អាល្លឺម៉ង់ចាត់ទុកថាចិន កំពុងធ្វើសកម្មភាពប្រឆាំងផលប្រយោជន៍ និងតម្លៃរបស់អាល្លឺម៉ង់
ចិន គឺជាដៃគូពាណិជ្ជកម្មដ៏ធំជាងគេ របស់អាល្លឺម៉ង់។ តែទន្ទឹមនឹងនេះ ចិនបាននិងកំពុងតែធ្វើសកម្មភាព ដ៏គ្រោះថ្នាក់ ប្រឆាំងមកលើផលប្រយោជន៍ ក៏ដូចជាតម្លៃរបស់អាល្លឺម៉ង់។ នេះគឺជាការលើកឡើង នៅក្នុងឯកសារយុទ្ធសាស្ត្រមួយ ចេញផ្សាយដោយរដ្ឋាភិបាលអាល្លឺម៉ង់ កាលពីថ្ងៃពុធ ទី១៤មិថុនាម្សិលមិញ។ នៅសប្តាហ៍ក្រោយនេះ គណៈប្រតិភូចិនដឹកនាំដោយលោកនាយករដ្ឋមន្ត្រី លី ឈាំង នឹងធ្វើដំណើរទៅកាន់ទីក្រុងប៊ែរឡាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
ឆ្លងកាត់ការជជែកដេញដោលគ្នា រវាងសមាជិករដ្ឋាភិបាលអាល្លឺម៉ង់ ទីបំផុតឯកសារយុទ្ធសាស្ត្រសន្តិសុខជាតិអាល្លឺម៉ង់ ត្រូវបានបង្ហាញជាផ្លូវការ។ ឯកសារដែលមានកម្រាសជិត៨០ទំព័រនេះ បានរៀបរាប់លំអិត អំពីបញ្ហាប្រឈមធំៗ ទាំងឡាយទាំងពួង ដែលកំពុងចោទឡើងមកលើសន្តិសុខជាតិអាល្លឺម៉ង់ ដោយរាប់ទាំង ការគំរាមពីសំណាក់រុស្ស៊ី បញ្ហាសន្តិសុខព័ត៌មានវិទ្យា ព្រមទាំងវិបត្តិអាកាសធាតុជាដើម។
តែអ្វីដែលហាក់ធ្វើឲ្យរដ្ឋាភិបាលអាល្លឺម៉ង់ ផ្តោតការយកទុកដាក់បំផុតនោះ គឺការគំរាមពីសំណាក់ចិន។ ឯកសារបានលើកឡើងថា ចិនបានប្រើគ្រប់មធ្យោបាយ ក្នុងនាមជាមហាអំណាចសេដ្ឋកិច្ច ដើម្បីធ្វើឲ្យប្រែប្រួលដល់សណ្តាប់ធ្នាប់ពិភពលោក ព្រមទាំងច្បាប់អន្តរជាតិ។ ជាសកម្មភាព ដែលចិនធ្វើ ដោយប្រឆាំងនឹងផលប្រយោជន៍ ព្រមទាំងតម្លៃមនសិកា របស់អាល្លឺម៉ង់។
ជាការពិត សម្រាប់អាល្លឺម៉ង់ ចិនគឺជាដៃគូ ប្រកួតប្រជែង ដោយមិនអាចចៀសផុត ហើយធាតុផ្សំនៃការប្រកួតប្រជែងនេះ មានកាន់តែច្រើនឡើង នៅរវាងប៉ុន្មានឆ្នាំចុងក្រោយ។ ក៏ប៉ុន្តែអាល្លឺម៉ង់យល់ឃើញថា បច្ចុប្បន្ននេះ ស្ថិរភាពតំបន់ ព្រមទាំងសន្តិសុខអន្តរជាតិ កំពុងទទួលរងសំពាធកាន់តែខ្លាំងឡើង ដោយសារតែសកម្មភាពវាតទីរបស់ចិន។ ជាមួយគ្នានេះ សិទ្ធិមនុស្សក៏កាន់តែត្រូវគេរំលោភបំពាន។ ចិនបានប្រើប្រាស់អាវុធពាណិជ្ជកម្ម សេដ្ឋកិច្ច ដើម្បីឈានទៅសម្រេចកម្មវត្ថុមហិច្ឆតា របស់ខ្លួន។
ឆ្លើយទៅកាន់អ្នកកាសែត ក្នុងពេលធ្វើបទបង្ហាញឯកសារយុទ្ធសាស្ត្រនេះ លោក អូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ បានលើកឡើងថា ទោះជាយ៉ាងណា ចិនគឺជាដៃគូពាណិជ្ជកម្មដ៏ធំបំផុតរបស់អាល្លឺម៉ង់ ហើយសំណុំរឿងធំៗរបស់ពិភពលោក មិនអាចត្រូវបានដោះស្រាយចេញទេ ប្រសិនបើគ្មានចិនចូលរួមជាមួយទេនោះ។ ដូច្នេះ អាល្លឺម៉ង់ នឹងមិនទៅរារាំងការរីកចម្រើនសេដ្ឋកិច្ចរបស់ចិន ព្រមទាំងសមាហរណ្ណកម្មក្នុងស្ថាប័នអន្តរជាតិនោះទេ។ តែទន្ទឹមគ្នានេះ អាល្លឺម៉ង់ ត្រូវតែបង្កើនការប្រុងប្រយ័ត្ន ទាក់ទិននឹងបញ្ហាសន្តិសុខជាតិ។
គួរកត់សំគាល់ថា ប្រមាណជាង១ឆ្នាំមកនេះ អាល្លឺម៉ង់ហាក់បានពង្រឹងគោលជំហររឹងរូសដាក់ចិន បើទោះបីជានៅតែធានាថាចិនគឺជាដៃគូពាណិជ្ជកម្ម។ សមាជិករដ្ឋាភិបាលចម្រុះអាល្លឺម៉ង់ ដែលមកពីគណបក្សបរិស្ថាននិយម បានទាមទារឲ្យរដ្ឋាភិបាលអាល្លឺម៉ង់ ត្រូវតែមានជំហរម៉ឺងម៉ាត់ កុំចុះញ៉មនឹងចិន តួយ៉ាងទាក់ទិននឹងសំណុំរឿងកោះតៃវ៉ាន់ ព្រមទាំងសំណុំរឿងរំលោភសិទ្ធិមនុស្ស នៅខេត្តស៊ីនជាំងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ