ក្រុមប្រទេសស្កង់ឌីណាវ ជាប់ព្រំដែនរុស្ស៊ីធ្វើសមយុទ្ធផ្លូវអាកាសក្នុងទ្រង់ទ្រាយធំ មិនធ្លាប់មាន
ស៊ុយអែត រួមជាមួយហ្វាំងឡង់ ន័រវែស ដែលមានព្រំដែនជាប់រុស្ស៊ីបានសហការគ្នាធ្វើសមយុទ្ធផ្លូវអាកាសដ៏ធំ មិនធ្លាប់មាននៅអឺរ៉ុប។ សមយុទ្ធដែលមានឈ្មោះថា Arctic Challengeបានចាប់ផ្តើមបើកតាំងពីថ្ងៃចន្ទទី ២៩ឧសភា រហូតដល់ថ្ងៃទី ៩មិថុនា។ ប្រទេសចំនួន១៤ចូលរួម ដែលនៅក្នុងនោះភាគច្រើនជាប្រទេសសមាជិកសម្ព័ន្ធអាត្លង់ទិកអូតង់។
ចុះផ្សាយនៅថ្ងៃ៖
ស្តាប់ - ០២:៣០
ក្នុងចំណោមប្រទេសចំនួន១៤ដែលចូលរួមក្នុងសមយុទ្ធ Arctic Challenge ដែលរៀបចំឡើងដោយប្រទេសហ្វាំងឡង់ មានតែ ២ប៉ុណ្ណោះ ដែលមិនមែនជាសមាជិករបស់អូតង់ នោះគឺ ស្វ៊ីស និងប្រទេសស៊ុយអែត។ ប៉ុន្តែ ទោះជាយ៉ាងណានេះក្តី ប្រទេសហ្វាំងឡង់បានសង្កត់ធ្ងន់ថា សមយុទ្ធផ្លូវអាកាស រយៈពេល ១២ថ្ងៃ មិនមែនជាសមយុទ្ធរបស់អូតង់ ប៉ុន្តែ ជាសមយុទ្ធផ្លូវអាកាសដែលប្រទេសស្កង់ឌីណាវ ហ្វាំងឡង់ ស៊ុយអែត និងន័រវែសតែងរៀបចំឡើង នៅ២ឆ្នាំម្តង។ ប្រទេសស្កង់ឌីណាវទាំងបីព្យាយាមគូសបញ្ជាក់យ៉ាងដូច្នេះ ដើម្បីជៀសវាង ភាពតានតឹងជាមួយរុស្ស៊ី ប្រទេសជាប់ព្រំដែន ដែលមិនរារែកនឹងបញ្ជូនយន្តហោះចម្បាំងទៅហោះក្នុងដែនអាកាសរបស់ប្រទេសជិតខាងដើម្បី កំញើញ បង្ហាញសាច់ដុំយោធា។
សមយុទ្ធ Arctic Challengeមិនមែនជាសមយុទ្ធរបស់អូតង់ ហើយក៏គ្មានទិសដៅប្រឆាំងរុស្ស៊ី ប៉ុន្តែ នៅក្នុងបរិបទសង្រ្គាមអ៊ុយក្រែន និងការរំលោភជាញយដងរបស់យន្តហោះចម្បាំងរុស្ស៊ី ក្នុងដែនអាកាសរបស់ប្រទេសអឺរ៉ុបខាងជើង សមយុទ្ធ Arctic Challengeជាឱកាសហាត់សម ដើម្បីឆ្លើយតបនឹងការឈ្លានពាន វាយប្រហារណាមួយរបស់ Soukhoï ឬMig ដែលជាយន្តហោះចម្បាំងរបស់រុស្ស៊ី។
មានការចូលរួមពីកងទ័ពជើងអាកាស ចំនួន២៧០០នាក់ មកពីប្រទេសចំនួន១៤ សមយុទ្ធនៅក្នុងដែនអាកាសក្បែរតំបន់ប៉ូលអាក់ទិក នៅឆ្នាំនេះ កត់សំគាល់ដោយវត្តមានចូលរួមរបស់យន្តហោះចម្បាំងទំនើបៗចំនួន១៥០គ្រឿង ដែលមានដូចជាយន្តហោះ F-35 របស់អាមេរិក Rafaleរបស់បារាំង យន្តហោះចម្បាំងរបស់អាល្លឺម៉ង់ Eurofighter F-16 របស់ន័រវែស និងGripen ស៊ុយអែត។ អូតង់វិញបានបញ្ជូនយន្តហោះបំពាក់ដោយរ៉ាដាដើម្បីតាមដានចាប់សញ្ញានៅក្នុងអាកាស។ ការបញ្ចេញយន្តហោះចម្បាំងទំនើបៗជាមួយបច្ចេកវិទ្យាចុងក្រោយ នៅក្នុងសមយុទ្ធលើកនេះ ជាឱកាសធ្វើតេស្តសាកល្បងសមត្ថភាពរបស់យន្តហោះចម្បាំងរបស់ប្រទេសអឺរ៉ុបខាងជើង ដើម្បីការពារដែនអាកាសរបស់ខ្លួន ឬក្នុងករណីដែលមានប្រតិបត្តិការចាក់សាំងយន្តហោះនៅក្នុងលំហរអាកាស។
ជាមួយសមយុទ្ធក្នុងទ្រង់ទ្រាយធំ ដែលប្រើសុទ្ធតែយន្តហោះចម្បាំងទំនើបៗ ប្រទេសស្កង់ឌីណាវ ចង់បង្ហាញថា ពួកគេមិនឯកោរ នៅចំពោះមុខរុស្ស៊ី ដែលបញ្ជូនយន្តហោះឲ្យទៅហោះរំលោភចូលដែនអាកាសរបស់ក្រុមប្រទេសស្កង់ឌីណាវ កាន់តែញយដង គិតចាប់តាំងរុស្ស៊ីធ្វើសង្រ្គាមឈ្លានពានអ៊ុយក្រែន និងជាពិសេស នៅក្រោយហ្វាំងឡង់ ប្រទេសជាប់ព្រំដែនជាមួយរុស្ស៊ីបានក្លាយជាសមាជិកផ្លូវការរបស់អូតង់ កាលពីមេសាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ