ទីភ្នាក់ងារAIEA៖ គ្រាប់មីនត្រូវគេយកទៅកប់សាជាថ្មីនៅក្នុងបរិវេណមជ្ឈមណ្ឌលនុយក្លេអ៊ែរហ្សាប៉ូរីចា
នៅប្រទេសអ៊ុយក្រែន គ្រាប់មីនចាប់ផ្តើមត្រលប់ទៅមានវត្តមាននៅជុំវិញមជ្ឈមណ្ឌលនុយក្លេអ៊ែរហ្សាប៉ូរីចា។ នៅក្នុងសេចក្តីថ្លែងការណ៍ នៅថ្ងៃសុក្រទី ១៩មករា ទីភ្នាក់ងារថាមពលនុយក្លេអ៊ែរអន្តរជាតិ AIEAបានសំដែងក្តីបារម្ភពីគ្រោះថ្នាក់ផ្ទុះគ្រាប់មីន និងថា ការបង្កប់គ្រាប់មីន កំពុងដើរផ្ទុយពីការទាមទាររបស់ទីភ្នាក់ងារAIEA ស្តីពីការធានាសុវត្ថិភាព សន្តិសុខសម្រាប់មជ្ឈមណ្ឌលនុយក្លេអ៊ែរហ្សាប៉ូរីចា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៥
ធ្លាក់ក្រោមការកាន់កាប់របស់កងទ័ពរុស្ស៊ី តាំងសង្រ្គាមឈ្លានពានរុស្ស៊ីនៅអ៊ុយក្រែន នៅឆ្នាំ ២០២២ បញ្ហាសុវត្ថិភាពនៅមជ្ឈមណ្ឌលនុយក្លេអ៊ែរហ្សាប៉ូរីចាបានក្លាយជាកង្វល់សាជាថ្មីរបស់ទីភ្នាក់ងារថាមពលបរិមាណូអន្តរជាតិ AIEA។ នៅក្នុងសេចក្តីថ្លែងការណ៍ កាលពីថ្ងៃសុក្រទី ១៩មករា ទីភ្នាក់ងារAIEAបានសំដែងក្តីបារម្ភព្រោះថា គ្រាប់មីនត្រូវគេកប់ ពង្រាយសាជាថ្មី នៅក្នុងបរិវេណរោងចក្រនុយក្លេអ៊ែរហ្សាប៉ូរីចា។
នៅរោងចក្រអគ្គិសនីហ្សាប៉ូរីចារ ដែលដើរដោយថាមពលនុយក្លេអ៊ែរ ធំជាងគេនៅអឺរ៉ុប AIEA បានបញ្ជូនមន្រ្តីរបស់ខ្លួនឲ្យទៅប្រចាំការផ្ទាល់ នៅទីនោះ តាំងពីខែកញ្ញាឆ្នាំ ២០២២ ពោលគឺនៅប៉ុន្មានខែក្រោយវាធ្លាក់ក្រោមការគ្រប់គ្រងរបស់ទាហានរុស្ស៊ី។ នៅថ្ងៃសុក្រ ទីភ្នាក់ងារថាមពលបរិមាណូ AIEA អះអាងថា គ្រាប់មីនដែលមន្រ្តីរបស់AIEAធ្លាប់ឃើញកន្លងមកត្រូវគេដោះចេញអស់ពីទីតាំងមជ្ឈមណ្ឌលនុយក្លេអ៊ែរ កាលពីខែវិច្ឆិកាឆ្នាំមុន។ ប៉ុន្តែ ថ្មីៗនេះ គេស្រាប់តែឃើញ គ្រាប់មីនត្រូវគេយកមកកប់សាជាថ្មី នៅចន្លោះ របង និងទ្វារចូលអគាររបស់មជ្ឈមណ្ឌលនុយក្លេអ៊ែរហ្សាប៉ូរីចា។ យ៉ាងណាក៏ដោយ តាមAIEA គ្រាប់មីនដែលគេទើបកប់ថ្មីៗនេះ មិនស្ថិតក្នុងតំបន់ធ្វើការរបស់បុគ្គលិកមជ្ឈមណ្ឌលនុយក្លេអ៊ែរឡើយ។
នៅក្នុងសេចក្តីថ្លែងការណ៍របស់ខ្លួន ទីភ្នាក់ងារថាមពលនុយក្លេអ៊ែរអន្តរជាតិត្អូញត្អែរផងដែរថា អ្នកជំនាញរបស់ខ្លួន ដែលប្រចាំការនៅមជ្ឈមណ្ឌលនុយក្លេអ៊ែរហ្សាប៉ូរីចា នៅតែមិនទាន់បានការអនុញ្ញាតឲ្យចូលទៅពិនិត្យមើលទីតាំងដែលមានរ៉េអាក់ទ័រនុយក្លេអ៊ែរទាំង៦។ នៅដើមខែមករានេះ ភាគីរុស្ស៊ីអះអាងថា គេបិទច្រកចូលទៅក្នុងផ្នែកអគារដែលមានរ៉េអាក់ទ័រ ក្នុងហេតុផលសន្តិសុខ។ ប៉ុន្តែ មន្រ្តីជំនាញរបស់ទីភ្នាក់ងារAIEA យល់ថាវាជាការចាំបាច់ សំខាន់ណាស់ដែលគេត្រូវចុះទៅពិនិត្យមើលផ្ទាល់ស្ថានភាពរបស់រ៉េអាក់ទ័រ។ ធ្លាប់រងការបាញ់ផ្លោង និងការវាយប្រហារដ្រូនជាច្រើនដង ដោយសារសង្រ្គាមប្រយុទ្ធគ្នារវាងកងទ័ពរុស្ស៊ី និងអ៊ុយក្រែន មជ្ឈមណ្ឌលនុយក្លេអ៊ែរហ្សាប៉ូរីចាត្រូវប្រឈមនឹងហានិភ័យនៃការលេចធ្លាយវិទ្យុសកម្ម។ បើសិនជាមានផ្ទុះគ្រាប់មីន ឬការបាញ់ផ្លោងត្រូវចំតួរ៉េអាក់ទ័រ ទោះបីជាមិនផ្ទុះដូចអាវុធនុយក្លេអ៊ែរ ប៉ុន្តែ វាអាចធ្វើឲ្យលេចធ្លាយសារធាតុវិទ្យុសកម្មចេញមកក្រៅ។
មួយវិញទៀត ហានិភ័យនៃការលេចធ្លាយវិទ្យុសកម្មនេះ មិនមែនកើតឡើងតែក្នុងករណីបាញ់ប្លោងត្រូវចំតួរ៉េអាក់ទ័រដោយផ្ទាល់នោះទេ។ នៅក្នុងមជ្ឈមណ្ឌលនុយក្លេអ៊ែរ មានទីតាំងផ្សេងទៀត ដែលសុទ្ធតែមានហានិភ័យខ្ពស់ អាចនាំឲ្យមានលេចធ្លាយវិទ្យុសកម្ម ដូចជាទីតាំងស្តុកសារធាតុវិទ្យុសកម្ម ដែលគេប្រើរួច បណ្តាញគ្រប់គ្រងរ៉េអាក់ទ័រ និងជាពិសេស បណ្តាញផ្គត់ផ្គង់អគ្គិសនី ដែលជាកត្តាចាំបាច់បំផុតមិនអាចខ្វះបាន នៅក្នុងការរក្សាសុវត្ថិភាពនុយក្លេអ៊ែរ។ ត្រូវដឹងថា នៅហ្សាប៉ូរីចា ទោះរ៉េអាក់ទ័រនុយក្លេអ៊ែរទាំង ៦ ត្រូវបិទលែងដំណើរការ តាំងពីខែកញ្ញាឆ្នាំ២០២២ ដោយសារការចូលកាន់កាប់របស់កងទ័ពរុស្ស៊ី ប៉ុន្តែ គេនៅតែត្រូវការចរន្តអគ្គិសនីពីប្រភពខាងក្រៅរ៉េអាក់ទ័រទាំងស្រុង ដើម្បីដំណើរការប្រព័ន្ធទឹកត្រជាក់ គ្រប់គ្រងសីតុណ្ហភាពកុំឲ្យស្នូលរ៉េអាក់ទ័ររលាយបញ្ចេញសារធាតុវិទ្យុសកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ