អ៊ុយក្រែនប្រកាសតែងតាំងរដ្ឋមន្ត្រីការពារជាតិថ្មី ចំពេលរុស្ស៊ីសម្រុកវាយប្រហារដោយដ្រូន
ក្នុងខណៈដែលនៅលើសមរភូមិ រុស្ស៊ីបានបញ្ជាដ្រូនយ៉ាងសន្ធាប់មកវាយប្រហារលើភាគខាងត្បូងអ៊ុយក្រែន ត្រូវចំមជ្ឈមណ្ឌលឧស្សាហកម្ម នៅរដ្ឋធានីមានការប្តូរផ្លាស់ក្បាលម៉ាស៊ីនដឹកនាំយោធា។ រ៉ូស្ទឹម អ៊ូមេរូហ្វ Roustem Oumerov នឹងក្លាយជារដ្ឋមន្ត្រីការពារជាតិអ៊ុយក្រែនថ្មី ដែលប្រកាសតែងតាំងដោយលោកប្រធានាធិបតីហ្សេឡេស្គី នៅយប់ថ្ងៃអាទិត្យទី ៣កញ្ញា។ តើរដ្ឋមន្ត្រីការពារជាតិថ្មីនេះជានរណា?
ចុះផ្សាយនៅថ្ងៃ៖
ស្តាប់ - ០២:៣៤
សំណុំរឿងអាស្រូវពុករលួយក្នុងក្រសួងការពារជាតិបានលេចឮយូរខែមកហើយ។ កាលពីខែសីហា ប្រធានាធិបតីហ្សេឡេស្គី បានទម្លាក់អ្នកទទួលខុសត្រូវតំបន់ជាច្រើននាក់ ផ្នែកទទួលបន្ទុករើសទាហាន ដើម្បីគាស់រំលើងអំពើពុករលួយឱ្យដល់ឬសគល់។ រឿងអាស្រូវនេះបានធ្វើឱ្យរដ្ឋមន្ត្រីការពារជាតិលោក អូឡេកស៊ី រ៉េស្នីកូវ ចុះខ្សោយយ៉ាងខ្លាំង ទោះប្រធានាធិបតីនៅតែបន្តផ្តល់ទំនុកចិត្តឱ្យដឹកនាំក្រសួងប្រកបដោយស្នាដៃអស់រយៈពេល៥៥០ថ្ងៃនៃសង្គ្រាម។ គឺទើបតែនៅថ្ងៃចន្ទនេះ ដែលរដ្ឋមន្ត្រីការពារជាតិចាស់បានដាក់ពាក្យសុំលាលែងចេញពីតំណែង ចំពោះមុខសភាអ៊ុយក្រែន បន្ទាប់ពីលោកហ្សេឡេនស្គីបានសម្រេចធ្វើការប្តូរផ្លាស់ ដោយប្រកាសតែងតាំងលោក រ៉ូស្ទឹម អ៊ូមេរូហ្វ ប្រធានមូលនិធិសម្បត្តិរដ្ឋ -អតីតតំណាងរាស្ត្រក្រុមតាតារជនជាតិដើមភាគតិចនៅគ្រីមេ ជាអនាគតរដ្ឋមន្ត្រីការពារជាតិថ្មី។
ក្នុងវ័យ៤១ឆ្នាំ កើតនៅរដ្ឋអ៊ូបេគីស្តង់ ពេលគ្រួសាររត់គេចពីរបបស្តាលីន។ ក្រុមគ្រួសារនិងរូបលោកផ្ទាល់ដែលនៅជាកុមារនៅឡើយបានទៅតាំងជីវិតនៅគ្រីមេ ពេលសហគមន៍តាតារបើកទ្វារទទួលអ្នកក្រៅឱ្យចូលរស់នៅ ក្នុងអំឡុងឆ្នាំ១៩៨០-៩០។ រ៉ូស្ទឹម អ៊ូមេរូហ្វ ផ្តើមអាជីពក្នុងវិស័យឧស្សាហកម្មទូរគមនាគមន៍ នៅឆ្នាំ២០០៤ និងក្លាយជាសមាជិកសភានៅគ្រីមេ នៅឆ្នាំ២០១៩។ នៅសភា លោករ៉ូស្ទឹម អ៊ូមេរូហ្វ ជាសហប្រធានក្រុមគ្រីមេ ដែលទទួលបន្ទុកសម្របសម្រួលការទូតនៅលើឆាកអន្តរជាតិ និងតំណាងឱ្យក្រុងកៀវរាល់គ្រប់ការចរចារសើបៗជាមួយម៉ូស្គូ ដែលចូលឈ្លានពានក្រសោបយកគ្រីមេទៅធ្វើជារណបនៅឆ្នាំ២០១៤។
ក្រោយពីរុស្ស៊ីក្រសោបយកគ្រីមេក៏ដូចជាក្រោយពេលរុស្ស៊ីបើកប្រតិបត្តិការយោធាចូលឈ្លានពានអ៊ុយក្រែននៅខែកុម្ភៈ២០២២ លោក រ៉ូស្ទឹម អ៊ូមេរូហ្វ តែងចូលរួមចរចាដោយសម្ងាត់ជាមួយម៉ូស្គូ មានជាអាទិ៍ការចរចាផ្តោះប្តូរអ្នកទោស ឬជម្លៀសជនស៊ីវិល និងការចរចាដឹកនាំដោយអង្គការសហប្រជាជាតិនិងតួកគី ដើម្បីនាំចេញគ្រាប់ធញ្ញជាតិអ៊ុយក្រែន តាមច្រកសមុទ្ទខ្មៅ។
ការតែងតាំងជារដ្ឋមន្ត្រីការពារជាតិថ្មីនេះ ក៏ប្រព្រឹត្តទៅជួនចំពេលនៅលើសមរភូមិ រុស្ស៊ីបានបើកការវាយប្រហារដោយដ្រូនយ៉ាងសន្ធាប់លើតំបន់ទំនាបទន្លេដាណូប ភាគខាងត្បូងឆៀងខាងលិចប្រទេស ជិតព្រំដែនជាមួយប្រទេសរ៉ូមានី ដែលជាបណ្តុំមណ្ឌលឧស្សាហកម្ម កំពង់ផែនិងរចនាសម្ព័ន្ធពាណិជ្ជកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ