តួកគីយល់ព្រមឲ្យស៊ុយអែតចូលអូតង់ នៅសល់តែឧបសគ្គហុងគ្រីមួយទៀតទេ
ដំណើរឈានចូលជាសមាជិកអង្គការអូតង់ របស់ប្រទេសស៊ុយអែត កំពុងតែបោះជំហានជិតបានសម្រេចហើយ។ កាលពីថ្ងៃអង្គារ ទី២៣មករា សភាតួកគីបានបោះឆ្នោតយល់ព្រមជាផ្លូវការ ឲ្យស៊ុយអែត អាចចូលជាសមាជិកអង្គការអូតង់។ អូតង់ ក៏ដូចជាបណ្តាប្រទេសអឺរ៉ុប បានអបអរសាទរជាខ្លាំង ចំពោះការយល់ព្រមរបស់តួកគីនេះ។ឧបសគ្គចុងក្រោយ នៅពេលនេះ គឺនៅសល់តែហុងគ្រីមួយទៀតទេ ដែលនៅមិនសម្រេចចិត្តយល់ព្រម។
ចុះផ្សាយនៅថ្ងៃ៖
ស្តាប់ - ០៣:០៨
សមាជិកសភាតួកគីបានបោះឆ្នោត ក្នុងសំឡេងភាគច្រើនលើសលុប យល់ព្រមឲ្យប្រទេសស៊ុយអែត អាចក្លាយជាសមាជិកពេញសិទ្ធិនៃអង្គការសម្ព័ន្ធមិត្តអាត្លង់ទិកខាងជើង ឬហៅកាត់ថាអូតង់។ ដំណឹងនេះ បានមកបិទបញ្ចប់បញ្ហារកាំរកូស ដែលបានអូសបន្លាយពេលប្រមាណ២០ខែ រវាងតួកគី និងបណ្តាប្រទេសសមាជិកផ្សេងទៀតរបស់អូតង់ ដែលចង់ឃើញអូតង់រួមកម្លាំងគ្នាជាធ្លុងមួយ ដើម្បីប្រឈមនឹងការគំរាមរបស់រុស្ស៊ី។
លោក Ulf Kristersson នាយករដ្ឋមន្ត្រីស៊ុយអែត បានថ្លែងអបអរ ចំពោះការយល់ព្រមពីសំណាក់តួកគី ដែលវានឹងបើកផ្លូវឲ្យស៊ុយអែត បោះជំហានចូលកាន់តែកៀក ក្លាយជាសមាជិកអូតង់។ លោក Jake Sullivan ទីប្រឹក្សាសន្តិសុខជាតិអាមេរិក បានអបអរសាទរ និងបានលើកឡើងថា ស៊ុយអែតគឺជាដៃគូដែលរឹងមាំ និងមានសមត្ថភាព ដែលអាចមកជួយពង្រឹងឲ្យអូតង់កាន់តែរឹងមាំ។ លោករដ្ឋមន្ត្រីការបរទេសន័រវែសវិញ បានអះអាងថា បើស៊ុយអែត ក្លាយជាសមាជិកអូតង់ នោះសន្តិសុខរបស់ប្រទេសតំបន់អឺរ៉ុបខាងជើង នឹងកាន់តែរឹងមាំ។
សូមរំលឹកថា ក្រោយរុស្ស៊ីលើកទ័ពចូលឈ្លានពាន ធ្វើសង្គ្រាមនៅអ៊ុយក្រែន ស៊ុយអែតបានប្រញាប់ដាក់ពាក្យសុំចូលអង្គការអូតង់ភ្លាមដែរ។ តែបេក្ខភាពសមាជិកថ្មី ត្រូវការការយល់ព្រមពីប្រទេសសាមជិកចាស់ទាំងអស់។ ដើម្បីបំពេញចិត្តតួកគី ដែលចោទថាស៊ុយអែត ថាជាសំបុកការពារសកម្មជនកួដ ដែលតួកគីចាត់ទុកថាជាក្រុមភេរវកម្មនោះ ស៊ុយអែតបានធ្វើវិសោធនកម្មរដ្ឋធម្មនុញ្ញ និងបានធ្វើច្បាប់ថ្មីប្រយុទ្ធប្រឆាំងភេរវកម្ម។ បន្ថែមពីនេះ លោកអ៊ែរដូហ្កាន់ បានទាមទារលក្ខខណ្ឌ១ទៀត ថាអាមេរិកត្រូវយល់ព្រមលក់យន្តហោះចម្បាំង F-16 មកឲ្យតួកគី។
គួរបញ្ជាក់ថា ឧបសគ្គចុងក្រោយ គឺនៅសល់តែហុងគ្រីមួយប៉ុណ្ណោះ ដែលត្រូវសម្រេចចិត្ត ព្រមឬមិនព្រម ឲ្យស៊ុយអែត ចូលអូតង់។ ព្រឹកថ្ងៃពុធ ទី២៤មករា លោក Jen Stoltenberg អគ្គលេខាធិការអូតង់ បានអំពាវនាវទៅកាន់ហុងគ្រី ថាត្រូវតែ សម្រេចចិត្តផ្តល់ការយល់ព្រមឲ្យបានឆាប់ជាទីបំផុត ព្រោះ បើអូតង់មានស៊ុយអែតជាសមាជិកថែមម្នាក់ទៀត នោះអូតង់នឹងកាន់តែរឹងមាំ ដើម្បីការពារសន្តិសុខទាំងអស់គ្នា។
គួរគត់សំគាល់ថា អស់ជាច្រើនខែមកហើយ ដែលរដ្ឋាភិបាលស្តាំនិយមជ្រុលហុងគ្រី របស់លោក វីកទ័រ អកបាន បានព្យាយាម ស្វែងរកការចំណេញផ្នែកនយោបាយ នៅក្នុងសំណុំរឿងនេះ។ លោកវីកទ័រ អកបាន បានទាមទារឲ្យស៊ុយអែត ត្រូវឈប់រិះគន់ ឈប់ចោទថារដ្ឋាភិបាលលោក មានទំនោរផ្តាច់ការ ប្រសិនបើស៊ុយអែត ចង់ឲ្យហុងគ្រីយល់ព្រមឲ្យចូលអូតង់។ ជាមួយគ្នានេះ លោកវីកទ័រ អកបាន ក៏ចង់ដាក់សំពាធឲ្យអឺរ៉ុប ធ្វើសម្បទានឲ្យខ្លួនកាន់តែច្រើន ជាថ្នូរនឹងការយល់ព្រមរបស់ហុងគ្រី។
ក្រោយបានដំណឹងភ្លើងខៀវ របស់សភាតួកគី លោក វីកទ័រ អកបាន នាយករដ្ឋមន្ត្រីហុងគ្រី បានសរសេរសារតាមបណ្តាញសង្គមX ថា លោកបានផ្ញើលិខិតមួយ អញ្ជើញលោកនាយករដ្ឋមន្ត្រីស៊ុយអែត ឲ្យធ្វើដំណើរមកជួបគ្នានៅប៊ូដាប៉េស្ត ដើម្បីជជែកចរចាគ្នា អំពីបេក្ខភាពរបស់ស៊ុយអែត នៅក្នុងអូតង់។ ប៉ុន្មានម៉ោងក្រោយមក រដ្ឋមន្ត្រីការបរទេសស៊ុយអែត បានអះអាងប្រាប់អ្នកកាសែតថា ស៊ុយអែតមិនមានហេតុផលអ្វី ត្រូវចរចាជាមួយហុងគ្រីនៅថ្ងៃនេះទេ។ ចម្លើយដែលហាក់មានន័យថា ស៊ុយអែតមិនចាញ់ល្បិចជំរិត របស់ហុងគ្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ