ភ្លើងឆេះព្រៃនៅក្រិក៖ អាជ្ញាធរបន្តការប្រុងប្រយ័ត្ន ថ្វីបើស្មានការណ៍បានល្អប្រសើរបនិ្តច
ក្រិកបានរងគ្រោះដោយភ្លើងឆេះព្រៃ រាលដាលប្រមាណ២សប្តាហ៍កន្លងមកនេះ នៅតាមកោះទេសចរណ៍ជាច្រើន។ ទេសចរណ៍ប្រមាណ៣ម៉ឺននាក់ ត្រូវបានជម្លៀសចេញ ហើយកកកុញនៅតាមព្រលានយន្តហោះនានា។ គិតត្រឹមថ្ងៃសៅរ៍នេះ អាជ្ញាធរនិងក្រុមពន្លត់អគ្គីភ័យក្រិក បានអះអាងថា ស្ថានការណ៍បានល្អប្រសើរបន្តិចហើយ ដោយគេបានទប់កុំឲ្យរាលដាលទៅមុខ។ តែយ៉ាងណា គេនៅបន្តតាមដានយ៉ាងប្រុងប្រយ័ត្នបំផុត។
ចុះផ្សាយនៅថ្ងៃ៖
ស្តាប់ - ០២:៣៦
ក្នុងរយៈពេល២សប្តាហ៍ តំបន់ខ្លះនៅលើកោះក្រិក ត្រូវបានភ្លើងឆេះរោលរាល។ ក្នុងចំណោមទីតាំងភ្លើងព្រៃទាំងអស់ ចំនួនប្រមាណ៦៦០ គឺមានជាង១០ ដែលបានឆេះរាលដាលទប់មិនឈ្នះ បង្កឲ្យមានការភ័យជ្រួលច្របល់ ជម្លៀសមនុស្សយ៉ាងអាសន្នបំផុត។ នៅលើកោះរ៉ូដស៍ ដែលជាកោះទេសចរណ៍ដ៏សំខាន់មួយរបស់ក្រិក គេបានជម្លៀសអ្នកទេសចរចំនួនប្រមាណ៣ម៉ឺននាក់ ខណៈភ្លើងបានចាប់ផ្តើមឆេះរាល មកដល់ដីភូមិផ្ទះសម្បែង និងសណ្ឋាគារខ្លះផងនៅមាត់ឆ្នេរសមុទ្រ។
ផ្អែកតាមអ្នកនាំពាក្យអាជ្ញាធរពន្លត់អគ្គីភ័យក្រិក គិតត្រឹមថ្ងៃសៅរ៍នេះ ស្ថានការណ៍បានល្អប្រសើរបន្តិច ដោយសារសីតុណ្ហភាពបានថយកំដៅ ហើយដោយមានការជួយសហការពន្លត់យ៉ាងសកម្ម ពីក្រុមពន្លត់អគ្គីភ័យមកពីបណ្តាប្រទេសផ្សេងទៀតនៅអឺរ៉ុប។ តែយ៉ាងណា ក្រុមការងារនៅតែបន្តប្រុងប្រយ័ត្ន ដើម្បីទប់និងកាត់ផ្តាច់ការឆេះរាលដាល។ ដោយឡែក នៅតំបន់Volos ភាគកណ្តាលក្រិក ភ្លើងបានឆាបឆេះដល់បន្ទាយទាហានមួយកន្លែង និងបានឆេះឃ្លាំងគ្រាប់ បណ្តាលឲ្យមានសំឡេងផ្ទុះកក្រើក បង្កការភ័យជ្រួលច្រលប់កាលពីថ្ងៃព្រហស្បតិ៍។
ផ្អែកតាមអាជ្ញាធរឃ្លាំមើលនៅក្រុងអាតែន គិតត្រឹមថ្ងៃសុក្រទី២៨កក្កដា ភ្លើងបានឆាបឆេះព្រៃក្នុងទំហំ ៥ម៉ឺនហិកតា ទូទាំងប្រទេស។ យោងតាមអាជ្ញាធរក្រិក ក្រៅពីឆេះផ្ទះសម្បែងប្រជាជន និងសម្លាប់សត្វជាច្រើនក្បាល ភ្លើងព្រៃបានបណ្តាលឲ្យស្លាប់មនុស្សចំនួន៥នាក់។ លោករដ្ឋមន្ត្រីក្រសួងការពារប្រជាជនក្រិក បានលាឈប់ពីតំណែង កាលពីថ្ងៃសុក្រ។
គួរបញ្ជាក់ថា អ្នកជំនាញបរិស្ថាននិងអាកាសធាតុ បានបង្ហាញការព្រួយបារម្ភជាខ្លាំង ស្តីអំពីលំនឹងតុល្យភាពនៃប្រព័ន្ធជីវចម្រុះនៅក្រិក ខណៈដែលពីមួយឆ្នាំទៅមួយឆ្នាំ ភ្លើងឆេះព្រៃកាន់ទេគំរាមខ្លាំងឡើងៗ ដោយសារតែសីតុណ្ហភាពក្តៅខ្លាំង។ យោងតាមអង្គការ WWF កាលពី២ឆ្នាំមុន ព្រៃឈើនិងរុក្ខជាតិ ក្នុងផ្ទៃដីទំហំប្រមាណ ១៣ម៉ឺនហិកតា ត្រូវបានភ្លើងលេបត្របាក់រួចហើយ។ ករណីឆាបឆេះកាន់តែញឹកញាប់ ធ្វើឲ្យរុក្ខជាតិមិនអាចលូតលាស់ទាន់នោះទេ ហើយផ្ទៃដីនឹងក្លាយជាវាលរហោរស្ថាន កាន់តែប្រឈមនឹងសីតុណ្ហភាពក្តៅហួតហែង។
យ៉ាងណាមិញ យោងតាមអង្គការសហប្រជាជាតិ ខែកក្កដាឆ្នាំ២០២៣នេះ គឺជាខែកក្កដាដ៏ក្តៅហួតហែងបំផុត មិនធ្លាប់មានទេ ក្នុងប្រវត្តិសាស្ត្រមនុស្សជាតិ។ លោកអង់តូនីញ៉ូ ហ្គូតទែរស៍ បានលើកឡើងថា ភពដែនដីយើងកំពុងតែរំកិលចូលសម័យកាលមួយដ៏ក្តៅងំ ប្រៀបបានបីដូចជាទឹកកំពុងពុះកញ្ជ្រោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ