ប្រធានាធិបតីតួកគីទៅរុស្ស៊ីដើម្បីលួងលោកពូទីនឱ្យព្រមគោរពកិច្ចព្រមព្រៀងធញ្ញជាតិវិញ
រដូវច្រូតកាត់ជិតមកដល់ លោក អ៊ែរដូហ្កាន ប្រធានាធិបតីតួកគីបានធ្វើដំណើរទៅក្រុងមាត់សមុទ្ទរបស់រុស្ស៊ីនាថ្ងៃចន្ទទី៤កញ្ញានេះ ដើម្បីជួបពិភាក្សាជាមួយលោកប្រធានាធិបតីរុស្ស៊ី ពូទីន។ លោក អ៊ែរដូហ្កានចង់ទៅបញ្ចុះបញ្ចូលលោកពូទីនឱ្យត្រលប់មកគោរពកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន តាមច្រកសមុទ្ទខ្មៅ ដែលរុស្ស៊ីបានដកខ្លួនចេញកាលពីខែកក្កដា។
ចុះផ្សាយនៅថ្ងៃ៖
ស្តាប់ - ០២:១៩
ពេលអញ្ជើញទៅដល់ក្រុងសុតឈី លោកអ៊ែរដូហ្កាន បានសន្យាថានឹងចេញសេចក្តីប្រកាសដ៏សំខាន់មួយស្តីពីការនាំចេញធញ្ញជាតិអ៊ុយក្រែន ក្រោយពេលជួបលោកពូទីនដែលអះអាងនឹងបើកចំហឱ្យមានការចរចាគ្នា។
ជំនួបលើកទីមួយ គិតចាប់តាំងពីខែតុលាឆ្នាំ២០២២មក រវាងលោកអ៊ែរដូហ្កាននិងលោកពូទីន បានប្រព្រឹត្តទៅចំពេលកងកម្លាំងរុស្ស៊ីកំពុងប្រឹងទប់ទល់នឹងប្រតិបត្តិការវាយបកដណ្តើមយកទឹកដីវិញ ដែលហាក់ដូចជាចាប់ផ្តើមមានប្រៀបខ្លាំងនៅភាគខាងត្បូង។
ជាប្រមុខដឹកនាំប្រទេសដ៏កម្រម្នាក់ដែលមានទំនាក់ទំនងល្អជាមួយនឹងលោកពូទីន និងកាន់តែល្អូកល្អើនតាំងពីរុស្ស៊ីចូលឈ្លានពានអ៊ុយក្រែននៅថ្ងៃទី ២៤កុម្ភៈ២០២២មក លោក អ៊ែរដូហ្កាន សង្ឃឹមថាការជួបពិភាក្សាជាមួយសមភាគីរុស្ស៊ីស្តីអំពីការនាំចេញគ្រាប់ធញ្ញជាតិអ៊ុយក្រែន ដែលអមដំណើរជាមួយដោយរដ្ឋមន្ត្រីការបរទេស ការពារជាតិ ហិរញ្ញវត្ថុនិងថាមពលផងនេះ ជាឈ្នាន់នាំទៅរកការចរចាសន្តិភាពរវាងអ៊ុយក្រែននិងរុស្ស៊ី។ ប៉ុន្តែបំណងប្រាថ្នារបស់តួកគីជួបភាពស្មុគស្មាញច្រើន។
ការសម្រេចបន្ថយនិងពន្យារពេលបង់ថ្លៃហ្កាស បានសម្រួលដង្ហើមសេដ្ឋកិច្ចតួកគី។ ឯតួកគីបដិសេធមិនចូលដៃជាមួយក្រុមលោកខាងលិចក្នុងការដាក់ទណ្ឌកម្មរុស្ស៊ីហើយស្វាគមន៍ពលរដ្ឋរុស្ស៊ីដែលចង់បានផលិតផលប្រណិតៗនិងសេវាល្អៗទៀត។ ប៉ុន្តែតួកគីបានជួយផ្គង់ផ្គង់អាវុធដល់អ៊ុយក្រែននិងគាំទ្រឱ្យអ៊ុយក្រែនចូលជាសមាជិកអូតង់ ជាហេតុធ្វើឱ្យរុស្ស៊ីខឹងខ្លាំង។ ទីបំផុត អ៊ុយក្រែនក៏ដូចជារុស្ស៊ី ចង់ឱ្យលោកអ៊ែរដូហ្កានខិតខំប្រឹងប្រែងគាំទ្រជាពិសេសត្រឹមការនាំចេញគ្រាប់ធញ្ញជាតិអ៊ុយក្រែន ដែលចាំបាច់ខ្លាំងសម្រាប់ផ្គត់ផ្គង់ស្បៀងអាហារពិភពលោក។
រុស្ស៊ីបានដកខ្លួនចេញពីកិច្ចព្រមព្រៀងធញ្ញជាតិនេះ កាលពីខែកក្កដា និងបានគំរាមវាយប្រហារលើនាវាណាដែលចេញដំណើរពីកំពង់ផែអ៊ុយក្រែននៅសមុទ្ទខ្មៅ។ រុស្ស៊ីថែមទាំងបានបង្កើនការវាយប្រហារតាមផ្លូវអាកាសយ៉ាងខ្លាំងលើរចនាសម្ព័ន្ធកំពង់ផែអ៊ុយក្រែនទៀត តាំងពីពេលនោះមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ