មហន្តរាយបាក់ទំនប់ទឹកនៅអ៊ុយក្រែន៖ ប្រធានាធិបតីតួកគីស្នើឲ្យមាន ការស៊ើបអង្កេតអន្តរជាតិឯករាជ្យ
ទំនប់ទឹក កាខូវកា នៅភាគខាងត្បូងអ៊ុយក្រែន ដែលបានរងគ្រប់ផ្ទុះបណ្តាលឲ្យបាក់ធ្លាយនោះ កំពុងតែបង្កឲ្យមានការព្រួយបារម្ភជាខ្លាំង ថាអាចនឹងបណ្តាលឲ្យមានមហន្តរាយធម្មជាតិដ៏ធ្ងន់ធ្ងរ។ មនុស្សជាច្រើនពាន់នាក់ ត្រូវបានជម្លៀសចេញពីតំបន់លិចទឹក ខណៈភាគីទាំង២ អ៊ុយក្រែននិងរុស្ស៊ី បន្តចោទគ្នាទៅវិញទៅមក។ កាលពីថ្ងៃពុធទី៧កក្កដា លោកអ៊ែរដូហ្កាន់ ប្រធានាធិបតីតួកគី បានស្នើទៅភាគីទាំងខាង ថាត្រូវតែយល់ព្រម ឲ្យមានការស៊ើបអង្កេតឯករាជ្យ ជាលក្ខណៈអន្តរជាតិ ដើម្បីវែករកការពិត ថាអ្នកណាជាអ្នកទទួលខុសត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
មួយថ្ងៃក្រោយមហន្តរាយផ្ទុះបាក់ទំនប់ទឹក Kakhovka លោកអ៊ែរដូហ្កាន់ បានទូរស័ព្ទទៅនិយាយជាមួយលោក ហ្សេឡេនស្គី និងលោកពូទីន។ នៅក្នុងការសន្ទនានោះ លោកប្រធានាធិបតីតួកគី បានស្នើទៅភាគីជម្លោះទាំងសងខាង ថាត្រូវយល់ព្រមឲ្យមានការបង្កើត គណកម្មការពិសេសមួយ ដើម្បីបើកកាស៊ើបអង្កេតដោយឯករាជ្យ ដោយមានការចូលរួមពីអ្នកជំនាញនៃប្រទេសមានជម្លោះទាំង២ អ្នកជំនាញអង្គការសហប្រជាជាតិ ព្រមទាំងតំណាងសហគមន៍អន្តរជាតិផងដែរ។ គណកម្មការឯករាជ្យនេះ នឹងមានតួនាទី ដោះស្រាយចម្ងល់ លុបបំបាត់មន្ទិលសង្ស័យទាំងអស់ ទាក់ទិននឹងការបាញ់ប្លោងគ្រាប់ ធ្វើឲ្យផ្ទុះបាក់ធ្លាយទំនប់ទឹកដ៏ធំមួយនេះ។
សូមបញ្ជាក់ថា អ៊ុយក្រែន និង រុស្ស៊ី បានចោទគ្នាទៅវិញទៅមក ថាជាអ្នកបាញ់បំផុតកំទេចទំនប់ទឹក Kakhovka ដែលស្ថិតនៅលើដងទន្លេDniepr ក្បែរតំបន់ខែរសុន ភាគខាងត្បូងអ៊ុយក្រែន។ អ៊ុយក្រែនចោទថាគឺរុស្ស៊ី ជាអ្នកធ្វើរឿងនេះ ដើម្បីរារាំងកុំឲ្យកងទ័ពអ៊ុយក្រែន បើកការវាយប្រយុទ្ធដណ្តើមទឹកដីវិញ។ ចំណែករុស្ស៊ី ចោទថាគឺអ៊ុយក្រែនទេ ដែលជាអ្នកបាញ់បំផ្ទុះទំនប់ ដើម្បីកេងចំណេញយុទ្ធសាស្ត្រ។
ក្នុងពេលដែលគូបដិបក្សទាំង២ចង្អុរមុខគ្នាទៅវិញទៅមក តំបន់ជាច្រើននៅតាមដងទន្លេផ្នែកខាងក្រោមទំនប់ ត្រូវទឹកជន់លិចយ៉ាងដំណំ បន្ទាប់ពីបាក់ទំនប់។ អាជ្ញាធរអ៊ុយក្រែន បានអះអាងថាគេបានជម្លៀសប្រជាជន ចំនួនប្រមាណ១៧០០នាក់ ចេញពីតំបន់ដែលត្រូវទឹកជន់លិច។ កាលពីថ្ងៃអង្គារ រដ្ឋអាជ្ញាអ៊ុយក្រែន លើកឡើងថា ខាងអ៊ុយក្រែន គឺគេត្រូវការជម្លៀសមនុស្សយ៉ាងហោច ១៧០០០នាក់។ នៅខាងតំបន់ស្ថិតក្រោមការកាន់កាប់របស់រុស្ស៊ីវិញ អាជ្ញាធររុស្ស៊ីអះអាងថា បានជម្លៀសមនុស្សចំនួន ១២៧៤នាក់។ ក្រៅពីនេះ នៅមានមនុស្សជាច្រើនពាន់នាក់ទៀត ដែលបានភៀសខ្លួន ចេញដោយមធ្យោបាយផ្ទាល់ខ្លួន។
គួរបញ្ជាក់ដែរថា អង្គការបរិស្ថានបានថ្លែងការព្រួយបារម្ភ ជាពិសេស អំពីមហន្តរាយធម្មជាតិ។ យ៉ាងហោចណាស់ មានប្រេងម៉ាស៊ីនចំនួន១៥០តោន បានបែកធ្លាយហូរចូលទឹកទន្លេ ព្រមជាមួយនឹងផ្ទៃដីចំការរាប់ពាន់ហិកតា ត្រូវទឹកជន់លិច។ អង្គការ Ecoaction អ៊ុយក្រែន បានព្រួយបារម្ភថា បញ្ហានេះនឹងធ្វើឲ្យតំបន់ស្ថិតនៅខាងលើទំបន់ ត្រូវខ្សោះអស់ទឹកប្រើ ងាប់សត្វពាហនៈ ដំណាំ និងរុក្ខជាតិផ្សេងៗ។
បញ្ហាខ្វះទឹកនេះ ក៏បានបង្កឲ្យមានការបារម្ភផងដែរ ទាក់ទិននឹងសុវត្ថិភាពនៃរោងចក្រនុយក្លេអ៊ែរ ហ្សាប៉ូរីចា ដែលស្ថិតចំណាយប្រមាណ១៥០គីឡូម៉ែត្រ ប៉ែកខាងលើទំនប់។ គេត្រូវការទឹកទន្លេជាចាំបាច់ ដើម្បីចាក់បំពេញ ទប់សីតុណ្ហភាពរបស់រ៉េអាក់ទ័រនុយក្លេអ៊ែរ។ យ៉ាងណាក៏ដោយ ទីភ្នាក់ងារថាមពលនុយក្លេអ៊ែរអន្តរជាតិ បានអះអាងថាគិតត្រឹមពេលនេះ គឺមិនមានការបារម្ភណាមួយទេ ស្តីពីសុវត្ថិភាពនៅស្ថានីយហ្សាប៉ូរីចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ