អាមេនីអំពាវនាវឲ្យអ.ស.ប. បញ្ជូនក្រុម « បេសកកម្មឃ្លាំមើលសន្តិភាព » ទៅតំបន់ការ៉ាបាក់
អាមេនី-អាស៊ែបៃហ្សង់ – បន្ទាប់ពីបានបើកប្រតិបត្តិកងទ័ព បានជោគជ័យនៅតំបន់ការ៉ាបាក់ កងទ័ពអាស៊ែរបៃហ្សង់ បានអះអាងថានឹងបន្តយុទ្ធនាការគ្រប់គ្រងតំបន់នេះទាំងស្រុង ដោយតម្រូវឲ្យក្រុមផ្តាច់ទឹកដីអាម៉េនី ត្រូវទំលាក់អាវុធចោលឲ្យអស់ ទៅតាមកិច្ចព្រមព្រៀង។ នៅអង្គមហាសន្និបាត នៃអង្គការសហប្រជាជាតិ កាលពីថ្ងៃទីសៅរ៍ទី២៣កញ្ញា លោករដ្ឋមន្ត្រីក្រសួងការបរទេសអាមេនី បានឡើងថ្លែងអំពាវនាវ ឲ្យអង្គការសហប្រជាជាតិ ត្រូវបញ្ជូនក្រុមបេសកកម្មឃ្លាំមើលសន្តិភាព ទៅតំបន់ការ៉ាបាក់ ដោយបារម្ភថាអាជ្ញាធរអាស៊ែបៃហ្សង់ អាចនឹងធ្វើសកម្មភាពបោសសំអាតជាតិសាសន៍នៅតំបន់នេះ។
ចុះផ្សាយនៅថ្ងៃ៖
ស្តាប់ - ០៣:១៨
លោក Ararat Mirzoyan រដ្ឋមន្ត្រីការបរទេសអាមេនី បានលើកឡើងថា សហគមអន្តរជាតិត្រូវខិតខំប្រឹងប្រែង រួមគ្នាសម្រេចបញ្ជូនក្រុមបេសកម្មអន្តរជាតិពិសេសមួយ ទៅកាន់តំបន់ការ៉ាបាក់ឲ្យបានឆាប់បំផុត ដើម្បីឃ្លាំមើល និងវាយតម្លៃការគោរពសិទ្ធិមនុស្ស ព្រមទាំងស្ថានភាពមនុស្សធម៌ និងសន្តិសុខផ្ទាល់នៅទីនោះ។ ជាថ្មីម្តងទៀត តំណាងរដ្ឋាភិបាលអាមេនីរូបនេះ បានថ្លែងការបារម្ភ ដោយចោទថា រដ្ឋាភិបាលអាស៊ែបៃហ្សង់ មានចេតនាបោសសំអាតជាតិសាសន៍ ពោលគឺបណ្តេញប្រជាជនអាមេនីម្ចាស់ស្រុក ឲ្យចេញឲ្យអស់ពីតំបន់ការ៉ាបាក់។
គួរបញ្ជាក់ថា ប៉ុន្មានម៉ោងមុនតំណាងរដ្ឋាភិបាលអាមេនីឡើងថ្លែងសារនេះ លោករដ្ឋមន្ត្រីក្រសួងការបរទេសអាស៊ែបៃហ្សង់ក៏បានឡើងថ្លែងសារដែរ ទៅកាន់អង្គមហាសន្និបាត ដោយបានអះអាងថា អាជ្ញាធរអាស៊ែបៃហ្សង់ នឹងចាត់ទុកប្រជាជនអាមេនីនៅតំបន់ការ៉ាបាក់ ស្មើភាពគ្នាជាមួយប្រជាជនអាស៊ែបៃហ្សង់។ មន្ត្រីអាស៊ែបៃហ្សង់រូបនេះអះអាងទៀតថា អាស៊ែបសៃហ្សង់មានរដ្ឋធម្មនុញ្ញ មានច្បាច់រដ្ឋ និងគោរពការកាតព្វកិច្ច ក្នុងក្របខណ្ឌច្បាប់អន្តរជាតិ។
សូមរំលឹកថា កាលពីថ្ងៃទី១៩កញ្ញា កងទ័ពអាស៊ែបៃហ្សង់បានបើកប្រតិបត្តិការកងទ័ព វាយប្រហារយ៉ាងដំណំទៅលើកងកម្លាំងបំបែកទឹកដីអាមេនី នៅតំបន់ការ៉ាបាក់ បណ្តាលឲ្យស្លាប់មនុស្សប្រមាណ២០០នាក់ និងរបួងជិត៥០០នាក់។ ២៤ម៉ោងក្រោយមក កងកម្លាំងបំបែកទឹកដីអាមេនី បានលើកទង់សចុះចាញ់ ហើយយល់ព្រមទំលាក់អាវុធទាំងស្រុង។ ការចរចារវាងភាគីទាំងសងខាង បានចាប់ផ្តើមកាលពីថ្ងៃទី២១កញ្ញា ដើម្បីនិយាយអំពីអនាគតនៃតំបន់ការ៉ាបាក់។ ថ្ងៃសៅរ៍ទី២៣កញ្ញា អាជ្ញាធរអាស៊ែបៃហ្សង់ បានផ្សព្វផ្សាយរូបភាពជាច្រើន បង្ហាញថាខ្លួនសហការជាមួយកងកម្លាំងរុស្ស៊ី ដើម្បីប្រមូលអាវុធគ្រប់ធន់ ពីដៃក្រុមបំបែកទឹកដីអាមេនី។
យ៉ាងណាក៏ដោយ យោងតាមប្រភពព័ត៌មានជាច្រើន គឺមានការព្រួយបារម្ភជាខ្លាំងអំពីស្ថានភាពមនុស្សធម៌ ខណៈប្រជាជននៅតំបន់ការ៉ាបាក់ កំពុងរស់នៅក្នុងការលក្ខខណ្ឌដ៏លំបាក គ្មានចរន្តអគ្គិសនី និងគ្មានស្បៀងអាហារ។ ផ្អែកតាមអ្នកនាំពាក្យក្រសួងការបរទេសអាមេរិក គឺលោក អង់តូនី ប្លីងកិន បានទូរស័ព្ទទៅនិយាយជាមួយលោកនាយករដ្ឋមន្ត្រីអាមេនី ដោយលោកបានថ្លែងការបារម្ភ អំពីស្ថានភាពសន្តិសុខនិងអាយុជីវិតរបស់ប្រជាជនអាមេនី នៅតំបន់ការ៉ាបាក់។
ដោយឡែក ដើម្បីបង្ហាញបំណងល្អរបស់ខ្លួន អាជ្ញាធរអាស៊ែបៃហ្សង់ បានអនុញ្ញាតឲ្យក្បួនរថយន្ត របស់អង្គការកាកបាទក្រហមអន្តរជាតិ ដឹកស្បៀងចំនួនប្រមាណ៧០តោន ជាលើកដំបូង កាលពីរសៀលថ្ងៃសៅរ៍ទី២៣កញ្ញា ចូលទៅកាន់តំបន់ការ៉ាបាក់ ដោយឆ្លងកាត់ច្រក Latchine ដែលជាច្រកពុះចែក រវាងតំបន់ការ៉ាបាកនិងព្រំដែនអាមេនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ