ភ្លើងឆេះព្រៃនៅក្រិក៖ក្រុមអ្នកពន្លត់អគ្គីភ័យបានបញ្ជាក់ពីស្ថានភាពនៅមិនទាន់ធូរស្រាលនៅឡើយ
នៅក្នុងប្រទេសក្រិក ស្ថានការណ៍ភ្លើងឆេះព្រៃនៅមិនទាន់ធូរស្រាលនៅឡើយទេនាថ្ងៃចន្ទ ទី២៤ កក្កដានេះ។ ជាមួយនឹងសីតុណ្ហភាពជាង ៤០អង្សារ ក្រុមអ្នកពន្លត់អគ្គីភ័យកំពុងជួបការលំបាកក្នុងការពន្លត់អណ្តាតភ្លើងដែលកំពុងមានសន្ទុះ និងឆាបឆេះព្រៃរាលដាលយ៉ាងសន្ធោសន្ធៅ។ ដើម្បីជាការបង្ការ រដ្ឋអំណាចបានជម្លៀសមនុស្ស ពិសេសអ្នកទេសចរចេញពីកោះរ៉ូដ (Rhodes) ប្រមាណជា ៣០ ០០០នាក់។ គ្រាន់តែក្នុងរយៈពេលជាង ២៤ម៉ោង ភ្លើងបានឆាបឆេះឆ្លងរាលដាលចូលដល់ទីតាំងចំនួន ៤៦កន្លែងថ្មីទៀតនៅលើកោះរ៉ូដ។ ក្រៅពីកោះរ៉ូដ ភ្លើងបានឆ្លងរាលដាលចូលកោះក័រហ៊្វូដែលបានបង្ខំឲ្យរដ្ឋអំណាចចាត់វិធានការបង្ការដោយជម្លៀសមនុស្សចេញជិត ២ ៥០០នាក់នាយប់ថ្ងៃអាទិត្យឆ្លងចូលថ្ងៃចន្ទ ទី២៤ កក្កដា។ គួរបញ្ជាក់ថា មួយសប្តាហ៍គត់ដែលក្រិកបានផ្តើមប្រឈមនឹងភ្លើងឆេះព្រៃចេញពីកោះរ៉ូដដែលជាទីតាំងទេចរណ៍ដ៏សំខាន់។ តាមអ្នកនាំពាក្យពន្លត់អគ្កីភ័យលោកយ័រនីស អាតូប៉ូយ៉ូ ស្ថានការណ៍នៅបន្តតានតឹង និងមិនទាន់អាចធូរស្រាលឆាប់ៗទេ។
ចុះផ្សាយនៅថ្ងៃ៖
ស្តាប់ - ០១:៤២
« យើងកំពុងធ្វើការពន្លត់ភ្លើងនៅទីតាំងចំនួន ៣កន្លែងជាមួយនឹងកម្លាំងខ្យល់បោកបក់ខ្លាំង និងសីតុណ្ហភាពខ្ពស់ខ្លាំងរហូតដល់ទៅជាង ៤០អង្សារ។ យើងកំពុងប្រឈមនឹងស្ថានការណ៍លំបាកខ្លាំងដែលវានឹងរឹតតែលំបាកថែមទៀត។ យើងបានដាក់កោះរ៉ូដទៅក្នុងស្ថានភាពក្រហមសម្រាបើរយៈពេល ២៤ម៉ោងខាងមុខ។
មានអ្នកពន្លត់អគ្គីភ័យជាង ២៦០នាក់ និងទាហានពន្លត់អគ្គីភ័យចំនួន ១៦នាក់មកពីអង្គភាពពិសេសមួយកំពុងចូលរួមយ៉ាងសកម្មនៅនឹងកន្លែងដើម្បីពន្លត់អណ្តាតភ្លើងឆាបឆេះព្រៃ។ ក្រៅពីនេះ យើងមានជំនួយពីក្រុមអ្នកពន្លត់អគ្គីភ័យមកពីប្រទេសស្លូវ៉ាគីរួមទាំងរថយន្តចំនួន ៤គ្រឿងរបស់ពួកគេ។
បន្ទាប់មកទៀត យើងមានជំនួយពីប្រទេសបារាំង តួកគី និងប្រទេសក្រូអាស៊ីដែលបានបញ្ជូនយន្តហោះពន្លត់អគ្គីភ័យ។ មានយន្តហោះពន្លត់អគ្គីភ័យប្រមាណជា ១០គ្រឿង និងឧទ្ធម្ភាគចក្រពន្លត់អគ្កីភ័យចំនួន ៣គ្រឿងកំពុងបន្តទម្លាក់ទឹកស្រោចលើអណ្តាតភ្លើងឆេះព្រៃលើកោះរ៉ូត។ តែជាអកុសល លក្ខខណ្ឌអាកាសធាតុមានសភាពអាក្រក់ខ្លាំង ហើយយើងពិបាកគ្រប់គ្រងស្ថានការណ៍។
ក្នុងពេលដែលយើងកំពុងបន្តពន្លត់អណ្តាតភ្លើង យើងបានជម្លៀសមនុស្សជាង ១៩ ០០០នាក់ និងជាសំណាងល្អមកដល់ពេលនេះ គឺមិនមានអ្នករងរបួសធ្ងន់ និងអ្នកស្លាប់ទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ