អ៊ីតាលី រៀបចំសន្និសីទស្តីពីជនភៀសខ្លួន ឆ្លងកាត់សមុទ្រមេឌីទែរ៉ាណេ
ថ្ងៃអាទិត្យ ទី២៣កក្កដា ប្រទេសអ៊ីតាលី ក្រោមការដឹកនាំរបស់ អ្នកស្រី ចរចា មេឡូនី ដែលធ្លាប់តែប្រកាន់នយោបាយរឹតត្បិតជនភៀសខ្លួន បានផ្តើមគំនិតទទួលធ្វើសន្និសីទ ស្តីពីជនភៀសខ្លួន ដែលធ្វើដំណើរប្រថុយជីវិតឆ្លងកាត់សមុទ្រមេឌីទែរ៉ាណេ។ ក្នុងសន្និសីទនេះ រដ្ឋបាលទីក្រុងរ៉ូម បានអញ្ជើញប្រទេសពាក់ព័ន្ធជាច្រើន ដែលនៅក្បែរសមុទ្រមេឌីទែរ៉ាណេ ហើយនិងប្រទេសក្នុងតំបន់អាហ្វ្រិក ព្រមទាំងថ្នាក់ដឹកនាំសហភាពអឺរ៉ុប។ ក៏ប៉ុន្តែ បារាំង និងអេស្ប៉ាញ គ្មានវត្តមានទេ។
ចុះផ្សាយនៅថ្ងៃ៖
ស្តាប់ - ០២:៥២
អ៊ីតាលី រៀបចំសន្និសីទស្តីពីជនភៀសខ្លួន គឺមានគោលបំណងស្វែងរកកិច្ចសហការថ្មីបន្ថែមជាមួយបណ្តាប្រទេសជាប់មាត់សមុទ្រមេឌីទែរ៉ាណេនិងប្រទេសក្នុងតំបន់អាហ្វ្រិក ដើម្បីជួយទប់ស្កាត់លំហូរជនភៀសខ្លួនខុសច្បាប់។ សន្និសីទនេះ ដែល អ្នកស្រី នាយករដ្ឋមន្ត្រី ចរចា មេឡូនី បានហៅថា នីតិវិធីក្រុងរ៉ូម បានផ្តល់អាទិភាពជាពិសេសចំពោះការប្រយុទ្ធប្រឆាំងជនភៀសខ្លួនខុសច្បាប់នៅអឺរ៉ុប ហើយគ្រប់គ្រងអន្តោប្រវេសន៍ស្របច្បាប់ឲ្យបានល្អត្រឹមត្រូវ និងផ្តោតលើកផ្តល់ជំនួយគាំទ្រដល់ពួកគេក្នុងដំណើររៀបចំជីវិតថ្មី។ រឹងរឹតតែសំខាន់ គឺបង្កើនកិច្ចសហការជាមួយប្រទេសនៅតំបន់អាហ្វ្រិក ដែលជាប្រភពដើមចម្បងរបស់ជនភៀសខ្លួន។
តាមទិន្នន័យរបស់អាជ្ញាធរអ៊ីតាលី បើគិតចាប់ពីដើមឆ្នាំ២០២៣ យ៉ាងហោច មានជនភៀសខ្លួន ៨ សែននាក់ បានធ្វើដំណើរប្រឈមហានិភ័យឆ្លងកាត់សមុទ្រមេឌីទែរ៉ាណេ និងដែលចេញមកពីប្រទេសទុយនេស៊ី។ ឆ្នាំទៅមិញ ក្នុងរយៈពេលដូចគ្នា មានតែ ជាង ៣ សែននាក់ប៉ុណ្ណោះ។
ហេតុដូច្នេះ សន្និសីទនៅទីក្រុងរ៉ូមនេះ ក៏មានវត្ថុបំណងផ្សព្វផ្សាយណែនាំ អំពីគំរូកិច្ចព្រមព្រៀងថ្មីមួយ ដែល អ៊ីតាលី សហភាពអឺរ៉ុប និងប្រទេសទុយនេស៊ី ទើបតែចុះហត្ថលេខាព្រមព្រៀងរួមគ្នា។ នោះគឺ កិច្ចសហការ ក្រោមការផ្តល់ជំនួយ ១៥០ លានអឺរ៉ូ ដល់ ទុយនេស៊ី ដើម្បីជួយចាត់ចែង បញ្ជៀសទូករបស់ជនភៀសខ្លួន ហើយនិង ទប់ស្កាត់ការជួញដូរនាំមនុស្សភៀសខ្លួន ពីសំណាក់ឈ្មួញទុច្ចរិត។ ក្នុងកិច្ចព្រមព្រៀងនេះ ក៏មានចែងដែរ ពីកាតព្វកិច្ចរបស់រដ្ឋអំណាចទុយនេស៊ី ដែលត្រូវបញ្ជូនជនភៀសខ្លួនទៅស្រុកដើមរបស់ពួកគេ។
រីឯ អង្គការការពារសិទ្ធជនភៀសខ្លួន បានរិះគន់ថ្នាក់ដឹកនាំសហភាពអឺរ៉ុបនិងរដ្ឋសមាជិក បន្តរឹតបន្តឹងនយោបាយបែរខ្នងដាក់ជនភៀសខ្លួន ហើយនិងមិនព្រមរៀនអំពីកំហុស ក្នុងការឃាត់ទុកជនភៀសខ្លួនឲ្យផ្តុំជើងគ្នាទុកនៅប្រទេសលីប៊ី កាលពីមុន។ ហើយពេលនេះ កំពុងតែធ្វើជាមួយ ទុយនេស៊ី ទៀត។
ទោះម្តេចក្តី បើផ្អែកតាមតួលេខរបស់អង្គការសហប្រជាជាតិ គ្រាន់តែឆមាសទី១ឆ្នាំនេះ មានជនភៀសខ្លួន ប្រមាណជា ១ សែននាក់ បានឆ្លងកាត់សមុទ្រ ចូលដល់ទឹកដីអឺរ៉ុប។ ឆ្នាំទៅមិញ រយៈពេល៦ខែដូចគ្នា មានដល់ ១៨៩ ០០០ នាក់។ ពួកគេច្រើន ឆ្លងកាត់មកពីតាមប្រទេសអាហ្វ្រិកខាងជើង តួកគី និងលីបង់។
ប្រធានាធិបតីម៉ូរីតានី ដែលទៅចូលរួមកិច្ចប្រជុំនៅទីក្រុងរ៉ូម បានលើកឡើងឲ្យគេគិតគូរអំពីស្ថានភាពនយោបាយ សន្តិសុខ និងសេដ្ឋកិច្ចរបស់ប្រទេសនៃជនភៀសខ្លួន ហើយនិងត្រូវជួយផ្គត់ផ្គង់ប្រភពហិរញ្ញវត្ថុ ដើម្បីអនុវត្ថគម្រោងការជួយសង្គ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ