តើគម្រោងវាយប្រហាររបស់ពួកហាម៉ាសទៅលើអ៊ីស្រាអែលកំពុងរាលដាលចូលដល់ទឹកដីអឺរ៉ុប?
សង្រ្គាមរវាងអ៊ីស្រាអែលនិងពួកហាម៉ាសប៉ាឡេស្ទីន មិនមែនកើតមានតែនៅទឹកដីហ្កាហ្សា និងក្នុងតំបន់ជិតខាងអ៊ីស្រាអែល ប៉ុន្តែ កំពុងរាលដាលឆ្លងចូលដល់ទឹកដីអឺរ៉ុប។ នៅថ្ងៃព្រហស្បតិ៍កន្លងទៅ ប៉ូលិសអាល្លឺម៉ង់ចាប់បានជនសង្ស័យ៣រូប ដែល ជាសមាជិករបស់ក្រុមហាម៉ាស នៅក្នុងបទចោទប្រកាន់ រៀបចំផែនការត្រៀមវាយប្រហារ ជនជាតិជ្វីហ្វ ក្នុងទឹកដីអឺរ៉ុប។ នេះបើតាមការលើកឡើងរបស់រដ្ឋអាជ្ញាអាល្លឺម៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ជនសង្ស័យទាំងបីរូបដែលប៉ូលិសអាល្លឺម៉ង់ចាប់ខ្លួនកាលពីថ្ងៃព្រហស្បតិ៍ មាន១នាក់ជាជនជាតិអេហ្ស៊ីប និងពីរនាក់ទៀត មានដើមកំណើតលីបង់។ ជាមួយ ជនជាតិហូឡង់១នាក់ទៀត ដែលត្រូវអាជ្ញាធរហូឡង់ក្រសោបចាប់នៅថ្ងៃព្រហស្បតិ៍ដែរ ពួកគេត្រូវសង្ស័យថា ជាសមាជិកយូរឆ្នាំមកហើយរបស់ក្រុម Ezzedin al-Qassam ដែលជាកម្លាំងប្រដាប់អាវុធរបស់ចលនាហាម៉ាស ប៉ាឡេស្ទីន។
យោងតាមរដ្ឋអាជ្ញាអាល្លឺម៉ង់ នៅដើមឆ្នាំ២០២៣ ថ្នាក់ដឹកនាំរបស់ហាម៉ាសក្នុងទឹកដីលីបង់ បានបញ្ជាឲ្យជនសង្ស័យខាងលើ ស្វែងរកកន្លែងទុកដាក់អាវុធ នៅក្នុងទឹកដីអឺរ៉ុប ដើម្បីត្រៀមវាយប្រហារទៅលើស្ថាប័នជ្វីហ្វនៅអឺរ៉ុប។ ជនសង្ស័យអេហ្ស៊ីប និងលីបង់ បានចុះឡើងទីក្រុងប៊ែរឡាំងដើម្បីរកទិញស្តុកទុកអាវុធ មុននឹងត្រូវប៉ូលិសអាល្លឺម៉ង់ចាប់ខ្លួន នៅថ្ងៃព្រហស្បតិ៍។
នៅក្រោយការចាប់ខ្លួនជនសង្ស័យ ដែលជាសមាជិករបស់ក្រុមហាម៉ាស រដ្ឋមន្រ្តីក្រសួងមហាផ្ទៃអាល្លឺម៉ង់ បានលើកឡើងនៅក្នុងសេចក្តីថ្លែងការណ៍ថា ការការពារសហគមន៍ជ្វីហ្វ នៅទឹកដីអាល្លឺម៉ង់ គឺជាអាទិភាពរបស់រដ្ឋាភិបាល។ ដោយសារផ្ទុះសង្រ្គាមនៅហ្កាហ្សា ជាទីដែលកងទ័ពអ៊ីស្រាអែលកំពុងបើកប្រតិបត្តិការសងសឹក វាយកម្ទេចបណ្តាញហាម៉ាស អាល្លឺម៉ង់បានព្រមានពីការកើនឡើងនៃការគំរាមកំហែងវាយប្រហាររបស់ក្រុមអ៊ីស្លាមនៅទឹកដីអាល្លឺម៉ង់។ នៅខែវិច្ឆិកាមុន រដ្ឋាភិបាលអាល្លឺម៉ង់បានចេញច្បាប់ហាមសកម្មភាព ឬអង្គការដែលមានជាប់ទាក់ទងជាមួយក្រុមហាម៉ាសដែលត្រូវបានអាមេរិក និងប្រទេសអឺរ៉ុបមួយចំនួនចាត់ទុកក្រុមភេរវនិយមអន្តរជាតិ។
នៅថ្ងៃព្រហស្បតិ៍ដែរ អាជ្ញាធរដាណឺម៉ាកបើកប្រតិបត្តិការទ្រង់ទ្រាយធំ ដោយចាប់បានជនសង្ស័យ៣នាក់ ដែលរៀបចំគម្រោងការធ្វើភេរវកម្មនៅក្នុងប្រទេសដាណឺម៉ាក។ ផ្ទុយពីការលើកឡើងរបស់ក្រុមស៊ើបការណ៍សម្ងាត់អ៊ីស្រាអែល ប៉ូលិសដាណឺម៉ាកអះអាងថា ជនសង្ស័យដែលគេបានចាប់ខ្លួន គ្មានជាប់ទាក់ទងនឹងហេតុការណ៍ចាប់ខ្លួនជនសង្ស័យរបស់ក្រុមហាម៉ាសនៅអាល្លឺម៉ង់។
នៅដើមខែនេះ ប្រធានគណៈកម្មការអឺរ៉ុបទទួលបន្ទុកកិច្ចការផ្ទៃក្នុងអឺរ៉ុបបានព្រមានថា អឺរ៉ុបកំពុងប្រឈម រងការគំរាមកំហែងវាយប្រហារភេរវកម្ម នៅក្នុងរដូវបុណ្យណូអែល បុណ្យគ្រិស្តម៉ាស ចុងឆ្នាំនេះ។ ការណ៍នេះធ្វើឲ្យអាជ្ញាធរ នៅតាមបណ្តាប្រទេសអឺរ៉ុប ពង្រាយប៉ូលិស នៅតាមកន្លែងប្រជុំជន ដូចជាផ្សារណូអែល វិហារសាសនា ធានាសុវត្ថិភាព ការពារសន្តិសុខនៅក្នុងពេលពិធីបុណ្យចុងឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ