តួកគីរងការវាយប្រហារភេវរកម្មអត្តឃាតចំកណ្តាលបេះដូងក្រុងអង់ការ៉ា
នៅថ្ងៃអាទិត្យ ទី១ តុលា ក្រុងអង់ការ៉ា ប្រទេសតួកគីបានរងការវាយប្រហារភេរវកម្មអត្តឃាត។ ភេរវកម្មអត្តឃាតនេះបានកើតមានឡើងនៅក្នុងសង្កាត់ដែលប្រមូលផ្តុំដោយក្រសួងនានា និងបានកើតឡើងនៅប៉ុន្មានម៉ោងមុនសភាបានសម័យប្រជុំដើម្បីអនុម័តការចូលជាសមាជិកអូតង់របស់ប្រទេសស៊ុយអែត។ ខណៈនេះ នៅមិនទាន់មានចលនា ឬជនណាចេញសារភាពជាស្នាដៃរបស់ខ្លួនទេ។ ចំណែករដ្ឋអំណាចបានប្រកាសបើកការស៊ើបអង្កេត។
ចុះផ្សាយនៅថ្ងៃ៖
ស្តាប់ - ០២:៤៥
រដ្ឋមន្រ្តីក្រសួងមហាផ្ទៃលោកអាលី យ៊ែរលីកាយ៉ាបានប្រាប់ឲ្យដឹងថា ភេរវកម្មអត្តឃាតនេះបានរៀបចំដោយភេរជនចំនួន ២នាក់ដោយពួកគេបានជិតរថយន្តមួយគ្រឿងសំដៅកាត់មុខក្លោងទ្វារចូលនាយកដ្ឋានសន្តិសុខ។ នៅពេលបើកទៅដល់មុខក្លោងទ្វារនោះ ភេរវជនម្នាក់បានចុះពីរថយន្ត និងបានធ្វើការបាញ់រះ មុននឹងត្រូវប៉ូលិសចាប់ខ្លួន។ បន្តិចក្រោយមក ភេរវជនម្នាក់ទៀតនៅក្នុងឡានក៏បានទាញបំផ្ទុះគ្រាប់ផ្ទុះដែលជាប់នឹងខ្លួនគេ ហើយក៏បានក៏ស្លាប់នៅក្នុងការផ្ទុះនោះ។ តាមរដ្ឋមន្រ្តីក្រសួងមហាផ្ទៃលោកអាលី យ៊ែរលីកាយ៉ា ការបាញ់ ត គ្នារវាងកម្លាំងប៉ូលិស និងភេរវជនម្នាក់ដែលនៅរស់បានបណ្តាលឲ្យប៉ូលិសចំនួន ២នាក់រងរបួសស្រាល។
ការបាញ់ តគ្នានៅមុនការផ្ទុះនេះក៏ត្រូវបានចាក់ផ្សាយដោយទូរទស្សន៍ឯកជនឈ្មោះ NTV ជាមួយនឹងការបង្ហាញទីតាំងកើតហេតុដែលត្រូវបានបិទខ្ទប់ និងមានវត្តមានឡានប៉ូលិស រួមទាំងឡានពេទ្យជាច្រើនគ្រឿង។ ចំណែកនៅក្នុងវីដេអូមួយផ្សព្វផ្សាយដោយ AFP សំឡេងផ្ទុះបានលាន់ឮច្រើនគីឡូម៉ែត្រពីទីកន្លែងកើតហេតុជាមួយនឹងអណ្តាតភ្លើងខ្ពស់ត្រដែត។ ដោយឡែក ស្នងការដ្ឋានប៉ូលិសក្រុងអង់ការ៉ាបានអំពាវនាវពលរដ្ឋកុំឲ្យជ្រួលច្របល់។ ចំណែកមហាអយ្យការក្រុងអង់ការ៉ាបានប្រកាសបើកការស៊ើបអង្កេត និងដាក់បម្រាមមិនឲ្យចូលទៅកាន់ទីកន្លែងកើតហេតុ។
មកដល់ពេលនេះ នៅមិនទាន់មានចលនា ឬជនណាចេញសារភាពជាស្នាដៃរបស់ខ្លួនទេ។ គេគ្រាន់តែដឹងថា ភេរវកម្មអត្តឃាតបានកើតមានឡើងនៅប៉ុន្មានម៉ោងមុននឹងសភាបើកសម័យប្រជុំ។ នៅក្នុងសម័យប្រជុំនោះ សភាត្រូវអនុម័តលើកិច្ចព្រមព្រៀងយល់ព្រមឲ្យប្រទេសស៊ុយអែតចូលជាសមាជិកអង្គការអូតង់។ គួរបញ្ជាក់ថានៅក្នុងរឿងស៊ុយអែតសុំចូលអូតង់នេះ តួកគីដែលជាសមាជិកអូតង់ម្នាក់បានរារាំងដោយចោទស៊ុយអែតពីបទមានសមានចិត្តចំពោះពួកភេរវជន និងចលនាគួដឌីស្ថាន PKK នៅតួកគី។ តើរឿងរ៉ាវមួយនេះមានជាប់ពាក់ព័ន្ធនឹងភេរវកម្មអត្តឃាតពេលនេះដែរ ឬទេ។ គេត្រូវរង់ចាំលទ្ធផលស៊ើបអង្កេតជាមុនសិន។
អ្វីដែលគេអាចនិយាយបាន ក្រុងអង់ការ៉ាបានស្គាល់អំពើហិង្សាភេរវកម្មច្រើនដងក្នុងចន្លោះឆ្នាំ ២០១៥ និងឆ្នាំ ២០១៦ ដែលបង្កឡើងអង្គការរដ្ឋអ៊ីស្លាម ឬដោយក្រុមអ្នកទាមទារផ្តាច់ទឹកដីនិយមគួដឌីស្ថាន PKK៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ