អ៊ីស្លង់ជម្លៀសប្រជាជនមួយក្រុង ដោយសារខ្លាចគ្រោះថ្នាក់ផ្ទុះភ្នំភ្លើង
អ៊ីស្លង់ប្រកាសអាសន្ន បន្ទាប់ពីគ្រោះរញ្ជួយដីជាបន្តបន្ទាប់គ្នាអាចដាស់ធ្វើឲ្យភ្នំភ្លើង Fagradalsfjall (ហ្វាក្រាដដាល់ហ្វ្យាត) ដែលកំពុងសកម្មខ្លាំង អាចផ្ទុះនៅក្នុងពេលឆាប់ៗ។ នៅថ្ងៃសៅរ៍ នៅក្រោយការប្រកាសអាសន្ននៅចំពោះមុខគ្រោះថ្នាក់ផ្ទុះភ្នំភ្លើង អាជ្ញាធរបានជម្លៀសប្រជាជនប្រមាណ ៤ពាន់នាក់ចេញពីកូនក្រុងកំពង់ផែ Grindavik (គ្រីនដាប៊ីក) ដែលស្ថិតនៅជិតភ្នំភ្លើងជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
តាំងពីយប់អាធ្រាត្រថ្ងៃសៅរ៍ អាជ្ញាធរអ៊ីស្លង់ចាប់ផ្តើមជម្លៀសប្រជាជនចេញពីទីក្រុងកំពង់ផែ Grindavik (គ្រីនដាប៊ីក)ដែលស្ថិតនៅចម្ងាយតែ៤០គីឡូម៉ែត្រពីរដ្ឋធានី Reykjavik (រៃក្យាប៊ីក)របស់ប្រទេសអ៊ីស្លង់។ រដ្ឋាភិបាលអ៊ីស្លង់បានប្រកាសដាក់តំបន់ភាគនិរតី ទៅក្នុងស្ថានភាពប្រកាសអាសន្ន និងជម្លៀសប្រជាជនប្រមាណ៤ពាន់នាក់ចេញពីទីក្រុង បន្ទាប់ពីការរញ្ជួយដីកើតមានជារៀងរាល់ថ្ងៃដែលអាចដាស់ភ្នំភ្លើងឲ្យកម្រើកផ្ទុះឡើង។ តាមវិទ្យាស្ថានឧតុនិយមអ៊ីស្លង់ ការរញ្ជួយដីកាន់តែញឹក និងវត្តមានរបស់ម៉ាក់ម៉ា សិលារាវដែលស្ថិតនៅតែក្រោមស្រទាប់ដីតែ៨០០ម៉ែត្រ ធ្វើឲ្យគេជឿថា ភ្នំភ្លើង Fagradalsfjall (ហ្វាក្រាដដាល់ហ្វ្យាត) នឹងអាចផ្ទុះក្នុងពេលឆាប់ៗ អាចនៅប៉ុន្មានម៉ោង ឬប៉ុន្មានថ្ងៃខាងមុខ។
ការរញ្ជួយដី និងចលនារុញច្រានដោយសារដោយម៉ាក់ម៉ាពីក្រោមដីបានបង្កការខូចខាតផ្លូវថ្នល់ និងអគារផ្ទះសម្បែងនៅក្នុងក្រុង Grindavik (គ្រីនដាប៊ីក)។ អាជ្ញាធរព្រួយបារម្ភថា ការផ្ទុះភ្នំភ្លើង Fagradalsfjall (ហ្វាក្រាដដាល់ហ្វ្យាត) អាចគំរាមកំហែងបំផ្លាញទីក្រុង Grindavik (គ្រីនដាប៊ីក)ទាំងមូល និងប៉ះពាល់ទៅដល់តំបន់ជុំវិញ ព្រោះថា ផ្ទុះភ្លើងដែលផ្ទុះនេះស្ថិតនៅមិនឆ្ងាយប៉ុន្មានពីមជ្ឈមណ្ឌលអគ្គិសនីដែលផ្គត់ផ្គង់ភ្លើងនិងទឹកសម្រាប់ប្រជាជនជាង៣ម៉ឺននាក់នៅរដ្ឋធានី Reykjavik (រៃក្យាប៊ីក)។
ស្ថិតនៅលើខ្សែក្រវ៉ាត់ភ្នំភ្លើងភាគខាងជើងផែនដី អ៊ីស្លង់មានភ្នំភ្លើងសកម្មចំនួន ៣៣។ នៅមុន ភ្នំភ្លើង Fagradalsfjall (ហ្វាក្រាដដាល់ហ្វ្យាត) តំបន់ Reykjavik (រៃក្យាប៊ីក) ធ្លាប់មានផ្ទុះភ្នំភ្លើង៣ដង នៅបីឆ្នាំជាប់ៗគ្នា។ ភ្នំភ្លើងផ្ទុះចុងក្រោយនៅខែកក្កដាកន្លងទៅ ប៉ុន្តែក្នុងទ្រង់ទ្រាយតូច ដោយមិនបានបង្កការខូចខាតអ្វីទេ។ ប៉ុន្តែ ខ្សែបណ្តាញភ្នំភ្លើង Fagradalsfjall (ហ្វាក្រាដដាល់ហ្វ្យាត) ដែលមានប្រវែងទទឹង៦គីឡូម៉ែត្រ និងបណ្តោយ១៩គីឡូម៉ែត្រនឹងផ្ទុះបញ្ចេញកំអែលភ្នំភ្លើងចាក់ច្រាលទៅលើតំបន់ដែលមានមនុស្សរស់នៅ។
បន្ទាប់ពីសំងំមិនសកម្មជាង៦ពាន់ឆ្នាំ ខ្សែភ្នំភ្លើង Fagradalsfjall (ហ្វាក្រាដដាល់ហ្វ្យាត) ទើបតែចាប់កម្រើកផ្ទុះនៅប៉ុន្មានឆ្នាំនេះទេ។ សម្រាប់អ្នកជំនាញខាងភ្នំភ្លើងអ៊ីស្លង់ អ្វីដែលធ្វើឲ្យគេភ្ញាក់ផ្អើលខ្លាំងនៅក្នុងករណីភ្នំភ្លើង Fagradalsfjall (ហ្វាក្រាដដាល់ហ្វ្យាត) គឺការឡើងលឿនស្រឺតកំហាប់ម៉ាក់ម៉ា ឬសិលារាវសំដៅរកកន្លែងផ្ទុះចេញមកលើដី។
រហូតមកដល់ចុងសប្តាហ៍នេះ អាជ្ញាធរអ៊ីស្លង់បានជម្លៀសត្រឹមប្រជាជន ប៉ុន្តែមិនទាន់ចាត់វិធានការខ្លាំងដូចការផ្ទុះភ្នំភ្លើងដ៏ធំខ្លាំងកា្លកាលពីឆ្នាំ២០១០។ នៅឆ្នាំនោះ កម្លាំងផ្ទុះភ្នំភ្លើងដែលបញ្ចេញផ្សែងផេះរាប់គីឡូម៉ែត្រទៅក្នុងអាកាសបានបណ្តាលឲ្យជើងហោះហើរជាង១សែនត្រូវលុបចោល។ អ្នកដំណើរជាង១០លាននាក់នៅអឺរ៉ុបត្រូវជាប់គាំងនៅព្រលានយន្តហោះ។ ការផ្ទុះភ្នំភ្លើងរយៈពេល១ខែ ដែលបណ្តាលឲ្យមានការខាតបង់ទឹកប្រាក់ជាង៣ពាន់លានដុល្លារដោយសារតែការលុបចោលជើងហោះហើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ