ហេតុអ្វីរុស្ស៊ីប្រកាសស្វែងរកចាប់ខ្លួននាយករដ្ឋមន្ត្រីអេស្តូនី?
រុស្ស៊ីតាមរយៈគេហទំព័ររបស់ក្រសួងមហាផ្ទៃបានប្រកាសនៅថ្ងៃអង្គារទី ១៣ កុម្ភៈពីការស្វែងរកចាប់ខ្លួនលោកស្រីនាយករដ្ឋមន្ត្រីអេស្តូនីកាហ្សា កាឡាស (Kaja Kallas)។ ការប្រកាសរកចាប់ខ្លួនរូបនាយករដ្ឋមន្រ្តីអេស្តូនីនេះជា សឲ្យឃើញជាថ្មីនូវភាពតានតឹងរវាងប្រទេសរុស្ស៊ី និងបណ្តាប្រទេសនៅមាត់សមុទ្របាល់ទិក តាំងពីក្រោយរុស្ស៊ីបានបើកការវាយប្រហារទៅលើអ៊ុយក្រែនកាលពីជិត ២ឆ្នាំមុន។
ចុះផ្សាយនៅថ្ងៃ៖
ស្តាប់ - ០៣:១៥
« លោកស្រីកាឡាសជាប់ឈ្មោះក្នុងបញ្ជីស្វែងរកចាប់ខ្លួននៅរុស្ស៊ីក្នុងបទព្រហ្មទណ្ឌ » នេះជាការបញ្ជាក់របស់ក្រសួងមហាផ្ទៃរុស្ស៊ីនៅលើគេហទំព័រ។ តែសេចក្តីប្រកាសដដែលមិនបានបញ្ជាក់លំអិតទេថា តើឧក្រិដ្ឋកម្ម ឬបទល្មើសបែបណាដែលមេដឹកនាំអេស្តូរូបនេះបានប្រព្រឹត្ត។ ក្រៅពីនាយករដ្ឋមន្រ្តីអេស្តូនី គេឃើញមាន រដ្ឋលេខាធិការអេស្តូនីលោក Taimar Peterkop និងរដ្ឋមន្ត្រីវប្បធម៌លីទុយអានីលោក Simonas Kairys ក៏ជាប់ក្នុងបញ្ជីឈ្មោះស្វែងរកចាប់ខ្លួនដែររបស់រុស្ស៊ីដែរ។
ស្របនឹងប្រភពមួយក្នុងសន្តិសុខជាតិរុស្ស៊ីដែលផ្សាយដោយទីភ្នាក់ងារព័ត៌មានផ្លូវការរុស្ស៊ី TASS មន្ត្រីជាន់ខ្ពស់អេស្តូនីទាំង ២នាក់ និងរដ្ឋមន្ត្រីលីទុយអានីបានជាប់ចោទក្នុងបទបំផ្លិចបំផ្លាញ និងប្រមាថមាក់ងាយលើបណ្តារូបសំណាកដែលឧទ្ទិសដល់វិញ្ញាណក្ខន្ធពួកទាហានសូវៀតក្នុងសម័យសង្គ្រាមលោកលើកទី២។ គួរបញ្ជាក់ថានាប៉ុន្មានឆ្នាំចុងក្រោយនេះ រូបសំណាក និងបូជនីយដ្ឋានជាច្រើនដែលជាមរតកបន្សល់ទុកនៅលើដែនដីប្រទេសបាល់ទិកក្នុងសហភាពសូវៀតនៅក្រោយសង្គ្រាមលោកលើកទី២ត្រូវបានរុះរើ និងរំលំចោល។ ទង្វើនេះមានន័យស្មើនឹងការបដិសេធច្រានចោលកាលសម័យសូវៀត ដ្បិតប្រទេសទាំងនោះសុទ្ធតែចាត់ទុកថាដែនដីខ្លួនត្រូវបានកាន់កាប់ដោយសហភាពសូវៀត។
សព្វថ្ងៃ នៅមានសហគមន៍ជនជាតិភាគតិចរុស្ស៊ីកំពុងបន្តរស់នៅក្នុងប្រទេសអេស្តូនី ឡេត្តូនី លីទុយអានីដែលសុទ្ធសឹងជាអតីតសាធារណរដ្ឋសូវៀត និងដែលបច្ចុប្បន្នបានក្លាយទៅជាសមាជិកសហភាពអឺរ៉ុប និងអង្គការអូតង់ដែលកំពុងមានទំនាក់ទំនងតានតឹងជាមួយរុស្ស៊ី។ ទំនាក់ទំនងនេះថែមទាំងមានបង្កប់ដោយភាពល្អក់ កករដែលកើតចេញពីសង្រ្គាមនៅអ៊ុយក្រែន។ អ្វីដែលប្រទេសបាល់ទិកទាំងនេះកំពុងបារម្ភខ្លាំង គឺខ្លាចរុស្ស៊ីចូលលុកលុយទឹកដីខ្លួនដូចនៅអ៊ុយក្រែន។
កាលពីសប្តាហ៍មុន ក្រសួងការបរទេសរុស្ស៊ីបានកោះហៅភារធារីអេស្តូនី ឡេតូនី និងលីទុយអានីទៅសួរនាំក្នុងរឿងធ្វើវិច្ឆេទកម្មទល់នឹងការបោះឆ្នោតជ្រើសរើសប្រធានាធិបតីរុស្ស៊ីនៅខែមីនាខាងមុខដោយប្រទេសទាំង ៣ បានប្រកែកមិនព្រមធានាសន្តិសុខដល់ការិយាល័យបោះឆ្នោតនៅតាមស្ថានទូតរុស្ស៊ីក្នុងប្រទេសខ្លួន។ នៅពាក់កណ្តាលខែមករាកន្លងទៅថ្មីៗនេះ ឡេតូនី និងអេស្តូនីបានសម្រេចខណ្ឌបញ្ចប់ជាធរមាននូវកិច្ចព្រមព្រៀងស្តីពីការផ្តល់ជំនួយផ្លូវច្បាប់ទៅវិញទៅមកជាមួយរុស្ស៊ីក្រោមហេតុផលរុស្ស៊ីចូលលុកលុយអ៊ុយក្រែន។ ក្នុងខែមករាដដែល អេស្តូនីបានបដិសេធមិនពន្យារសុពលភាពនៃលិខិតស្នាក់នៅរបស់ប្រមុខគ្រិស្តសាសនាអ័រថូដុក្សអេស្តូនីដែលជាពលរដ្ឋរុស្ស៊ីក្រោមហេតុផលថា ប្រមុខគ្រិស្តសាសនាអ័រថូដុក្សរូបនោះជាហានិភ័យសម្រាប់សន្តិសុខជាតិអេស្តូនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ