ប្រធានាធិបតីបេឡារុស៖ រុស្ស៊ីចាប់ផ្តើមបញ្ជូនអាវុធនុយក្លេអ៊ែរយុទ្ធសាស្រ្តទៅបេឡារុស
២ខែក្រោយប្រធានាធិបតីរុស្ស៊ី លោកពូទីនប្រកាសដាក់ពង្រាយអាវុធនុយក្លេអ៊ែរយុទ្ធសាស្រ្ត នៅបេឡារុស ដែលជាប្រទេសជិតខាង ប្រធានាធិបតីរបស់បេឡារុស លោកអាឡិចសង់ លូកាឆិនកូ បានអះអាងកាលពីថ្ងៃព្រហស្បតិ៍ម្សិលមិញថា រុស្ស៊ីបានចាប់ផ្តើមដឹកជញ្ជូនអាវុធនុយក្លេអ៊ែរយុទ្ធសាស្រ្តរបស់ខ្លួន ទៅក្នុងទឹកដីបេឡារុស។ ប្រធានាធិបតីបេឡារុសអះអាងយ៉ាងដូច្នេះ ទៅកាន់អ្នកកាសែត នៅក្នុងអំឡុងទស្សនកិច្ចរបស់លោក នៅទីក្រុងម៉ូស្គូ កាលពីថ្ងៃព្រហស្បតិ៍។
ចុះផ្សាយនៅថ្ងៃ៖
ប្រធានាធិបតីបេឡារុស លោកលូកាឆិនកូ បាននិយាយប្រាប់អ្នកកាសែតនៅថ្ងៃព្រហស្បតិ៍ថា លោកប្រធានាធិបតីពូទីនបាននិយាយប្រាប់លោក កាលពីថ្ងៃពុធថា លោកបានចុះហត្ថលេខារួចហើយ លើក្រឹត្យបញ្ជូនអាវុធនុយក្លេអ៊ែរយុទ្ធសាស្រ្ត ទៅកាន់ប្រទេសបេឡារុស ដែលជាសម្ព័ន្ធមិត្តរបស់រុស្ស៊ី។
តាមប្រធានាធិបតីបេឡារុស រុស្ស៊ីចាប់ផ្តើមដឹកជញ្ជូនអាវុធនុយក្លេអ៊ែរយុទ្ធសាស្រ្ត ទៅដាក់ក្នុងទឹកដីបេឡារុស ពោលគឺនៅ២ខែក្រោយ លោកពូទីនប្រកាសពង្រាយអាវុធនុយក្លេអ៊ែរនៅបេឡារុស។ ភាគីរុស្ស៊ីវិញ នៅមិនទាន់អត្ថាធិប្បាយអ្វី ទាក់ទងនឹងការដឹកជញ្ជូនក្បាលគ្រាប់នុយក្លេអ៊ែរទៅដាក់ពង្រាយនៅក្នុងប្រទេសបេឡារុស។
ចាត់ទុកជាសកម្មភាពរុស្ស៊ី ថា គ្មានការទទួលខុសត្រូវ និងញុះញង់ វ៉ាស៊ីនតោន តាមរយៈអ្នកនាំពាក្យរបស់សេតវិមាន លោកស្រី Karine Jean-Pierre បាននិយាយថា អាមេរិកនឹងតាមដានយ៉ាងកៀកកិត សកម្មភាពនុយក្លេអ៊ែររបស់រុស្ស៊ី។ ប៉ុន្តែ រហូតមកដល់ពេលនេះ អាមេរិកនៅមិនទាន់ឃើញមានសញ្ញាណាមួយដែលបង្ហាញថា រុស្ស៊ីកំពុងត្រៀមប្រើអាវុធនុយក្លេអ៊ែរតាក់ទិក ចេញពីទឹកដីបេឡារុស។
មានព្រំដែនជាប់ជាមួយប្រទេសសមាជិកអូតង់ចំនួន ៣ ដូចជា ប៉ូឡូញ លីទុយអានី និងឡេតូនី ប្រទេសបេឡារុសអនុញ្ញាតឲ្យកងទ័ពរុស្ស៊ីប្រើប្រាស់ទឹកដីរបស់ខ្លួនដើម្បីវាយប្រហារទៅលើអ៊ុយក្រែន។
នៅចុងខែមីនា ប្រធានាធិបតីរុស្ស៊ី លោកពូទីនបានប្រកាសពង្រាយអាវុធនុយក្លេអ៊ែរយុទ្ធសាស្រ្ត នៅបេឡារុស នៅក្រោយការបើកភ្លើងខៀវរបស់មេដឹកនាំបេឡារុស។
គិតចាប់តាំងពីឆ្នាំ ១៩៩១ នេះជាលើកទី១ ដែលរុស្ស៊ីដាក់ពង្រាយអាវុធនុយក្លេអ៊ែររបស់ខ្លួន នៅក្រៅប្រទេស។ អាវុធនុយក្លេអ៊ែរយុទ្ធសាស្រ្តដែលរុស្ស៊ីពង្រាយដាក់ក្នុងទឹកដីបេឡារុស ជាប្រភេទអាវុធដែលគេប្រើសម្រាប់សមរភូមិប្រយុទ្ធ ដែលមិនបង្កមហន្តរាយទ្រង់ទ្រាយធំ ដូចជាប្រភេទអាវុធនុយក្លេអ៊ែរ យុទ្ធសាស្រ្តដែលគេប្រើសម្រាប់បាញ់ចម្ងាយឆ្ងាយ។ នៅក្រោយជំនួបជាមួយរដ្ឋមន្រ្តីការពារជាតិបេឡារុស នៅទីក្រុងMinsk កាលពីថ្ងៃព្រហស្បតិ៍ ប្រមុខការពារជាតិរុស្ស៊ី Sergueï Choigouបាននិយាយប្រាប់អ្នកកាសែតថា ទាហានបេឡារុសបានទទួលការបណ្តុះបណ្តាលស្តីពីប្រព័ន្ធមីស៊ីលរុស្ស៊ី ដែលមានបំពាក់ក្បាលគ្រាប់នុយក្លេអ៊ែរ កាលពីខែមេសាកន្លងទៅ។ ម្យ៉ាងទៀត ប្រទេសទាំងពីរនឹងអាចចាត់វិធានការបន្ថែម ដើម្បីធានាសន្តិសុខបេឡារុស និងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ