រដ្ឋាភិបាលអាល្លឺម៉ង់ ប្រកាសបង្ហាញ គោលនយោបាយយុទ្ធសាស្រ្តថ្មី ដើម្បីឈប់ពឹងផ្អែកខ្លាំងលើចិន
កាលពីថ្ងៃព្រហស្បតិ៍ទី ១៣កក្កដា រដ្ឋាភិបាលអាល្លឺម៉ង់ បានធ្វើការបង្ហាញឯកសារ គោលនយោបាយយុទ្ធសាស្ត្រថ្មី ស្តីពីទំនាក់ទំនងទ្វេភាគីជាមួយចិន ដែលជាដៃគូរពាណិជ្ជធំបំផុតរបស់អាល្លឺម៉ង់។ ខណៈដែលចិនកាន់តែជះឥទ្ធិពលវាតទី រដ្ឋាភិបាលអាល្លឺម៉ង់បានអះអាងថា នឹងប្រឹងប្រែងរកវិធី ធ្វើឲ្យអាល្លឺម៉ង់ ឈប់ពឹងផ្អែកលើចិនខ្លាំងពេក។ ជាយុទ្ធសាស្ត្រថ្មី ដែលអាល្លឺម៉ង់បានដកបទពិសោធន៍ បន្ទាប់ពីបានភ្លឺភ្នែក ក្រោយពេលរុស្ស៊ីលើកទ័ព ធ្វើសង្គ្រាមឈ្លានពានអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២៤
ឯកសារចំនួន៦៤ទំព័រ ស្តីពីទំនាក់ទំនងយុទ្ធសាស្ត្រជាមួយចិន ត្រូវបានរដ្ឋាភិបាលអាល្លឺម៉ង់បង្ហាញជាសាធារណៈ បន្ទាប់ពីបានចរចាគ្នា តាក់តែងអស់ជាច្រើនខែ។ ជាឯកសារយុទ្ធសាស្ត្រជាតិ ដែលរដ្ឋាភិបាលអាល្លឺម៉ង់ចាត់ទុកថា ជា “ត្រីវិស័យថ្មី” ដើម្បីកំណត់ទិសដៅត្រូវដើរ ទាក់ទិនទំនាក់ទំនងជាមួយចិន។
នៅលើបណ្តាញ Twitter លោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ បានលើកឡើងថា កម្មវត្ថុរបស់អាល្លឺម៉ង់ គឺមិនមែនទៅផ្តាច់ខ្លួន លែងមានទំនាក់ទំនងសោះ ជាមួយនឹងចិននោះទេ។ តែអាល្លឺម៉ង់ នឹងត្រូវតែមានយន្តការ កាត់បន្ថយការពឹងផ្អែកខ្លាំងជ្រុលពេក ទៅលើចិន។ លោកបន្ថែមថា ឯកសារ ត្រីវិស័យថ្មីរបស់រដ្ឋាភិបាលអាល្លឺម៉ង់ បង្ហាញថា គោលនយោបាយយុទ្ធសាស្ត្រជាតិរបស់អាល្លឺម៉ង់ បានផ្លាស់ប្តូរហើយ ដោយសារតែគោលជំហររបស់ចិន កាន់តែប្រឆាំងតទល់ខ្លាំងជាមួយផលប្រយោជន៍អាល្លឺម៉ង់ដែរ។ តែយ៉ាងណា លោកប្រមុខរដ្ឋាភិបាលអាល្លឺម៉ង់ បានគូសបញ្ជាក់ថា ចិន នៅតែជាដៃគូរពាណិជ្ជកម្មដ៏សំខាន់បំផុតមួយ របស់អាល្លឺម៉ង់ដដែលទេ តែទន្ទឹមនឹងនេះ ចិនក៏គឺជាគូរប្រជែងយុទ្ធសាស្ត្រមួយដែរ។
គួរបញ្ជាក់ថា ឯកសារថ្មីស្តីពីទំនាក់ទំនងជាមួយចិននេះ ត្រូវបានរដ្ឋាភិបាលអាល្លឺម៉ង់បង្ហាញ បន្ទាប់ពីបានផ្សព្វផ្សាយឯកសារទូទៅមួយទៀត ស្តីពីយុទ្ធសាស្ត្រជាតិអាល្លឺម៉ង់ កាលពីពាក់កណ្តាលខែមិថុនា។ ឯកសារថ្មីនេះ គឺជាមានកម្មវត្ថុដាស់តឿន ក្រុមហ៊ុនសហគ្រាសទាំងអស់របស់អាល្លឺម៉ង់ ឲ្យបង្កើនការប្រុងប្រយ័ត្ន មិនត្រូវពឹងផ្អែកជ្រុលហួសហេតុពេកទៅលើចិននោះទេ។ តែយ៉ាងណា ការផ្តាច់ខ្លួនឈប់ពឹងលើចិន គឺមិនមែនជារឿងងាយធ្វើប៉ុន្មានទេ សម្រាប់ឧស្សហកម្មអាល្លឺម៉ង់។ នៅក្នុងឯកសារយុទ្ធសាស្ត្រនេះ អាល្លឺម៉ង់ក៏បានទទួលស្គាល់ថា ក្នុងសំណុំរឿងធំៗខ្លះ ដូចជាសំណុំរឿងប្រយុទ្ធប្រឆាំងនឹងវិបត្តិអាកាសធាតុ គឺគេត្រូវការចិនជាចាំបាច់ ក្នុងនាមចិនជាប្រទេសដ៏ធំមួយដែលបញ្ចេញឧស្ម័នកាបូនិក។
គួរកត់សំគាល់ថា ការផ្លាស់ប្តូរគោលជំហររបស់អាល្លឺម៉ង់នេះ គឺជាលទ្ធផលនៃការដកពិសោធន៍នៃសង្គ្រាមនៅអ៊ុយក្រែន ដែលបានធ្វើឲ្យអាល្លឺម៉ង់បានភ្លឺភ្នែក។ វាក៏គឺជាបរិបទទូទៅដែរ នៅក្នុងអំឡុងពេលនេះ ដែលប្រទេសជាច្រើននៅអឺរ៉ុប បានចាប់ផ្តើមរៀបចំយុទ្ធសាស្ត្រថ្មី ដើម្បីការពារខ្លួន បន្ទាប់ពីបានឃើញមហាយក្សចិន បញ្ចេញសាច់ដុំកាន់តែខ្លាំង មិនថាផ្នែកកងទ័ព និងពាណិជ្ជកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ