយក្រែន នៅចំពោះមុខការឈ្លានពានរបស់រុស្ស៊ី ប៉ុន្តែ វាបានទាក់ទាញប្រតិកម្មរិះគន់ខ្លាំងៗពីអ្នកនយោបាយបារាំង។ ភ្លាមៗ ប្រធានបក្សប្រឆាំង ទាំងបក្សឆ្វេង និងស្តាំនិយមជ្រុលរបស់បារាំងបានរិះគន់ប្រធានាធិបតីបារាំងថា កំពុងអូសទាញបារាំងឲ្យធ្លាក់ក្នុងសង្រ្គាម។ សម្រាប់ក្រុមបក្សប្រឆាំង ការប្រលូកខ្លួនធ្វើសង្រ្គាមតទល់នឹងរុស្ស៊ី គឺជារឿងដ៏ឆ្កួតលីលាបំផុត។
ឆ្លើយសំណួររបស់អ្នកកាសែត នៅក្រោយពីសភាហុងគ្រីបោះឆ្នោតយល់ព្រមឲ្យស៊ុយអែត ចូលក្នុងបក្សសម្ព័ន្ធអូតង់ នាយករដ្ឋមន្រ្តីស៊ុយអែត បញ្ជាក់ថា គ្មានទេ ការបញ្ជូនទ័ពទៅអ៊ុយក្រែន។ ប៉ុន្តែ ជាសមាជិកថ្មីចុងក្រោយគេរបស់អូតង់ ស៊ុយអែតនឹងប្រឹងជួយអ៊ុយក្រែន តាមរយៈករបញ្ជូនសព្វាវុធ នាវាចម្បាំង គ្រាប់បែក ប្រព័ន្ធរ៉ាដា ដែលមានតម្លៃសរុប ជាង ៦៣៣លានអឺរ៉ូ ទៅឲ្យអ៊ុយក្រែន។ នៅអាល្លឺម៉ង់ នៅមួយថ្ងៃក្រោយការលើកឡើងរបស់ប្រធានាធិបតីបារាំង លោកនាយករដ្ឋមន្រ្តី អូឡាហ្វ ស្ហុលហ៍ និយាយកាត់ខ្លីថា អូតង់នឹងមិនបញ្ជូនទ័ពទៅអ៊ុយក្រែន។ លើសពីនោះ នាយករដ្ឋមន្រ្តីអាល្លឺម៉ង់បញ្ជាក់ថា អាល្លឺម៉ង់ក៏នឹងមិនបញ្ជូនមីស៊ីលបាញ់ចម្ងាយឆ្ងាយទៅឲ្យអ៊ុយក្រែន ដូចបារាំងនោះទេ ព្រោះថា អាល្លឺម៉ង់មិនចង់លូកដៃកាន់តែជ្រៅទៅក្នុងសង្រ្គាមអ៊ុយក្រែន ដែលមានពាក់ព័ន្ធនឹងរុស្ស៊ីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ