លោក អ៊ែរដូហ្កាន បដិសេធសំណើអាមេរិកឲ្យផ្តាច់ទំនាក់ទំនងជាមួយនឹងក្រុមហាម៉ាស
ប្រធានាធិបតីតួកគី លោក អ៊ែរដូហ្កាន បានច្រានចោលសំណើរបស់មន្ត្រីជាន់ខ្ពស់របស់សហរដ្ឋអាមេរិក ដែលចង់ឲ្យ រដ្ឋបាលក្រុងអង់ការ៉ា ផ្តាច់ទំនាក់ទំនងជាមួយនឹង ក្រុមចលនាអ៊ីស្លាមប៉ាឡេស្ទីន ហាម៉ាស។ សំណើរបស់មន្ត្រីអាមេរិកនេះ បានដាក់ចេញក្នុងសប្តាហ៍នេះ ហើយចំណែកការសម្រេចបដិសេធរបស់ប្រមុខដឹកនាំតួកគី គឺត្រូវប្រកាសឲ្យដឹងពីបណ្តាញផ្សព្វផ្សាយផ្លូវការរបស់រដ្ឋតួកគី នៅថ្ងៃសៅរ៍ ទី២ធ្នូ។
ចុះផ្សាយនៅថ្ងៃ៖
ស្តាប់ - ០២:១៤
ផ្ទុយខុសឆ្ងាយពីសហរដ្ឋអាមេរិក ដែលចាត់ទុកថា ពួកហាម៉ាស់ជាក្រុមភេរវនិយម គឺថ្នាក់ដឹកនាំតួកគី លោក អ៊ែរដូហ្កាន បានចាត់ទុក ក្រុមហាម៉ាស ថាជា អ្នករំដោះ ដែលការពារទឹកដឹកប៉ាឡេស្ទីន ។ ប្រមុខរដ្ឋតួកគីបានលើកឡើងបែបនេះជាច្រើនលើកច្រើនសា។
ក្នុងអត្ថបទប្រកាសផ្សាយរបស់ទីភ្នាក់ងារព័ត៌មានរដ្ឋតួកគី គឺលោកប្រធានាធិបតីតួកគី ក៏បានពន្យល់ដែរថា ពីដំបូងឡើង ក្រុមហាម៉ាស គឺ ជាបក្សនយោបាយ ហើយបានឈរឈ្មោះឲ្យគេបោះឆ្នោត ហើយក៏ ឈ្នះសំឡេងឆ្នោត បានកាន់អំណាចស្របច្បាប់។ លោក អ៊ែរដូហ្កាន បន្តទៀតថា ប្រទេសតួកគី ដឹកនាំប្រកាន់ជំហរនយោបាយការបរទេសរបស់ខ្លួន ដោយតម្កល់ផលប្រយោជន៍ជាតិនិងប្រជាជនជាធំ ហើយលោក អ៊ែរដូហ្កាន ក៏ថ្លែងក្តីសង្ឃឹមថា សូមឲ្យ បរទេស យល់ពីចំណុចនេះ គឺយល់ពីការថ្លឹងថ្លែងផលប្រយោជន៍ការបរទេសរបស់តួកគី។
ការប្រកាសបែបនេះ បានធ្វើឲ្យ មន្ត្រីជាន់ខ្ពស់សហរដ្ឋអាមេរិក ខកចិត្តខ្លាំងចំពោះទង្វើរបស់តួកគី។ អនុរដ្ឋលេខាធិការ រតនាគារជាតិអាមេរិក ទទួលបន្តុកតាមដានផ្នែកភេរវនិយមនិងហិរញ្ញវត្ថុ លោក Brian Nelson បានសម្តែងក្តីព្រួយបារម្ភពន់ពេក ចំពោះទំនាក់ទំនងរបស់រដ្ឋបាលក្រុងអង់ការ៉ា និងពួកក្រុមហាម៉ាស។ ព្រួយបារម្ភ ក៏ពីព្រោះថា ក្នុងអតីតកាល តួកគី បានជួយលុយជួយកាក់ ដល់ពួកក្រុមហាម៉ាសប៉ាឡេស្ទីន។
ចាប់ពីផ្ទុះសង្គ្រាម ជម្លោះអ៊ីស្រាអែល-ហាម៉ាស ជិត២ខែមកនេះ មន្ត្រីអាមេរិក នៅមិនទាន់ចាប់បានសញ្ញាណពីការផ្ទេរហិរញ្ញវត្ថុ ពីសំណាក់តួកគីទៅហាម៉ាសនៅឡើយទេ។ ទោះយ៉ាងនេះក្តី ក្នុងសប្តាហ៍នេះ លោក Nelson បានអញ្ជើញទៅបំពេញទស្សនកិច្ចនៅតួកគី ហើយនិងស្នើឲ្យតួកគី កុំប្រព្រឹត្តដូចអតីតកាល ហើយថែមទាំងស្នើសុំឲ្យតួកគីផ្តាច់ការទាក់ទងតែម្តងជាមួយពួកហាម៉ាស។ ទីបំផុតទៅ តួកគីបដិសេធសំណើជាផ្លូវការ នៅថ្ងៃសៅរ៍ ទី២ធ្នូ។
គួររំឮកដែរ ថា នៅចុងខែតុលាកន្លងទៅ អ៊ីស្រាអែល ជាសម្ព័ន្ធមិត្តរបស់អាមេរិក បានសម្រេចដកមន្ត្រីទូតទាំងអស់របស់ខ្លួន ចេញពីប្រទេសតួកគី គឺបន្ទាប់ពី តួកគី របស់លោក អ៊ែរដូហ្កាន បានចោទប្រកាន់អ៊ីស្រាអែល ថាបានប្រព្រឹត្តឧក្រិដ្ឋកម្មសង្គ្រាម លើទឹកដីប៉ាឡេស្ទីន។
ជម្លោះអ៊ីស្រាអែល-ហាម៉ាស បានផ្ទុះនៅថ្ងៃទី៧តុលា។ បើតាមរដ្ឋបាលក្រុងហាម៉ាស គឺមកទល់ពេលនេះ មានស្លាប់ពលរដ្ឋប៉ាឡេស្ទីន ១៥ ០០០ នាក់ ពីព្រោះតែការវាយប្រហាររបស់ទ័ពអ៊ីស្រាអែល។ ក្នុងចំណោមនោះ ក្មេងៗក្រោមអាយុ ១៨ ឆ្នាំ ចំនួន ជាង ៦ ពាន់នាក់ ស្លាប់ផុតជីវិត ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ