អ៊ីរ៉ាក់បណ្តេញឯកអគ្គរដ្ឋទូតស៊ុយអែតចេញពីក្រុងបាកដាដ
នាយករដ្ឋមន្ត្រីអ៊ីរ៉ាក់លោក មហាម៉េដឆាអាល់ស៊ូដានី បានចេញបញ្ជានៅថ្ងៃព្រហស្បតិ៍ទី ២០កក្កដា២០២៣នេះ ឱ្យឯកអគ្គរដ្ឋទូតស៊ុយអែតប្រចាំក្រុងបាកដាដចាកចេញទឹកដីអ៊ីរ៉ាក់។ ហើយក្នុងពេលទន្ទឹមគ្នា អ៊ីរ៉ាក់ក៏បានកោះហៅអ្នកទទួលបន្ទុកកិច្ចការអ៊ីរ៉ាក់ប្រចាំក្រុងស្តុកខុមឱ្យត្រលប់ចូលស្រុកវិញ។ តើមានមូលហេតុអ្វីដែលជំរុញឱ្យមានការបណ្តេញមន្ត្រីការទូតដូច្នេះ?!
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ក្រៅពីបណ្តេញរូបលោកស្រីឯកអគ្គរដ្ឋទូតឱ្យចាកចេញពីបាកដាដ ស្ថានទូតស៊ុយអែតផ្ទាល់ក៏រងការដុតបំផ្លិចបំផ្លាញយ៉ាងខ្លាំងនៅព្រឹកថ្ងៃព្រហស្បតិ៍នេះ ក្នុងពេលមានបាតុកម្មមួយដែលរៀបចំឡើងដោយសកម្មជនរបស់ប្រមុខសាសនាMoqtada Sadr។ ជាងនេះទៅទៀត រដ្ឋាភិបាលអ៊ីរ៉ាក់ព្យួរអាជ្ញាបណ្ណ របស់ក្រុមហ៊ុនទូរគមនាគមន៍ស៊ុយអែត Ericsson មិនឱ្យធ្វើពាណិជ្ជកម្មក្នុងទឹកដីអ៊ីរ៉ាក់ទេ។
បើតាមសេចក្តីថ្លែងការណ៍ សេចក្តីសម្រេចចិត្ត របស់រដ្ឋាភិបាលអ៊ីរ៉ាក់ធ្វើឡើងដោយហេតុតែមានហេតុការណ៍ជេរប្រមាថ និងដុតបំផ្លាញគម្ពីសាសនាអ៊ីស្លាម កូរ៉ង់ និងទង់ជាតិអ៊ីរ៉ាក់ម្តងហើយម្តងទៀតនៅស៊ុយអែត ដោយមានការអនុញ្ញាតពីរដ្ឋាភិបាលស៊ុយអែត។ កាលពីថ្ងៃទី ២៨មិថុនា ចំថ្ងៃបុណ្យដ៏ធំរបស់សាសនាអ៊ីស្លាម ជនភៀសខ្លួនដើមកំណើតអ៊ីរ៉ង់ សាលវ៉ាន់ ម៉ូម៉ីកា បានដុតគម្ពីរកូរ៉ង់អស់ពីរបីសន្លឹកម្តង នៅមុខវិហារអ៊ីស្លាមនៅក្រុងស្តុកខុម។ នៅថ្ងៃព្រហស្បតិ៍ទី ២០កក្កដា បុរសដដែលនេះបានរៀបចំប្រមូលផ្តុំគ្នាជាច្រើននាក់ទៀត យកគម្ពីរសាសនានិងទង់ជាតិអ៊ីរ៉ង់មកជាន់ឈ្លីនៅមុខស្ថានទូតអ៊ីរ៉ាក់ប្រចាំទីក្រុងស្តុមខុម តែមិនបានដុតបំផ្លាញដូចគម្រោងប្រកាសតាមបណ្តាញសង្គមទេ។ តែសម្រាប់រដ្ឋាភិបាលអ៊ីរ៉ាក់នេះជាទង្វើបែបបង្កហេតុនិងញុះញង់ឱ្យមានអំពើហិង្សានិងការស្អប់ខ្ពើមសាសនា។ ហេតុដូច្នេះហើយបានជាបាតុករអ៊ីរ៉ង់ដុតបំផ្លាញស្ថានទូតស៊ុយអែតប្រចាំក្រុងបាកដាដជាមុន ដើម្បីប្រឆាំងតវ៉ា។
ពិតជាមិនអាចទទួលបានឡើយ! នេះជាប្រសាសន៍របស់លោកប្រមុខការទូតស៊ុយអែត។ ចំណែកសហរដ្ឋអាមេរិក បានប្រកាសថ្កោលទោសការដុតបំផ្លាញស្ថានទូតស៊ុយអែតនៅអ៊ីរ៉ាក់ ដោយបន្ទោសកងកម្លាំងរក្សាសន្តិសុខអ៊ីរ៉ាក់ថាអសកម្មក្នុងការរារាំងសកម្មភាពរបស់បាតុករ។ អ្នកនាំពាក្យក្រសួងការបរទេសអាមេរិកបានរំលឹងការបេសកកម្មការទូតមិនមែនជាផ្ទាំងស៊ីបនៃអំពើហិង្សាទេ និងបានអំពាវនាវឱ្យរដ្ឋាភិបាលអ៊ីរ៉ាក់គោរពកាតព្វកិច្ចអន្តរជាតិក្នុងការការពារគ្រប់បេសកកម្មទូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ