នាវាផ្ទុកយន្តហោះអាមេរិកដ៏ធំជាងគេបង្អស់ទៅធ្វើលំហាត់សឹកនៅអាកទិក
USS Gerald Ford នាវាផ្ទុកយន្តហោះដ៏ទំនើបនិងធំជាងបង្អស់នៅលើពិភពលោក របស់សហរដ្ឋអាមេរិក បានធ្វើដំណើរមកសំចតនៅទីក្រុងអូស្លូ ប្រទេសន័រវែស នាថ្ងៃពុធទី ២៤ឧសភា២០២៣ ដើម្បីចូលរួមធ្វើសមយុទ្ធ ក្នុងក្របខ័ណ្ឌអូតង់ នៅមហាសមុទ្ទអាកទិក។ នេះជាលើកទីមួយ ដែលអូតង់បង្ហាញសាច់ដុំខ្លាំងដ៏សម្បើមរបស់ខ្លួនយ៉ាងដូច្នេះ។ រុស្ស៊ីបានបញ្ចេញប្រតិកម្មបរិហារភ្លាម។
ចុះផ្សាយនៅថ្ងៃ៖
ស្តាប់ - ០២:០៣
មានប្រវែងជាង ៣៣៥ម៉ែត្រ អាចផ្ទុកយន្តហោះនិងឧទ្ធម្ភាគចក្របានដល់ទៅ៩០គ្រឿង USS Gerald Ford ជានាវាផ្ទុកយន្តហោះដើរដោយថាមពលនុយក្លេអ៊ែរ ជំនាន់ចុងក្រោយបង្អស់ និងជានាវាយោធាដ៏ធំជាងគេបង្អស់នៅលើពិភពលោក។ មកដល់ក្រុងអូស្លូ នៅព្រឹកថ្ងៃពុធ ដោយបន្តសំចតនៅកំពង់ផែន័រវែសរយៈពេលពីរបីថ្ងៃ ក្រោមការការពារយ៉ាងខ្លាំហ្មត់ចត់ទាំងក្នុងផ្ទៃទឹក និងលើផ្ទៃអាកាសជុំវិញ Uss Gerald Ford ត្រូវបន្តដំណើរទៅ ចូលរួមធ្វើសមយុទ្ធអូតង់នៅសមុទ្ទអាកទិក។ សមយុទ្ធ Arctic Challenge Exercise នឹងចាប់ផ្តើម នៅថ្ងៃទី២៩ឧសភា ដោយមានប្រមូលផ្តុំយានយន្តអាកាសជាង១៥០គ្រឿង របស់សម្ព័ន្ធលោកខាងលិចចំនួន១៤ប្រទេស។
វត្តមាននិងទស្សនកិច្ច របស់នាវាយោធាអាមេរិក នៅន័រវែស ជាការផ្តល់ឱកាសដ៏ប្រពៃដល់ការអភិវឌ្ឍកិច្ចសហប្រតិបត្តិការ និងរឹតចំណងការងារឱ្យកាន់តែស្អិតល្មួត ជាមួយសម្ព័ន្ធមិត្តអាមេរិក។ នេះជាសេចក្តីថ្លែងការណ៍របស់យោធាន័រវែស។
ប៉ុន្តែការចូលសំចតរបស់នាវានេះបានទាក់ទាញចំណាប់អារម្មណ៍ជាពិសេស ព្រោះវាប្រព្រឹត្តទៅជួនចំពេលក្រុមលោកខាងលិចនិងរុស្ស៊ីកំពុងមើលមុខគ្នាដោយហេតុសង្គ្រាមអ៊ុយក្រែន។ ស្ថានឯកអគ្គរដ្ឋទូតរុស្ស៊ីប្រចាំទីក្រុងអូស្លូ បានចេញលិខិតថ្កោលទោសវត្តមាននៃនាវាយោធាអាមេរិកភ្លាមថា តំបន់ភាគខាងជើង មិនត្រូវការដំណោះស្រាយយោធា ឬជាមូលបទដែលទាមទារអន្តរាគមន៍យោធាបរទេសទេ។ អូស្លូដឹងថារុស្ស៊ីមិនមែនជាការគំរាមកំហែងយោធាដោយផ្ទាល់ សម្រាប់ន័រវែសទេ ដូច្នេះការបង្ហាញសាច់ដុំបែបនេះ មិនឡូស៊ិកនិងអាចខូចប្រយោជន៍អ្នកដទៃណាស់។ នេះជាប្រតិកម្មរបស់រុស្ស៊ីដដែល។
ជាសមាជិកអូតង់ ន័រវែសមានព្រំដែនគោកជាមួយរុស្ស៊ីប្រវែង១៩៨គីឡូម៉ែត្រ និងព្រំដែនទឹកយ៉ាងវែង នៅភាគខាងជើងក្នុងតំបន់អាកទិក។ តាំងពីឆ្នាំមុនមក ន័រវែសបានក្លាយជាប្រទេសអ្នកផ្គត់ផ្គង់ថាមពលហ្កាស ដ៏ចម្បងដល់អឺរ៉ុប បន្ទាប់ពីរុស្ស៊ីសម្រេចបិទបំពង់បង្ហូរឧស្ម័នមកឱ្យអឺរ៉ុបមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ